OM ta confirma cu sospechoso di asesinato brutal di Luz Divina Faña, A. Faña, ta ser extradita pa Aruba

Autoridadnan na Republica Dominicana ta prepara pa extradita e sospechoso di asesinato, A. Faña, pa Aruba den un caso violento cu a sacudi comunidad. A. Faña ta ser sospecha di mata su tanta y mama adoptivo, Luz Divina Paulina, den un hecho cu segun autoridadnan a ser cometi cu hopi brutalidad.

E caso a atrae hopi atencion publico den e ultimo lunanan. Informacion tocante e caso a indica cu e victima a ser hinca varios biaha den su curpa y despues e sospechoso a sconde e curpa den un freezer den su cas.

Segun informacion, despues di e crimen, A. Faña a bandona Aruba y a termina na Republica Dominicana. Riba peticion di Interpol di Aruba a inicia un buskeda, loke a conduci na cu e sospechoso a entrega su mes na autoridadnan Dominicano.

Recientemente informacion tabata circula indicando cu a cuminsa e proceso pa transporta A. Faña pa Aruba. Bon Dia Aruba a tuma contacto cu vocero di Ministerio Publico (OM), Ann Angela, ken a indica cu e extradicion ta resultado di cooperacion estrecho entre e dos paisnan. El a splica cu e proceso a ser coordina entre autoridadnan di ambos pais, sin ningun tipo di palabracion cu e sospechoso mes.

A pesar cu no tin un tratado formal di extradicion entre Aruba y Republica Dominicana, Angela a sigura cu tur dos pais a logra yega na un acuerdo riba base di consentimento mutuo. El a enfatisa cu e falta di un tratado formal no a stroba e colaboracion, ya cu e dos nacion ta mantene bon relacion.

Den e ultimo dianan, autoridadnan di Aruba a finalisa e areglo pa traslado di A. Faña. Ta spera cu investigadornan di Landsrecherche lo tuma custodia di dje asina cu e yega e isla, unda e lo enfrenta e proceso hudicial corespondiente.

Mas detaye tocante e caso y e proceso di extradicion no ta conoci.

Tabata diasabra 26 di november 2025 cu autoridadnan a haci un descubrimento impactante di un curpa hinca den un freezer na un cas na Solito. A identifica e victima como Luz Divina Faña Paulino, nativo di El Factor, Republica Dominicana, naci dia 7 di april di 1965.

A bira conoci cu e victima tabatin casi un luna cu a no a presenta na trabao na e restaurant Chalet Suisse, cu eventualmente su coleganan di trabao a tuma contacto cu autoridadnan for di dia 2 di november pa purba di haya sa kico a pasa of su paradero. Luz Divina a yega Aruba cu su 17 aña di edad, y a establece na e isla na 1991. E tabata doño di su propio cas, cu dos apartamento di huur.