Prome minister Rob Jetten lo haci un bishita di trabou na e parti Caribense di Reino den luna di mei. E lo ta su prome biahe oficial como prome minister Hulandes pa e islanan desde cu el a sinta na februari, y ta destina primordialmente pa enfoca riba cera conoci y fortifica e cooperacion mutuo.
Segun fuentenan na Den Haag, Jetten tin pensa di hiba combersacionnan durante su bishita cu e lidernan gubernamental di Aruba, Corsou, y Sint Maarten, como tambe cu administradornan di Boneiro, Sint Eustatius, y Saba. E biahe ta cuadra den su ambicion mas amplio pa intensifica e lasonan dentro di Reino y logra mayor igualdad den cooperacion.
Prome Minister nobo anteriormente a enfatisa cu e parti Caribense ta forma un componente esencial di Reino, cu su propio historia y cultura cu ta enrikece Hulanda. E ta defende un acercamento cu ta wak no solamente riba relacionnan administrativo pero tambe riba mehoracionnan concreto.
Ta anticipa cu topiconan importante di discusion durante e biahe lo inclui desaroyo economico, reduccion di pobresa y sostenibilidad. E acuerdo di coalicion di su gabinete ta enfoca entre otro riba fortalece e economianan riba e islanan y mehora e bestaansminimum den Caribe Hulandes.
Cu e bishita plania, Jetten tin como meta tambe pa manda un señal cu Den Haag ta tuma cooperacion cu partnernan Caribense na serio. E expectativa ta cu e biahe lo contribui na acuerdonan nobo y un cooperacion mas estrecho dentro di Reino den e proximo añanan.
