Na october aña pasa Sigfried “Siki” Koolman a ser sentencia na 10 aña di prison pa, entre otro, abuso sexual di menor, posesion di pornografia infantil y posesion ilegal di arma. Koolman y su ekipo di defensa a apela e sentencia aki. Durante un sesion ayera den Corte di Apelacion, Koolman y su abogado a haci peticion na huesnan pa nan scucha un testigo adicional cu, segun nan, por cambia e curso di e caso.
Segun un portal di noticia local, abogado di Koolman, Sr. Rosenstand, a splica cu e testigo cu nan kier presenta no a ser scucha durante e proceso inicial, pero tin informacion cu ta contradeci elementonan importante di e acusacion.
Defensa di Koolman a argumenta cu derecho di un acusado pa un proceso husto ta inclui e oportunidad pa presenta tur testimonio relevante, y cu omiti e testigo aki por a afecta e resultado final.
E peticion pa scucha un testigo adicional ta hopi biaha un paso clave den preparacion pa apelacion. Si corte acepta, por tin audiencia nobo unda e testimonio lo ser evalua y posiblemente integra den e caso. Si corte rechasa e peticion, defensa ainda tin opcion pa sigui dilanti cu un apelacion formal, presentando argumento cu e falta di e testimonio a constitui un eror den e proceso.
Apelacion no ta un proceso automatico pa haci henter e caso di nobo, pero mas bien un revision di si e procedemento legal a ser sigui corectamente y si e evidencia ta sostene e condena. Sinembargo, ora tin reclamo cu evidencia importante no a ser considera, esaki por tin efecto den decision di corte superior. Den e caso di Koolman, e enfasis riba e testigo nobo ta mustra cu defensa ta basa gran parti di su strategia riba e punto aki.
Otro punto cu e abogado a trece dilanti ta e declaracion di e menor di edad cu a bay Hulanda, unda el a bisa na Polis cu su prome relacion sexual tabata prome cu su 16 aña. Segun Rosenstand, ni polis di Hulanda ni esunnan di Aruba no a investiga e asunto di forma corecto. El a indica cu niun no a puntra e persona cu e menor di edad a tene su prome relacion sexual cune, tocante edad ni otro circunstancia.
Segun e portal di noticia local a señala, defensa di Koolman a indica cu e declaracionnan di e menornan di edad no ta cuadra cu berdad y a hasta pidi pa un psicologo evalua un di e denunciantenan pa determina si e declaracionnan ta berdad of no. Segun e, por lo menos un di e hobennan por a ser presiona pa “papia berdad” y pa menciona nombernan, cu menasa manera “si no, bo ta bay na bo madrastra”. Esaki, segun e defensa, ta esencial pa yega na e berdad.
Finalmente, e abogado ta pone den duda e exactitud di e declaracionnan, mientras cu corte mester tuma un decision riba si lo bay di acuerdo cu e peticionnan presenta. E atencion publico awor ta dirigi riba loke lo pasa despues. Si corte concede e peticion, esaki por habri porta pa un evaluacion nobo di cierto evidencia.
E caso
Koolman a enfrenta ocho acusacion en total. E investigacion contra Koolman a inicia despues cu e abuso contra e victima R. a bira conoci ora cu su stiefmoeder a topa un mensahe sospechoso den su telefon. E abuso di e otro victima, W. a bira conoci pasobra R. mes a conta di e abuso di W.
Segun declaracionnan, Koolman tabata un figura familiar den bario. El a traha na aeropuerto y pa ex-prome minister di Aruba. E tabata biba den un trailer cu tabata caminda e victimanan tabata bay pa usa wi-fi y wak television. Tur cos tabata mustra normal, pero tras di esaki tabata tuma luga abuso cu a marca e victimanan y nan famia pa resto di nan bida.
Victima R., kende ta e victima principal, a indica cu e abuso a cuminsa tempo cu e tabatin cinco aña di edad. El conta cu Koolman a cuminsa mishi cune na su parti intimo y pecho, cu y sin paña y poco poco el a cuminsa bay mas leu te ora cu tempo e tabatin siete aña, penetracion sexual a tuma luga. Esaki a sigui te ora el a cumpli 13 aña.
R. a indica cu e no tabata durf bisa nada na su mayornan pasobra e tabatin miedo cu si e bisa algo, Koolman lo haci algo malo na su mama.
No solamente R. tabata victima di Koolman, pero su amiga, W., tambe a conta cu abuso contra dje a cuminsa tempo cu e tabatin ocho of nuebe aña.
Segun su declaracion, Koolman a haci “tur cos” cu e dos mucha. Den un relato impactante, W. a bisa cu ora Koolman tabata tene relacion sexual cune, R. mester a tene su mannan pa yud’e soporta e dolor.
Pa loke ta e otro acusacion, posesion di pornografia infantil, polis a descubri un link di pornografia infantil den telefon di Koolman. Koolman a insisti cu e nunca a busca ni cumpra tal material, solamente pornografia di adulto. Segun su splicacion, el a ricibi un link, pero no a logra habrie, y nunca a mira kico e tabata. No obstante, polis a haya material pornografico infantil y tambe potret y video intimo di victima R. tambe den su posesion, loke a reforsa e acusacion di posesion ilegal di material explicito cu menor di edad.
Polis tambe a descubri seis arma di candela den cas di Koolman. Aunke e tabata miembro di un club di tiro, por lo menos un arma no tabata registra na su nomber. Segun fiscal, manera cu e arma tabata ser warda tampoco no tabata sigur, y esey a pone e menornan di edad den peliger. Victima R. mes a conta cu el a haya arma den trailer y a traha video cune.
Abogado Rosenstand a ataca e testimonio di e victimanan y nan famia. Segun e, hopi parti no ta consistente, victimanan supuestamente tabata inventa of exagera, y nan relato no ta identico. El a trece dilanti cu stiefmoeder di R. supuestamente a bisa cu R. tabata sexualmente activo y cu tabatin hopi problema familiar pa motibo di un amigo nobo cada siman.
Despues di repasa e caso, hues a declara den su veredicto cu tin suficiente prueba pa sostene cu e acto di abuso efectivamente a tuma luga durante un periodo largo, y cu e daño sexual y mental ta profundo. El a remarca cu e declaracion di e victimanan ta similar y consistente den e detayenan cu ambos victima a trece dilanti.
Hues a enfatisa cu Koolman no a pensa riba e daño cu e lo causa na e dos victimanan y a pensa riba mes. Pa motibo di su actonan e victimanan a keda marca pa bida y lo mester continua busca ayudo y tratamento pa maneha e trauma.
Adicionalmente hues a señala cu un di e victimanan, R., ta den tratamento psicologico intensivo y ainda ta sufri di pesadiya pa motibo di e trauma cu el a biba.
Mirando e gravedad di e caso, hues a sigui e peticion di Ministerio Publico y a impone un castigo di 10 aña di prison, kitando loke el a sinta caba. Adicionalmente e peticion pa compensacion pa daño y perhuicio entrega pa famia di ambos victima tambe a ser aproba pa hues.
