E sospechoso principal den e asesinato brutal di Luz Divina Faña Paulino, A. Faña, a yega Aruba ayera mainta, marcando un paso grandi den e investigacion di e asesinato cu a sacudi comunidad.
Dos recherche di Aruba a bay busca e sospechoso na Republica Dominicana. Na su yegada CEA tabata en espera di e recherchenan hunto cu e sospechoso, kende a keda traslada pa warda di recherche na Wayaca.
E sospechoso, kende ta sobrino di e victima, a huy for di Aruba despues di e crimen y a termina na Republica Dominicana. Riba peticion di Interpol di Aruba a inicia un buskeda, loke a conduci na cu e sospechoso a entrega su mes na autoridadnan Dominicano.
Ministerio Publico (OM) anteriormente a confirma cu, a pesar cu no tin un tratado formal di extradicion entre Aruba y Republica Dominicana, ambos pais a traha hunto pa facilita su regreso. E extradicion exitoso ta subraya un cooperacion fuerte entre e dos nacionnan.
E caso a hala hopi atencion debi na su naturalesa perturbante. Luz Divina Faña Paulino a ser haya morto den su cas despues cu coleganan di trabao a tuma contacto cu autoridadnan pa motibo cu e no a presenta na trabao pa casi un luna. Investigacionnan a revela cu el a ser hinca varios biaha, y su curpa a ser haya scondi den un frishider.
E victima tabata biba na Aruba pa hopi aña. El a yega e isla cu 17 aña di edad, y a establece na e isla na 1991. E tabata doño di su propio cas, cu dos apartamento di huur.
Cu e sospechoso awor back riba e isla, ta spera cu autoridadnan por sigui cu e proceso legal, Mientras cu autoridadnan no a divulga detayenan adicional tocante e caso ainda, e yegada di e sospechoso ta ser mira como un paso crucial den e caso lamentable aki.
