Ayera den oranan di atardi, mediante un comunicado na su accionistanan, The Walt Disney Company a anuncia cu ta den proceso pa expande den region, cu intencion pa introduci un parke di Disney na Aruba.
Disney Experiences, conoci comunmente como Disney Parks, ta bay ta encarga cu desaroyo di e parke. E ta un di e tres division principal di The Walt Disney Company, funda exactamente 55 aña pasa, dia 1 di april 1971. Reflexionando riba e aniversario importante aki, e compania tin mira pa futuro cu introduccion di diferente parke den region.
“Disney Parks ya ta un marca global, stima na tur continente,” CEO Josh D’Amaro a bisa den e comunicado. “Ta ora pa nos trece e experiencia magico den nos hemisferio.”
Disney Experiences a anuncia su plan pa construi diferente parke den Latino America, incluyendo na Argentina. E idea pa Aruba ta “un parke cu tema di Caribe, unda e atraccionnan lo inclui “Pirates of the Caribbean,” un frankisia di Disney.
Por recorda cu durante campaña, lider di partido HTC, Gilbert Webb ya tabatin e idea pa trece un parke estilo Disney pa desaroya otro pilar economico pa nos isla. No ta conoci si Webb tin un rol den e plan di Disney Experiences.
