Minister di Finanzas, Asunto Economico y Sector Primario Geoffrey Wever a duna un actualisacion na Parlamento siman pasa tocante e trabaonan andando den e maneho financiero di Aruba, durante cual el a splica cu ta importante pa informa parlamento y pueblo di tur loke ta den proceso y e progreso cu a of no a logra te cu awo.

Manera nos a menciona anteriormente, Aruba tin e tarea di haci cierto reforma structural cu ta detaya den landspakket y parti di esaki ta tema A, unda ta trata finanzas publico y di acuerdo cu esaki a duna informacion amplio tocante e trabao andando pa cu e implementacion di Three Lines Model, cual ta un parti clave ora ta papia di ehecuta Landspakket Tema A.

Tocante esaki, e minister a splica cu esaki ta un representacion di e paso structural pa e modernisacion di gobierno, cu un enfoke riba e responsabilidad y control efectivo ademas di transparencia riba e procesonan financiero.

Den e structura aki, e prome linea, cu ta cada departamento riba nan mes, ta asumi e responsabilidad directo di riesgo y control di operacionnan diario, e di dos linea, ehecuta pa Steunpunt Interne Beheersing (SIB), ta pa fortalece supervision y guia profesional y e di tres linea ta Centrale Accountantsdienst (CAD), y ta garantisa control independiente y auditoria.

Durante e reunion publico, e minister a splica cu den e structura nobo aki, cada departamento mes ta cu di e 10 proceso financiero cu ta forma parti di e reforma aki, 6 ta completamente operacional caba cu un sistema moderno y standarisa, ademas di ta introduci den 15 departamento gubernamental caba.

Un parti esencial di e proceso aki ta e consolidacion legal di e modelo aki, cual awo ta den fase final un landsbesluit cu ta defini di manera cla e rol y responsabilidad di cada linea, fortalece e base huridico y garantisa sostenibilidad di e sistema. Pa cu esaki, Raad van Advies ya a duna su conseho, y pronto lo presenta un version final na Conseho di Minister a un aprobacion final.

Gobierno a tuma paso tambe pa fortalece e capacidad di e institucion. SIB a keda estableci di manera formal como un departamento den DirectieFinanciën, centra riba monitoria, coach y guia e diferente servicionan publico. Banda di esaki, inversion den e forsa laboral ta sigui un prioridad cu e introduccion di e programa digital E-LOFA.

E minister a comenta cu gobierno “ta traha sistematicamente pa logra un gobierno cu ta funciona a base di control, responsabilidad y confiansa. E implementacion di e Three Lines Model no ta solamente ta un reforma tecnico, sino un cambio fundamental den cultura di maneho publico, unda tur decision ta basa riba control, transparencia y resultado” mientras cu tambe el a splica cu “e base legal, institucional y humano cu nos ta construyendo awo, nos ta crea e condicionnan pa un opinion positivo riba cuenta anual den futuro y pa un sistema financiero cu por sostene crecemento economico di Aruba a largo plazo.”

Na mesun tempo, e minister a reconoce cu tin retonan cu ta sigui y e manera cu gobierno lo lidia cu e retonan aki ta keda importante. Mester reconoce e progreso cu ta haciendo den e proyectonan, mientras tambe mester sigui exigi solucion pa e problemanan financiero cu Aruba ta enfrenta. E logronan y progreso ta di elogia, pero e retonan ta algo di atende cu urgencia mirando e panorama economico actual di Aruba y su pueblo.

Reforma ta duna su beneficio solamente ora cu esaki a keda implementa, pues e balor y peso berdadero di e reformanan no ta den e proceso, aunke esaki ta di aprecia y balora, sino den su implementacion completo y efectivo.