(AFP) – Un idea nobo pa combati e problema hororoso di tiradornan den scol na Merca ta pa lansa un drone sin arma pa confronta e agresor, manera un insecto grandi cu ta bula rond.
E idea ta bini for di un compania yama Campus Guardian Angel, cu tin programanan piloto usando e tecnologia na Georgia y Florida, cu interes creciente na Texas. E dronenan aki ainda no a ser poni na prueba den un situacion real, sinembargo.
E maneho ta parce di refleha e parti di Merca cu ta bisa cu e manera pa aborda tiradornan recurente den scol — parti di e epidemia mas amplio di violencia cu arma den e pais — no ta cu ley di control di arma mas stricto sino mas bien cu armamento, manera duna maestro arma.
E compania ta bisa cu e maneho nobo lo traha asina: ora un posible agresor drenta un scol, un maestro ta primi un alarma riba su celular pa alerta polis y mientras oficialnan ta core pa e sitio, un drone ta ser activa for di un posicion pre-estableci den scol como prome linea di defensa.
E dronenan chikito preto y casi cuadra aki, cu ta pesa mas o menos un kilo, ta ser controla pa hende na Austin, capital di estado Texas, y realmente por bula aden di scol nabegando cu mapa 3D cu Campus Guardian Angel lo crea di antemano.
E dronenan no ta tira bala ni ningun otro tipo di proyectil.
Na luga di esey, nan ta diseña pa incapacita e agresor bulando directamente contra e of spray pepper gel riba dje.
Khristof Oborski, director di operacionnan tactico di Campus Guardian Angel, a bisa cu CEO di e compania Bill King a observa cu dronenan chikito tabata hopi efectivo den atakenan riba campo di bataya durante guera na Ucrania.
Oborski a splica cu loke e drone realmente ta haci ta depende di loke e agresor of posible agresor ta haci.
Na 2025, scolnan na Merca a sufri 233 incidente cu arma di candela, segun un base di dato yama IntelliSee.
Un di e pio tiramentonan reciente na un scol tabata na Uvalde, Texas na 2022, unda 19 mucha y dos maestro a ser tira morto. Polis a dura 77 minuut prome cu nan a logra acerca suficiente pa mata e agresor.
