Diahuebs Aruba Marine Mammal Foundation (AMMF) a publica un actualisacion riba nan pagina di Facebook tocante e recuperacion di un dolfijn ‘Charlie’ cu a keda herida. AMMF ta e fundacion principalmente encarga cu e rescate di e dolfijnnan cu a aparece cerca di canto y a pasa dia den y dia afo ta cuidando pa e dolfijn herida.

Manera e fundacion a informa, desde dialuna boluntarionan y expertonan a traha 24/7 pa duna e dolfijn un chance pa recupera. Manera Bon Dia Aruba a reporta diaranson, informacion cu nos a haya di Aruba Conservation Foundation tabata cu un dolfijn a keda atras y tabatin dificultad pa wanta su mes den awa. AMMF cu sosten di ACF tabata na e sitio unda e team tabata tuma turno pa carga e dolfijn.

AMMF a informa cu awor nan ta criando e dolfijn y cu afortunadamente e ta respondiendo bon. E fundacion ta enfatisa cu nan enfoke awor ta e bienestar di e dolfijn y lo sigui duna actualisacion durante e proceso di recuperacion.

Manera ACF a urgi den nan publicacion diamars, AMMF ta sigui subraya e importancia di percura pa un ambiente trankilo y liber di disturbio, enfatisando cu esaki ta critico pa e recuperacion di e dolfijn. P’esey e organisacion a ripiti apelacion pa publico mantene un distancia respetuoso. Segun nan ta splica, e grupo di dolfijn ainda ta den bisindario y cualkier actividad inusual por causa panico, stress y por tin efecto negativo pa nan esfuerso di rescate y seguridad.

Na mesun momento, e fundacion ta urgi pa autoridadnan coopera. Como cu dolfijnnan ta especienan protegi pa ley di Aruba, sosten y esfuerso di autoridadnan ta sumamente importante, e fundacion ta enfatisa.

Intervencion di autoridadnan tabata un punto cu a resalta den e suceso aki, unda hopi den comunidad a haci yamado pa tin mas patruya riba beachnan y protocol di rescate y seguridad pa incidentenan asina. E realidad ta cu nos beachnan ta mira trafico pisa tur dia; centenares di turista ta bishita nos beachnan pa relaha, of tuma parti di actividadnan riba/den lama manera jet ski, snorkeling, banana boat, kite/wind surf of ta pasa dia riba catamaran.

Y den areanan unda dolfijnnan sa busca refugio—esta Malmok, Palm Beach, Eagle Beach, Surfside, Southreef, Mangel Halto y Roger’s Beach manera AMMF a splica algun tempo atras—e tipo di actividadnan aki ta comun. Esaki ta crea menasa pa bienestar di dolfijn y otro bida salvahe.

Tambe ta existi e menasa crea pa personanan curioso of fascina. Manera a reporta diaranson, algun persona a purba yuda e dolfijnnan landa bay, pero AMMF (y otro organisacionnan internacional di bida marino) ta adverti cu mishi of carga e mamiferonan aki—aunke kisas cu bon intencion—ta peligroso. Maneha di dolfijnnan den condicion precario mester keda den man di expertonan manera AMMF. Tanto hende den comunidad cu ACF a adverti cu e aparicion di e dolfijnnan na costa no ta un “atraccion gratis,” pero mas bien un indicacion cu dolfijnnan ta buscando refugio, sea pa huy for di peliger, cria, descansa of recupera for di herida.

Clarificando desinformacion

Banda di nan trabao incansable, AMMF mester a tuma tempo diabierna pa clarifica desinformacion cu tabata circula riba red social. Varios figura y medio di comunicacion tabata circula informacion falso tocante e estado di e dolfijn Charlie. Un figura conoci den medio y comunidad a publica riba red social cu e criatura a fayece. Esaki a bin despues cu prome minister Mike a publica algun potret mustrando e hunto cu e team di boluntario na e sitio. Un potret tabata mustra e premier wantando e dolfijn. Varios persona den comentario—como tambe e persona conoci cu a plama desinformacion—tabata haciendo burla di prome minister su presencia na e sitio, insinuando cu pasobra prome minister a touch e dolfijn, e criatura lo fayece. Otro informacion cu tabata circula ta cu e dolfijn por a regresa lama y a reuni cu e otro dolfijnnan, y cu a calcula casi 100 dolfijn den diferente grupo. Tur esaki ta falso.

AMMF mesora a pone paro riba e desinformacion aki, clarificando cu e dolfijn ta bibo, ta recuperando y cu boluntario y expertonan ainda ta cuidando e mamifero. E fundacion tambe a condena e burla bayendo rond riba red social y yama esaki dañino pa e esfuerso di e team cu ta trahando dia den y dia afo desde dialuna pa duna Charlie e miho chance pa recupera completamente.

Ta parce cu e incidente aki a genera desinformacion, mayoria di cual a bin for di medionan di comunicacion. Ta sumamente importante pa medionan cumpli cu nan deber di ta lo mas transparente y obhetivo posible. Claro ta existi e realidad cu kisas informacion no ta inmediatamente disponible, pero esey no ta nifica cu tin espacio pa exagera detayenan di un suceso, of simplemente bisa algo cu no ta berdad.

Den e caso di Charlie, mantene publico bon informacion ta critico pa e dolfijn su recuperacion, y desinformacion ta algo cu por facilmente debilita e esfuerso di AMMF den e rescate aki. AMMF a sigura cu tur actualisacion oficial riba Charlie lo bin for di AMMF prome.

AMMF ta pidi comunidad pa priorisa e bienestar di e dolfijn actualmente recuperando y pa no stroba of causa daño na e criatura.

ACF a duna algun tip diamars, entre otro pa hende mantene distancia, evita causa disturbio cu zonido, uso di drone of actividadnan den multitud grandi. Tambe ta conseha pa mihor no acerca e zona afecta y respeta instruccion di ‘responders’ na e sitio.

Asina nos por sigura cu e dolfijn por recupera lo mas liher posible y reuni cu su grupo.