Stichting Monumentenfonds a anuncia ayera e apertura di un proyecto nobo den cual tur monumento cu ta cay bao propietario di e fundacion lo ser pinta na color blauw. Segun presidente Rousanne de Weever ta splica, e color nobo lo ta den conmemoracion di 50 aña di Aruba su Status Aparte.
E anuncio di e fundacion ta bin net despues cu pueblo a tene un Dia di Himno y Bandera particular, unda a celebra 40 aña di nos himno y bandera ademas di 50 aña di Status Aparte. Den un comunicado di prensa, e fundacion a splica cu a cuminsa cu e planificacion di e proyecto aki dos aña pasa den anticipacion di e dia nacional special. Despues di varios reunion cu stakeholders y minister di Cultura Gerlien Croes, Stichting Monumentenfonds ta anuncia cu lo cuminsa pinta Edificio Elroy Arends na augustus 2026.
Por a corda cu algun dia prome cu 18 di maart tambe a mira un cambio drastico den e color di e anker famoso na San Nicolas, cual a ser pinta color blauw den referencia na nos bandera. Sinembargo, de Weever a confirma cu e anker no ta cay bao di e proyecto di Stichting Monumentenfonds. “E anker no ta un monumento y dus no ta cay bao maneho di Stichting Monumentenfonds. E iniciativa ey ta completamente separa di e proyecto nobo aki,” e presidente ta splica.
Tampoco a bisa cual monumento lo ta siguiente riba lista, pero a confirma cu tur 18 monumento lo haya pintura nobo. Ta anticipa cu e proyecto aki lo clausura fin di aña 2027.
