Durante un conferencia di prensa recien, parlamentario Evelyn Wever-Croes, lider di fraccion di MEP, a bolbe pone enfasis riba un tema cu pa hopi tempo caba ta causando preocupacion grandi den comunidad: e situacion di e planta di purificacion di awa na Bubaliplas y e rol di e compania AWSS.

Segun Wever-Croes, esaki no ta un problema nobo, sino un cu pa hopi tempo a ser identifica como un asunto urgente cu mester atencion inmediato y accion decisivo.

Wever-Croes a splica cu durante e periodo cu MEP tabata den gobierno, e planta di Bubaliplas tabata regularmente presenta problema. E situacion di holor desagradabel tabata un di e kehonan mas frecuente di residente y sector turistico, mientras cu e nivel di awa den Bubaliplas tambe tabata causa preocupacion.

Gobierno di e tempo ey a inverti cantidadnan considerable di placa pa trata di controla e situacion, hopi biaha cu solucion temporario. Segun Wever-Croes, tabatin momento cu literalmente cada rato tabatin mester di intervencion urgente pa mantene e sistema funcionando.

El a splica cu na un dado momento gobierno a dicidi pa no sigui solamente cu solucionnan parcial, sino pa aborda e problema den profundidad. E decision ey a resulta den alocacion di 16 miyon florin, no pa construi un planta completamente nobo, pero pa mehora structuralmente e sistema existente asina cu e por funciona mas eficiente y reduci e problema di holor y contaminacion.

Sinembargo CAft a pone presion riba gobierno pa no inverti e placa asigna pa e proyecto, obligando e gabinete di e tempo pa redirigi e placa pa pago di debe. Segun Wever-Croes, e presion ey tabata intenso, cu hasta nan a menasa cu un aanwijzing, loke a obliga gobierno pa busca otro alternativa pa logra un solucion duradero.

Como respuesta, gobierno a crea un comision di expertonan local cu experiencia profesional, guia door di ex minister Ursell Arends y ex minister Glenbert Croes. Despues di tres luna di analisis y estudio, e comision a presenta un propuesta concreto pa e gobierno di Aruba. E solucion tabata caro, pero segun Wever-Croes, tabata necesario considerando e gravedad di e situacion y e limitacionnan imponi pa CAft.

E propuesta final a inclui e idea pa privatisa e planta di purificacion, loke a culmina den creacion di e compania AWSS na 2024. Parlamento a aproba e iniciativa cu mayoria, incluyendo e modelo di financiamento cu lo ser sostene den parti door di ingreso genera for di sector turistico, particularmente e contribucion di bishitante cu drenta Aruba. AWSS a presenta un plan cu tabatin solucion pa e problema di holor na corto plaso via inversion den ekipo manera motornan y rotor, mientras cu pa mediano y largo plaso e meta tabata construi un planta nobo cu lo elimina e problema definitivamente.

Wever-Croes a indica cu e cambio di gobierno a cambia completamente e direccion di e proyecto. El a splica cu gobierno nobo a dicidi pa no continua cu e plan di AWSS. Segun e parlamentario, CAft a recomenda pa no sigui cu un acuerdo financiero cu tabata considera hopi caro, pero el a enfatisa cu para un proyecto sin presenta un alternativa concreto ta un decision iresponsable.

E lider di MEP ta indica cu aunke por evita gasto cu ta genera interes, e falta di accion tin consecuencia serio pa economia di Aruba. E situacion actual, el a remarca, ta afecta directamente e pilar turistico, ya cu e problema di holor ta creando un experiencia negativo pa bishitante y residente mescos. E malcontento general ta keda evidente den e cantidad di keho cu ta sigui surgi.

Wever-Croes ta expresa su malcontento cu no a sigui cu e proyecto y no a busca un solucion rapido, enfatisando cu urgencia di e problema no ta ser reconoce adecuadamente pa e gobierno actual. Den parlamento, el a indica, oposicion lo sigui haci pregunta y pidi claridad riba e plan di e ministerionan involucra.

