(NLTimes) – Incertidumbre den mercadonan financiero pa motibo di e guera cu Iran ta cuminsa afecta fondonan di pension Hulandes. E tasa di cobertura di dos di e fondonan mas grandi, ABP y PME, a baha.
E tasa di cobertura ta e relacion entre activonan di un fondo di pension y balor di tur pension acumula. Cu un tasa mas abao, tin menos placa pa reparti entre e potnan di pension ora e fondo cambia pa e sistema nobo di pension.
E fondo pa empleado publico ABP su tasa di cobertura a baha for di 123,5 porciento te 119,1 porciento.
“Pa motibo di disturbio den Medio Oriente, tabata un prome kwartaal dificil,” presidente di ABP, Harmen van Wijnen, a bisa. “Januari y februari tabata bon lunanan di inversion. Pero e noticia tocante guera na Iran a hiba na caida den mercadonan financiero.”
ABP ta plania cambia pa e sistema nobo di pension otro aña. E fondo tin como meta un tasa di por lo menos 110 porciento pa ora haci e transicion. “Nos ta wak esaki hopi cerca den preparacion pa e transicion.”
PME su tasa di cobertura a baha for di 125,3 te 121,5 porciento.
E fondo di pension pa hende den industria di metal y tecnologia tambe ta culpa disturbio den Medio Oriente, aunke presidente di PME, Alae Laghrich, a agrega cu recuperacion a cuminsa caba.
“Nos tasa di cobertura ya caba a subi atrobe te aproximadamente 125 porciento. E ta refleha realidad actual, unda peaknan pa ariba y pa abao ta pasa cu mas frecuencia.”
PMT, bpfBAOW y PFZW no a comparti nan tasa reciente, pasobra nan caba a cambia pa e sistema nobo e aña aki.
Den e sistema bieu, aumento di pension tabata depende di e tasa di cobertura. Den e sistema nobo, e aumentonan ta depende di cuanto e fondonan a gana cu inversion.
