(AFP)—Despues di decadas di lucha pa haya un manera pa trata cancer di pancreas, investigadornan a desaroya varios medicamentonan nobo prometedor cu por ofrece speransa na pashentnan cu ta ricibi e diagnostico particularmente mortal aki.
Cancer di pancreas ta conoci como hopi agresivo, y apenas mas o menos un di cada dies hende ta sobrevivi mas cu cinco aña despues di ser diagnostica, investigacion a mustra.
Tasa di e cancer aki tambe ta aumentando mundialmente, specialmente entre adulto hoben. E ta proyecta pa bira e segundo cancer mas mortal, despues di cancer di pulmon, den paisnan desaroya den añanan venidero.
A pesar di magnitud di e problema aki, no tabatin “ningun progreso medico pa 40 aña,” Patrick Mehlen, un investigador na centro di cancer Leon Berard na Francia, a bisa AFP.
Pero mas financiamento y interes den e ultimo decada finalmente ta haci un “diferencia real,” el a agrega.
Mientras un cura ainda ta leu pa mayoria pashent, algun di e medicamentonan nobo por agrega algun luna precioso na nan bida.
E noticia mas celebra a bin siman pasa, ora compania farmaceutico Americano Revolution Medicines a anuncia resultado positivo pa su medicamento experimental daraxonrasib.
E medicamento ta enfoca riba un proteina yama KRAS, cual ta hunga un rol importante den crecemento di tumor.
Mitad di pashentnan cu a tuma e pildo a sobrevivi mas cu 13 luna — dos biaha mas largo cu un grupo di control cu tabata ricibi kimoterapia.
Esaki por no parce revolucionario, pero pa un cancer cu ta mata asina lihe, duplica expectativa di bida ta algo sin precedente.
“Mucho mas mihor”
Un pashent di perfil halto a papia riba con hopi diferencia e medicamento por haci.
Ben Sasse, un ex-senador for di estado Nebraska na Merca, a cuminsa tuma daraxonrasib despues cu el a ser diagnostica cu cancer di pancreas metastasico, etapa cuatro, fin di aña pasa.
“Na mitad di december mi a ricibi un expectativa di bida di tres pa cuatro luna,” e homber di 54 aña a bisa New York Times.
Despues di tuma e medicamento, “mi ta hopi mas mihor cu con mi tabata durante Pasco,” Sasse a bisa.
El a agrega cu e tabata “un medicamento fuerte,” señalando efecto secundario severo cu a causa su cara pela y sangra.
Revolution Medicines a bisa cu pronto nan lo pidi aprobacion pa e tratamento na Merca. Resultado mas detaya di e estudio fase 3 lo ser presenta na conferencia di cancer ASCO na Chicago e luna binidero.
Mientras tanto, otro investigadornan a explora maneranan alternativo pa alarga bida di pashentnan cu cancer di pancreas.
Resultado preliminar di e estudio, publica den revista Nature diaranson, a test un tratamento cu no ta destina pa elimina tumor directamente.
En cambio, e meta ta preveni celnan canceroso di cuminsa un proceso cu ta haci nan resistente na otro medicamentonan — incluyendo kimoterapia.
A test e anticurpa NP137 riba 43 pashent cu tabata ricibi kimoterapia y cu nan cancer a plama den pancreas, pero no na otro parti di nan curpa.
Comparando cu e tasa normal di sobrevivencia, pashentnan a biba varios luna mas, segun e estudio fase 1b.
“Nos ta duna hende en averahe seis luna mas — cual ta significativo pa e enfermedad aki,” Mehlen, kende a supervisa e investigacion, a bisa.
E team ta planea pa haci un otro estudio cu un muestra y un grupo di control mas grandi mas despues den aña.
Finalmente, Mehlen ta spera cu su medicamento lo no solamente alarga bida di esnan cu ta ricibi kimoterapia, pero tambe daraxonrasib.
Vacuna nobo pa cancer
Resultado prometedor di estudio tempran tambe a ser anuncia fin di siman pa un vacuna experimental pa cancer di pancreas.
E vacuna, cu ta usa tecnologia RNA mensahero cu a bira famoso durante pandemia di Covid-19, a ser desaroya pa companianan farmaceutico BioNTech y Genentech.
Durante e estudio fase 1, 16 pashent cu ya tin cancer di pancreas a ricibi e inyeccion.
Esaki a stimula celnan di sistema inmunologico pa ataca celnan canceroso den ocho pashent, di cual siete ainda tabata bibo seis aña despues.
For di e ocho pashent di ken nan sistema inmunologico no a reacciona na e vacuna, apenas dos a sobrevivi pa un tempo largo.
Estudionan fase 1 ta destina pa determina si medicamentonan ta sigur, no pa comproba si nan ta efectivo, pues ta planeando mas investigacion.
Potret ilustrativo di Freepik.
