Atencion y discusion atrobe encuanto salario minimo, salario mínimo pa hoben y e mínimo di ingreso necesario pa subsistencia. Esaki ta positivo, basta nos ta dispuesto pa contempla tur aspecto y no solamente esun cu ta parce importante den e debate politico momentaneo. Por observa cierto malcontento parlamentario cu e proceder di e actual ministro encarga cu asunto laboral, unda a crea e impresion, segun e criticonan, cu pronto durante e aña aki caba lo tuma medida tocante un salario minimo pa hoben. Esey no a sucede ainda y probablemente no lo tuma lugar durante e aña aki tampoco. Esey pa motibo obvio, por ehemplo e custumber sensato, di empresa pa planifica nan aña financiero desde final di e aña anterior. Cambio den estado financiero cu medida di bastante influencia no ta algo deseable.

Pero tin mas asunto. E critica parlamentario ta mustra, corectamente, riba e situacion di posible exposicion na abuso na pia di trabao di empleado hoben, entre 15 y 17 aña, cu no tin un salario minimo legal. E salario minimo general ta conta pa empleado desde 18 aña di edad, pa esnan mas hoben no tin nada regla, un deseo di hopi aña sin ningun perspectiva di keda realiza. Den e sentido aki ta comprende e critica, pero ta necesario contempla e otro motibonan pa introduci un salario minimo pa hoben. Aki nos ta tuma e origen di nos salario minimo como punto di salida. E modelo Hulandes pa esaki ta encera dos pensamento: Uno, e salario minimo ahusta na necesidad y habilidad di un hoben, cu den mayoria di caso no tin e educacion y experiencia cu ta base pa e salario minimo general. Dos, y esaki ta hopi importante: e salario minimo mas abao pa hoben mester sirbi como un incentivo pa sigui cu nan educacion, pa minimiza e problema di hoben cu ta bandona nan educacion, pa den un fase posterior di bida lamenta e decision ey y mester busca forma pa completa nan educacion profesional ora otro compromiso, por ehemplo di un propio famia y yiu, ta haci esaki un tarea hopi mas dificil.

Ta importante tambe pa mira e problema di e hoben riba mercado laboral cu cierto realismo. Di un banda e grupo di hoben entre 15 y 17 aña ta un parti minimo di e forza laboral, pero si cu e anotacion cu practicamente tur ta cay den e categoria di ‘educacion no completa’. Kico ta e respuesta gubernamental pa cu esaki? Cifra presenta pa e departamento di asunto laboral lo ta mustra riba un averahe real di salario pa hoben cu ta 73% di e salario minimo pa adulto. Hopi cerca di eventual norma legal, pero esey no por ta argumento pa keda sin introduci un salario minimo pa hoben, pasobra ta trata aki di preveni formalmente posible abuso. Esaki ta parce nos un regla general ora ta impone ley pa preveni abuso: no ta importa cuanto persona, natural o legal, ta cumpli caba cu e norma proponi, importante ta pa preveni abuso bao di tal norma. Den e sentido aki mester tabata posible pa adelanta e asunto di e salario minimo na un fecha mas pronto posible, y laga e asunto di formalizacion di educacion – obligatorio – pa e hoben cu ta traha caba, pa un proximo ronda di legislacion.

Esaki pa un motibo particular. Na e momento aki e ley di educacion obligatorio ta conta pa hoben te cu 16 aña. Pero aki tin algun asunto pa clarifica. Kico ta sucede cu e hoben cu ta bandona scol mientras ainda ta vigente e obligacion pa ta na scol? Y kico ta e instrumentonan disponible pa sigui duna educacion, aunke sea parcial, na hoben cu ta traha na e edad ey? Asina leu cu nos a comprende, no tin un respuesta satisfactorio na e pregunta aki. Esey ta obliga nos haci e siguiente pregunta: con nos ta papia di asunto strategico encuanto nos sistema di educacion, si nos no ta mira nada ainda pa remedia esaki? Talvez e pensamento ta cu e problema aki ta concerni un grupo relativamente chikito, anto por djis ignora esaki y ‘laga bida mes resolve esaki’? Si esey ta e caso y no ta mira necesidad pa cambia e situacion aki, di violacion di ley di educacion obligatorio mientras no tin actuacion, anto ainda ta persisti e situacion di posible abuso salarial contra hoben den e categoria aki; algo cu por resolve sin mester contempla e aspecto di educacion continua. Sin embargo, si esaki ta e pensamento – aunke no expresa – gubernamental, anto ta keda ainda e interogante pakico practicamente tur gobierno ta enfatiza e importancia di ‘lifelong learning’ si voluntariamente ta laga un abismo den educacion di un grupo di hoben cu supuestamente nan lo mester combati despues cu ‘lifelong learning’ despues? Den e sentido aki lo ta mihor pa opta pa aumento di e edad di educacion obligatorio te na 18 aña? Bon mira, pa mas di 30 aña nos no tin ningun control riba (grado di) educacion di e trahador importa. Lo unico cu nos tin den nos man ta e posibilidad di garantiza nos propio hobennan un mihor futuro, incentivando un educacion completo mas tanto posible.

Henter e discusion aki, cu merece debido atencion, ta bin dentro di e cuadro mas amplio di e debate encuanto salario minimo y e minimo di subsistencia (‘bestaansminimum’). Maneho gubernamental en general lo ta pa cera e ‘gap’ existente entre salario minimo y e bestaansminimum, pero aki tin varios obstaculo pa vence. Pero esey lo keda pa un siguiente Editorial.