Un punto central den su critica ta e falta di sentido di urgencia. Segun Wever-Croes, gobierno no ta mustra cu nan ta comprende e gravedad di e situacion ni cu nan ta duna e tema e prioridad cu e merece. E ta indica cu esaki lo ser discuti durante reunionnan parlamentario pa presiona pa mas accion.

Wever-Croes a splica cu fraccion di MEP a reuni cu diferente stakeholder den comunidad pa scucha nan preocupacion y opinion riba e tema. E meta di e encuentronan ey ta pa logra un enfoke uni y talbes forma un frente comun pa yuda haya un solucion efectivo pa e problema.

El a trece dilanti tambe un patronchi mas amplio den actuacion di e gobierno actual. El a señala cu riba diferente tereno gobierno actual a para proyecto existente pa inicia investigacion. Aunke el a reconoce cu investigacion tin su balor, e ta argumenta cu no por paralisa proyecto importante, specialmente esnan cu tin caracter urgente.

“Mi a ripara cu e gobierno aki riba diferente tereno a para proyecto y a bay investiga. Mi no ta contra investigacion, pero bo no por para cos pa investiga. Investiga numa, pero laga e proyectonan continua. Specialmente cosnan cu ta urgente pa Aruba y esey ta e caso aki,” el a enfatisa.

Wever-Croes a splica cu e situacion di AWSS ta un ehempel claro di e problema aki. Tabatin un plan caba, financiamento tabata identifica, y implementacion tabata den proceso. Pero gobierno nobo, riba conseho di CAft, a opta pa no sigui cu un fiansa caro cu AWSS tabata kier a cera.

Pero di otro banda gobeirno a opta pa no haci e inversion tampoco pa ahusta e modelo financiero, por ehempel usando surplus pa presta e fondo necesario na AWSS na interes mas abao, manera cu CAft mes a sugeri.

El a splica cu durante un bishita na Parkietenbos pa un presentacion di e incinerator nan a haya sa cu e direccion di e proyecto a cambia completamente. Enbes di enfoca riba mehora e planta di Bubaliplas, e plan ta move mas pa redirigi e fluho di desperdicio pa otro localidad pa procesamento. El a cuestiona con hopi infrastructura nobo, manera tuberia, lo mester ser construi, y cuanto tempo esaki lo tuma considerando procedemento di permiso y impacto riba propiedad priva.

Wever-Croes a señala cu cambia e sistema lo implica desafio logistico grandi y probablemente un proceso largo y compleho.

Segun e parlamentario, a pesar cu el a pidi pa wak e plan aki, e no a logra haya documentacion concreto cu detaya e strategia, loke ta indica cu e plan ainda ta den fase preliminar. El a critica cu despues di casi un aña di gobierno, ainda no tin un direccion claro ni continuidad di e proyecto anterior.

E critica di Wever-Croes no ta limita na e caso di AWSS. El a menciona cu e mesun patronchi di paralisacion ta visibel den otro area, incluyendo programa pa combati problema di salud mental, iniciativa pa lucha contra abuso sexual di muchanan, y proyecto di e-government cu ya tabatin financiamento sigura. Den tur e casonan aki, segun el a indica, investigacion a ser usa como rason pa stop progreso.

El a reitera cu investigacion no mester ser usa como excuus pa inaccion. En bes di para proyecto, el a remarca, gobierno mester sigui implementa mientras cu investigacion ta tuma lugar paralelamente. El a enfatisa cu e falta di balance aki ta resulta den stagnacion general di pais.

Por ultimo, parlamentario Wever-Croes a describi prome aña di gobernacion di Gabinete AVP-FUTURO como un periodo di stagnacion. El a menciona cu e progreso real ta limita, mientras cu accionnan cu ta mas visible ta esnan cu no tin un sentido di urgencia manera e problema di Bubaliplas.

El a ta critica liderazgo di prome minister Mike Eman, indicando cu en bes di enfoca riba gobernacion strategico di pais, tin mas enfasis riba actividadnan cu, aunke importante pa comunidad, no ta substitui e rol di guia nacional. El a indica cu Aruba mester liderazgo fuerte cu por tuma decision dificil y move e pais dilanti, algo cu el a considera cu falta actualmente.