Pa hopi di nos hobennan Arubiano, e soño ta di studia afo, haya nan diploma y despues bin back cas unda nan a crece. Sinembargo, hopi biaha e realidad cu nan ta bin topa cune no ta mesun positivo cu nan expectativa.

Prijs di vivienda leu di alcance, tiki opcion accesible y un mercado unda e bendedornan cada biaha tin mas exigencia, ta factornan cu ta deteriorando e soño di por tin un hogar propio pa henter un generacion.

E situacion aki ta forma parti di un crisis di vivienda cu pa varios aña caba Aruba ta enfrenta y medionan local, incluyendo Bon Dia Aruba, ta bin ta reporta. Recientemente, minister René Herdé a duna un presentacion den maart unda a papia tocante e necesidad di vivienda na Aruba, cual actualmente ta para na 8.000 vivienda, mientras cu solamente 360 tereno ta disponible pa construccion. Ademas, el a señala cu te ainda gobierno ta procesando aplicacion di 2013, indicando cu e necesidad ta grandemente surpasa loke tin pa ofrece. Tumando na cuenta cu un tempo atras Bon Dia Aruba a haci un investigacion di e situacion di vivienda y den esaki a sobresali cu tin problema pa busca vivienda, vivienda tabata mayormente impagable y haya tereno ta practicamente imposible, e situacion no a cambia hopi, sino mas bien empeora.

Mirando cu costo di bida tambe ta den aumento na Aruba, e crisis di vivienda riba e isla ta tuma un tono mas preocupante pa e hobennan cu kier bin nan isla back. Pa esnan cu ta biba aki caba, un parti mas grandi e entrada mester bay na cuminda y gastonan esencial, lagando menos placa pa e otro necesidadnan cu ta carga mesun importancia, cuanto mas grandi e entrada mester ta pa esnan cu lo mester cuminsa di cero.

Parlamentario Eduard Pieters di PPA a expresa e preocupacion aki, compartiendo cu e prijs den supermercadonan, pa materialnan di construccion y rond di henter e isla ta subiendo di manera significante, y ta un golpi cu e pueblo ta esun cu ta sufri.

Mas aleu cu e barera di escasez di vivienda accesible, e studiantenan cu ta bin back cas ta enfrentando otro barera mas: bendedornan cu ta poniendo rekisitonan adicional cu ta cerando e porta completamente pa un gran parti di nan. Por ehempel, a circula riba TikTok video di un hoben cu a enkontra cu un vivienda na benta pero cu e rekisito cu e pago mester ta completamente cash, sin prestamo di banco. Pa un graduado cu ainda ta cargando debe y cu apenas a drenta forsa laboral na Aruba, esaki ta practicamente imposible.

Segun data di Banco Central di Aruba, den nan analisis di e mercado residencial di Aruba, e prijs medio pa un cas na Aruba tabata na 575.000 florin caba den 2019 y desde e tempo aki e mercado a keda subi.

Y esaki ta un realidad cu hobennan cu awo ta bayendo tambe ta tumando na cuenta den nan decisionnan. Papiando cu dos hoben cu ta na caminda pa Hulanda, nan a comparti con e realidad aki ta un factor den nan plannan pa futuro. Actualmente nan ta den proceso pa bay Hulanda pa completa nan master’s y e plan inicial ta di bin back Aruba pa sigui traha. Un di nan, a termina ta tuma e decision di keda na Hulanda despues di termina su estudio pa motibo cu e pronostico no ta faborable, y ta premira cu e falta di vivienda accesible lo keda empeora, disminuyendo su opcionnan pa tin un bida adecua ora di bin back. E otro hoben, ta manteniendo speransa cu pa ora cu e mester bin back gobierno lo a bin cu solucionnan cu a mehora e situacion pa pueblo y studiantenan cu kier bin back, tanto den oportunidadnan laboral como accesibilidad di vivienda na Aruba, durante e dos aña cu e mester keda afo.

E situacion na Aruba ta precario pa pueblo y ta keda empeora, di tal manera cu nos mesun hobennan no por bin back nan cas y nos hobennan cu awo ta bayendo, ta considerando laga nan isla atras completamente pa motibo di e pronostico cu tin pa Aruba su mercado di vivienda y costo di bida.

Ta urgi un solucion pa pueblo cu ta aki y pa nos futuro generacion cu ta na caminda.