(Infobae) – E lider Bielorruso a ser ricibi na aeropuerto di Pyongyang pa Kim Tok Hun, nombra recientemente como vice prome-minister pa lider supremo di Corea di Norte.

Dictador di Bielorrusia, Alexander Lukashenko, a yega diaranson na e capital di Corea di Norte, unda e ta spera pa reuni cu lider Nort Coreano Kim Jong-un.

Lukashenko a ser ricibi na aeropuerto di Pyongyang pa Kim Tok Hun, kende a ser nombra e siman aki como vice prome-minister, segun agencia estatal Bielorruso Belta. E agencia oficial di Corea di Nort (KCNA) anteriormente a informa cu Lukashenko lo haci un bishita oficial invita pa Kim, pero no a confirma su yegada.

Lukashenko, kende a goberna su pais cu man duro pa mas cu tres decada, ta un aliado cercano di Kremlin. El a permiti Rusia usa su teritorio pa invasion na gran escala di Ucrania na februari 2022, y despues a autorisa despliegue di arma nuclear tactico Ruso na Bielorrusia.

Kim tambe a fortalece su conexion cu Rusia den añanan reciente, mandando miles di soldad y gran cantidad di arma pa sostene guera di presidente Vladimir Putin na Ucrania, mientras e ta pusha un politica exterior mas agresivo pa fortalece relacion cu paisnan cu ta opone contra Washington.

Kim a acusa Merca dialuna di “terorismo di Estado y agresion global” durante un discurso na parlamento Norte Coreano — un cuerpo cu normalmente ta aproba decisionnan di e lider sin oposicion — aparentemente referiendo na guera den Medio Oriente. E tambe a haci yamado pa Pyongyang hunga un rol mas fuerte den un frente uni contra Cas Blanco memey di sentimento anti-Mericano creciente.

Segun Belta, relacion bilateral entre Corea di Norte y Bielorrusia ta riba agenda di reunion entre e dos lider. Lukashenko a reuni cu Kim na september 2025 na Beijing y a ricibi invitacion pa bishita Corea di Norte. Na 2024, minister di Asunto Exterior Bielorruso, Maxim Ryzhenkov, a bishita e pais. Segun e, nan lo firma un tratado di amistad y cooperacion durante e bishita.

Kim Jong-un a expresa den un carta di gratitud na presidente Ruso Vladimir Putin cu su pais lo sigui sostene Rusia durante invasion di Ucrania, cu awo ta drentando su di cinco aña desde 2022.

Segun agencia oficial KCNA, Kim a afirma cu Pyongyang y Moscu “ta coopera estrechamente pa defende soberania di ambos pais”. Den esey sentido, el a enfatisa: “Corea di Nort lo ta semper cu Rusia. Esaki ta nos decision y nos boluntad firme”.

Relacionnan entre e dos pais a fortalece desde invasion Ruso di Ucrania na 2022, cu Pyongyang mandando tropa terestre y sistemanan di arma pa sostene campaña militar Ruso. Analistanan ta indica cu e apoyo aki ta ser intercambia pa suministro Ruso di cuminda y tecnologia militar.

Asamblea legislativo di Corea di Norte a ratifica e siman aki Kim como hefe di e maximo organo di gobierno. Den un mensahe di felicitacion, Putin a destaca rol di Kim den fortalecemento di relacion entre Rusia y Corea di Norte y a subraya intencion pa profundisa asociacion strategico entre ambos pais.

E carta, publica pa Kremlin y agencia KCNA, a keda conoci despues di confirmacion di reeleccion di Kim como presidente di Comision di Asuntonan di Estado, un cuerpo cu e ta lidera desde 2011.

“Querido compañero Kim Jong-un, acepta mi felicitacion sincero pa bo reeleccion como presidente di Comision di Asuntonan di Estado di Republica Popular Democratico di Corea”, Putin a bisa. El a agrega cu e decision di asamblea ta refleha “apoyo unanime di pueblo” pa politicanan di Kim, enfoca riba enfrenta desafionan social y economico y defende soberania nacional.

Segun KCNA, e asamblea — componi pa 687 diputado — a vota masivamente na fabor di e lider despues di eleccion cu participacion oficial di 99,9%. Kim Jong-un a emiti su voto den area minero di Cheonseong, na provincia di Pyongyang di Nort.

Putin a enfatisa importancia di cooperacion bilateral y a describi trabao conhunto como algo cu “sin duda ta beneficia interes fundamental di nos pueblo”. E tambe a reconoce contribucion personal di Kim den fortalecemento di conexion entre Moscu y Pyongyang y a reafirma su disposicion pa sigui profundisa e relacion strategico den contexto internacional actual.