(AFP) – Oposicion Venezolano diabierna a haci un yamado pa eleccion presidencial, notando cu e periodo legal di 90 dia pa organisa un voto pa reemplasa ex-lider Nicolas Maduro a caduca.
Den un declaracion, partido Vente di lider di oposicion Maria Corina Machado a bisa cu, cu Maduro ausente di e pais desde su captura pa forsanan Mericano den un accion dia 3 di januari, “mester convoca eleccion presidencial dentro di 30 dia di e declaracion aki.”
Ex-vice-presidente di Maduro, Delcy Rodriguez a keda huramenta como presidente interino dia 5 di januari, dos dia despues cu e lider socialista di hopi tempo, Maduro a keda transporta pafo di Venezuela pa forsanan Mericano pa enfrenta huicio na New York.
El a aparece den corte dos biaha desde e tempo ey pa responde pa acusacion di trafico di droga.
Constitucion Venezolano ta bisa cu “ausencia temporal di e presidente di e republica lo keda yena pa e vice-presidente ehecutivo pa hasta 90 dia, extendible pa decision di Asamblea Nacional pa 90 dia adicional.”
“Si un ausencia temporal dura mas cu 90 dia consecutivo, Asamblea Nacional lo dicidi cu voto di mayoria di su miembronan si mester consider’e un ausencia permanente,” segun Articulo 234 di Constitucion, cita pa Vente.
Vente a bisa cu “henter e pais y comunidad democratico internacional sa y por duna fe di” ausencia completo di Maduro for di poder.
E movida ta yega un dia despues cu manifestantenan exigiendo aumento di salario a enfrenta polis den centro di Caracas, den un señal cu e miedo cu tabata plega sociedad Venezolano bao Maduro a cuminsa baha.
Pa diabierna, 97 dia a pasa desde cu e lider autoritario di Venezuela pa 12 aña a keda captura pa forsanan special Mericano na un compleho militar na Caracas, hunto cu su esposa, Cilia Flores.
Caracas ta bisa cu alrededor di 100 persona a ser mata den e accion cu a precede su captura y e combate entre forsanan Mericano y team di seguridad di Maduro.
Parlamento Venezolano, cu tin un mayoria pro-gobierno, ainda no a discuti e convocacion di eleccion nobo.
Te awo, su enfoke ta riba reverti control estatal riba economia pa habri caminda pa mas inversion stranhero den sectornan critico di petroleo y mineria.
E reformanan ta un exigencia clave di Merca, cu ta contento di permiti circulo interno di Maduro retene poder tanten cu habri acceso na petroleo y reduci represion estatal.
Stabilidad prome
Presidente Mericano, Donald Trump a expresa satisfaccion cu Rodriguez – el a hasta yam’e “tremendo” – y a menas’e cu un destino similar na Maduro si e no haci su kier.
Papiando fin di februari, Secretario di Estado Mericano, Marco Rubio a bisa cu Venezuela “ta bay tin mester di e legitimidad di… eleccion husto y democratico,” pero a bisa cu e prioridad inicial di Washington despues di captura di Maduro ta pa garantisa stabilidad.
Rodriguez a bisa NBC News mita di februari cu e ta comprometi pa tene eleccion liber y husto, pero cu e momento lo keda dicidi como parti di un “dialogo politico.”
Maduro ta acusa di horta e ultimo eleccion presidencial na juli 2024.
Conteo di oposicion e tempo aya a mustra cu candidato di Machado, Edmundo Gonzalez Urrutia, a gana cu un margen grandi.
Conseho Nacional Electoral (CNE) a proclama Maduro ganador sin duna un splicacion detaya di voto, generando protesta masivo cu a keda reprimi cu man duro.
Partidonan di oposicion a exigi cambio den liderazgo di CNE, cu ta acusa di haci e kier di chavismo, e movemento politico funda pa e socialista fayecido, Hugo Chavez, kende tabata presidente di 1999 te 2013.
