Cuerpo Policial Aruba (KPA) recien a informa cu corte a sentencia un hoben di 18 aña pa 12 luna den detencion hubenil (jeugddetentie). Esaki ta bira e segundo sentencia di posesion di arma desde cu KPA a implementa un campaña nacional pa personanan entrega nan arma di candela anonimamente na dos punto di entrega riba e isla.

E sospechoso L.D.I a presenta den un “snelrecht zitting” dia 5 di mei pa su acusacion di posesion di dos arma di candela ilegal. Su sentencia a bin despues cu a el a ser deteni dia 22 di april 2025 door di e Atraco Team di KPA. Segun a splica, a para e hoben riba Green Corridor despues cu e departamento a ricibi informe cu e hoben lo por tin arma di candela ilegal den su posesion. Despues di verifica e informacion, Atraco Team conhuntamente cu Aresto Team a tene nan accion y a para e Nissan March color shinishi cu e hoben tabata maneha. Durante control di e auto a haya un arma di candela. Ambos e arma y auto a ser confisca pa autoridadnan.

Debi na e confirmacion aki, e departamento a sigui cu un investigacion na un cas na Balashi. Eynan a logra haya mas municion cual tambe a confisca.

Corte a entrega un sentencia di 12 luna den prison unda 6 di nan ta condicional. Ademas a duna e condenado 3 aña di prueba. Ademas a informa cu hues a pon’e bao supervision di Stichting Reclassering, e institucion encarga cu rehabilitacion y guia pa hobennan cu historia criminal.

E caso aki ta sigui un otro veredicto reporta envolviendo posesion di arma di candela desde cu KPA a lansa un campaña nacional yama “Entreg’e of Nos ta bin busc’e”, den cual personanan cu tin arma di candela ilegal ta encurasha pa entrega nan arma anonimamente den un baki blauw destina pa esaki. E campaña aki tambe ta conta municion of piesanan di arma of arma di candela improvisa (traha). E bakinan blauw ta situa banda di warda di polis San Nicolas y na Oranjestad, na ex-warda di polis y no tin vigilancia rond di e baki, haciendo e posible pa personanan keda completamente anonimo.

KPA a anuncia na momento di lansamento cu e iniciativa aki ta forma parti di un esfuerso interinsular den cooperacion cu College van Korpschefs y Ministerionan Publico di cu e cinco otro islanan den Reino. A splica cu e meta di esaki tabata pa duna hende oportunidad pa deshaci di nan arma di candela ilegal sin enfrenta persiguimento legal. Esaki ta forma parti di un vision di autoridadnan pa haci Aruba un lugar mas sigur.

Lansa dia 23 di maart, e campaña tabata inicialmente programa pa dura un luna, esta te 28 di april. Sinembargo, fin di april KPA a haci un anuncio cu lo prolonga su campaña pa un otro luna mas. Te awor e campaña lo dura te 24 di mei.

Sinembargo, resultado di e campaña aki no a genera gran iniciativa, y te awor a reporta cu apenas dos persona a haci uso di e bakinan aki. Na otro banda, a reporta te awor cu cinco persona a ser deteni pa posesion di arma di candela ilegal.

Homber sentencia pa 18 luna

E prome sentencia desde implementacion di e campaña nacional a envolvi e condenado T.S.C naci na Aruba cu a ser deteni pa violacion di e Vuurwapenverordening.

E caso aki a surgi dia 29 di maart 2026—ni 1 siman completo despues di lansa campaña—despues cu polis a detene un sospechoso relaciona cu posesion di arma di candela. A informa e tempo ey cu su detencion a sigui un control den vehiculo di e sospechoso, unda agentenan policial a descubri un tas cu tabata contene un pistol y municion.

Diamars dia 7 di april T.S.C a presenta na corte den un snelrecht zitting unda hues a conden’e cu un castigo di 18 luna den prison, di cual 6 ta condicional.

Huez tambe a pon’e bao supervision di Reclassering como un condicion adicional.

Desde cu a lansa e campaña, KPA ta keda recorda comunidad di Aruba tocante e oportunidad cu ainda ta existi pa personanan entrega arma di candela. Tambe ta keda enfatisa e importancia pa tin menos arma di candela ilegal riba e isla, ya cu den e ultimo añanan ta keda mira casonan di violencia den nos comunidad, specialmente entre hobennan.