Trahadornan y studiantenan Venezolano a protesta atrobe pa miho salario y a haci yamado pa un marcha riba 9 di april

(Infobae) – Tabata e di cuater mobilisacion te awo e aña aki. Trahadornan y studiantenan di Universidad Central di Venezuela (UCV) a tene nan di cuatro protesta di aña pa reclama mehoracion di salario. Ademas, nan a haci yamado pa un mobilisacion nobo riba 9 di april di aña aki rumbo na sede di Ehecutivo na Caracas.

“Nos ta probecha di e oportunidad aki pa invita henter Venezuela 9 di april pa marcha pa Caracas, rumbo na Mira flores (sede di Ehecutivo), pa pidi e rumannan (Delcy y Jorge Rodriguez) un respuesta, unda e placa di tur Venezolano ta”, Jose Patines, secretario general di sindicato di Canciyer, a expresa.

E dia a cuminsa cu un asamblea na sede di UCV, sigui pa un marcha den area rond di universidad, unda manifestantenan a exigi un aumento di salario minimo, cu a keda na 130 bolivar pa cuater aña, ekivalente na 0,28 dollar pa luna segun cambio oficial di Banco Central di Venezuela.

Den añanan reciente, gobierno a priorisa pago di dos bonus na trahadornan publico, cu no ta impacta otro beneficio laboral y cu ta yega na 160 dollar, deposita den bolivar segun tasa oficial.

Patines a anuncia cu nan tambe lo exigi na presidente interino Delcy Rodriguez y presidente di Parlamento Jorge Rodriguez splicacion tocante e problemanan continuo cu suministro di awa y electricidad den e pais. “No sigui cu cuentonan, no sigui gaña Venezolanonan, si boso no por cu e cargo, entrega esaki”, el a agrega.

Valentine Sialoni, studiante di UCV, a expresa importancia di mantene presion pa mehora salario, estudio y condicionnan di bida y estudio. “Nan merece esaki den un pais cu semper a vale la pena”, el a declara.

Na februari, un famia tabatin mester di 645,6 dollar pa cubri gastonan basico di cuminda na Venezuela, segun Centro di Documentacion y Analisis di Federacion Venezolano di Maestronan (Cendas-FVM), cu a publica dialuna su calculacion di cantidad basico di cuminda.

E NGO a indica cu salario minimo ta cubri apenas 0,05% di costo di e cantidad aki, calcula pa cinco persona, loke ta ekivalente na 1.937 salario minimo mensual of 4,4 bonus di “guera economico”, un di e suplementonan cu gobierno ta paga cada luna.

Banco Central di Venezuela (BCV) a reporta cu e pais a registra un inflacion acumula di 51,9% den e prome dos luna di 2026, cu un subida di prijsnan di 14,6% na februari y 32,6% na januari.