(AFP)—Un investigacion na Australia a habri audiencia publico dialuna riba un tiramento antisemitico cu a mata 15 hende durante un festival Hudiu na Bondi Beach na Sydney.
E comision real federal — e nivel mas halto di investigacion di gobierno — a ser estableci pa investiga factornan cu a conduci na e atake pa dos homber arma contra famianan Hudiu na e beach mas conoci di Australia na december.
Audiencia publico a cuminsa cu miembronan di comunidad Hudiu na Sydney cu ta spera pa papia tocante nan experiencia cu antisemitismo.
“E aumento rapido di antisemitismo cu nos a mira na Australia a ser refleha na otro paisnan Occidental y ta parce cla cu ta conecta cu eventonan den Medio Oriente,” hefe di investigacion Virginia Bell a bisa den su palabra di apertura.
“Ta importante pa hende compronde con lihe e eventonan ey por provoca expresionnan mahos di hostilidad contra Hudiunan Australiano simplemente pasobra nan ta Hudiu.”
E investigacion a ricibi miles di peticion riba e impacto di “un di e odio mas bieu di sociedad,” segun consehero cu ta yudando cu e investigacion, Zelie Hegen.
El a menciona gritonan antisemitico durante un protesta contra guera na Gaza pafor di Opera House na Sydney na october 2023, poco despues di e atake di Hamas riba Israel.
E protesta a crea miedo den comunidad Hudiu na Australia, el a bisa.
Gruponan di comunidad Hudiu a registra 2.062 incidente antisemitico den e aña siguiente.
Un “verano di teror” a mira un serie di atakenan cu candela y grafiti contra sinagoga y negoshinan Hudiu na Sydney y Melbourne, el a bisa.
Sajid Akram y su yiu Naveed ta acusa di los tiro riba famianan Hudiu cu tabata reuni na Bondi Beach pa un celebracion di Hanukkah na december, realisando e tiramento mas mortal na Australia den 30 aña.
E supuesto homber arma Sajid Akram, 50 aña, a ser tira morto pa polis durante e atake.
Su yiu di 24 aña, Naveed, un ciudadano Australiano naci aya cu ainda ta den prison, a ser acusa di terorismo y 15 asesinato.
Potret: AFP PHOTO / NSW COURTS
