Mi tin cu admiti, cu e ta masha remarcabel con economia global, y local a absorbe differente shock macro-economico, y a keda den estado relativamente “mas-o-menos”. E fase aki tabata e “appetizer” chikito, pa loke cu ta spera economia global, y esun di nos Isla stima.

For di inflacion di prijs di petroleo, pa prijs di transport di container pa Aruba, pa prijs di comestibelnan cu lo hisa mas ainda, combina cu un recesion na Estados Unidos, debi na desbalansanan grandi den mercadonan di “private credit”. En fin, ta hopi sufrimento ta warda nos lamentablemente.

Den tur esaki, nos tin cu puntra nos mes dicon analista Simon Waslander ta yega na e conclusion aki, mientrastanto, Gobierno, ATA, y CBA ainda ta indica cu tur cos ta “fine”. E columna aki lo duna un resumen cortico over full un scala di indicadornan cu ta reenforsa mi linea di pensamento.

Inflation:
 Nos wak e siman cu a pasa OECD, a indica cu inflacion na Estados Unidos lo hisa pa 4.2% den 2026, cual ta mas cu dobel e nivel cu banconan central lo ta confortabel cune. Mas preocupante ainda ta un analisis di banco di inversion Goldman Sachs, cu ta mustra cu prijs di fertilisante agriculturio a hisa ya caba cu 40%, desde e comienso di e guera entre Merca y Iran. Si prijs di fertilisante keda na e nivel aki, e ‘spill-overs’ pa prijs di productonan agricultorio lo ta bay ta inmenso mes.

Aruba lo sinti e parti inflacionario aki den forma hopi skerpi. No solamente e prijs di transporte a hisa extremamente manera a wordo raporta den e delaster simannan, pero e prijs mes di e productonan tambe lo hisa. Na nos isla bisiña Curaçao, ya caba nos a wak cu prijs di awa y coriente tambe a subi.

Recesion na Merca

Tambe nos ta wak peligernan basta grandi economico na Estados Unidos. Diferente indicadornan manera e prijs di e S&P500 stock index, pa e Walmart indicator, pa e caida fuerte den fondonan di credito na Merca, tur ta indicando cu economia Mericano no ta solamente bay slow, pero lo dal frontal den un muraya.

E Berdad cu no mag di bisa

Loke ta mas remarcabel cu tur cos, ta cu parce, cu e berdad obvio aki, cu temponan sumamente dificil ta nos dilanti, no mag di menciona dor di nos autoridadnan. Aunke ta berdad cu Cocolishi, ATA, y CBA no ta kinderdagverblijf/peuterschool pa adulto. Mi tin cu pensa si, con por ta cu pa den mi opinion tin asina un discrepancia den e delaster 2 añanan entre analisis di mi persona y esunnan di nos autoridadnan renombra.

Na fin, ora e kasteel di cristal, cual ta economia Arubiano echt cay den otro, mi ta hopi benieuwd, ken tur lo haya e culpa, na unda dedenan lo wordo punta. Personalmente, mi persona a sufri hopi den mi carera profesional dor di mi columnanan franco.

Pero porta den un manera di “Karma”, ta bon mes cu autoridadnan a boicotia’mi.

Francamente, ami pa un no lo kier ta den e postcode/omgeving mes di Cocolishi, ATA, y CBA pa e añanan binidero, ora e ‘main course’ economico dal Aruba.