Lider di Fraccion MEP, Evelyn Wever-Croes a manda un carta fuerte na Presidente di Parlamento, Marlon Sneek (AVP), expresando su profundo preocupacion cu durante e reunion di Comision di Asuntonan Domestico di dialuna 18 di mei 2026, lo trata solamente asunto administrativo y contratonan, mientras cu asuntonan hopi mas serio y urgente ta wordo ignora.

Den su carta, Wever-Croes a pidi oficialmente pa agrega varios punto importante riba e agenda, entre nan: e incumplimento repetitivo cu Reglamento di Orde pa parti di presidente di Parlamento;

E falta di contesta di e presidente riba cartanan di miembro di Parlamento;

E falta di accion pa parti di e presidente ora gobierno no ta respeta Reglamento di Orde;

E actitud nobo di gobierno AVP-Futuro di “pick & choose”, unda ministernan mes ta dicidi cua reunion nan kier atende of no.

Segun Wever-Croes, Parlamento no por sigui actua manera cu su unico responsabilidad ta procesa papel y contrato, mientras cu problema institucional y constitucional serio ta wordo evita.

“Parlamento no ta existi pa laga cos pasa bao mesa. Nos tin un deber pa proteha dignidad, transparencia y funcionamento corecto di nos democracia,” Wever-Croes a declara.

Tambe el a exigi cu tur documento relaciona cu gasto y contratonan, incluyendo minimo tres oferta pa cada gasto, ser entrega cu suficiente tempo pa miembronan por studia y evalua nan debidamente prome cu reunion. E reunion ta poni riba agenda pa dialuna 18 di mei.

Wever-Croes a bisa cu e pueblo di Aruba merece un Parlamento cu ta haci su trabou serio, y cu no ta keda keto ora regla nan no ta ser respeta y ora institucionnan democratico ta ser debilita.

Problema amplio

Esaki no ta prome biaha cu miembronan di oposicion ta expresa preocupacion pa e situacion den parlamento, e manera di traha di presidente Sneek, y e actitud di ministernan di gobierno AVP-Futuro.

Aña pasa, varios biaha Wever-Croes a critica minister di Husticia, Arthur Dowers pa no contesta pregunta di parlamento. Na juni di aña pasa, Wever-Croes a cuestiona minister Dowers tocante un biahe di trabao na Hulanda, y a comenta cu e tempo aya caba tabatin “mas di 400 pregunta na gobierno sin contestacion.”

Y apenas siman pasa, riba su cuenta di Facebook, Wever-Croes a critica “409 dia di gobierno AVP Futuro;
0 contesta; 0 transparencia; 0 integridad.”

Hopi di e critica ta centra riba lider di partido Futuro, Gerlien Croes, kende ta fungi como vice-prome minister, minister di Relacion di Reino, Educacion, Hubentud, Deporte y Innovacion den e gabinete. E hecho cu tanto cartera ta cay bao di e mesun minister a keda resalta pa parlamentario di MEP, Xiomara Maduro, como un motibo pa precisamente pone mas scrutinio riba e minister. Den un discurso durante un reunion den Parlamento cu e minister en cuestion, parlamentario Maduro a bisa cu e minister ta encarga cu 5 cartera y esaki ta trece hopi poder cune, y cu gran poder ta bin gran responsabilidad. “Pa e motibo ey, un minister cu 5 cartera no por permiti su mes pa keda sin duna claridad,” el a expresa. “Cada dia cu Gerlien keda sin contesta, e ta bezig ta debilita democracia na Aruba,” Maduro a agrega.

Dialuna ultimo tabatin un debate den Parlamento, pa trata un peticion di dia 17 di april 2026, den cual fraccion di MEP a pidi un reunion cu minister di Enseñansa, riba tema di destaho publico den enseñansa, despues cu prensa a publica e noticia.

“Aunke nos fraccion ta aprecia cu e reunion aki a wordo yama dentro di e termino di 30 dia, tin preocupacion serio pasobra otro peticionnan anterior pa reunion cu e mesun minister aki, ainda no a wordo atendi,” Wever-Croes a bisa den un comunicado di prensa. “E peticionnan ta trata di 4 di maart 2026, peticion pa debate riba integridad y transparencia, 6 di maart 2026, peticion pa debate riba vision di e minister tocante e Gabinete di Minister Plenipotenciario y Relacionnan den Reino, 14 di april 2026, debate riba su decision pa elimina Departamento di Mucha y Hoben.

“Fraccion di MEP cu fecha di 30 april 2026, a pidi un splicacion di Presidente di Parlamento dicon e peticionnan anterior ainda no a wordo agenda, y ki tempo e tres reunionnan aki lo wordo convoca. Pero te awe e presidente no a contesta.”

Mirando e frecuencia cu cual e problema ta tumando lugar, Wever-Croes a cuestiona: “Con nos mester mira e cos aki? Ta ken ta dicidi riba e agenda di Parlamento? Ta bira cu un minister por scoge na cual reunion e kier presenta y cual no? Pasobra e Reglemento di Orde di Parlamento no ta laga espacio pa e tipo di “pick and choose” asina.”

 

“E situacion aki ta toca directamente e funcion di control di Parlamento y e principio di transparencia y bon gobernacion. Y nos fraccion kier sa si ta e ministernan ta “pick and choose” riba kico SI nan ta bin duna cuenta den Parlamento, y riba kico nan NO kier, y nos fraccion kier sa ta KEN ta determina e agenda di Parlamento”, Evelyn Wever-Croes a duna di conoce.

Segun Wever-Croes den su comunicado, durante henter e reunion, ni e minister, ni e presidente di Parlamento a duna contesta riba e preguntanan aki, lamentablemente.

Jet priva

Un di e puntonan mas contencioso di henter e asunto ta un biahe cu minister Gerlien Croes a haci na november di aña pasa, abordo di un jet priva. Pa mita aña caba, oposicion ta keda cuestiona e minister tocante pago pa e uso di e jet priva en cuestion, y aunke e minister ta insisti cu e mes a paga pa e biahe, pa motibo cu e no a presenta prueba di esaki, oposicion no ta keda satisfecho cu e contesta.

Den e mesun discurso den parlamento durante reunion cu e minister, parlamentario Maduro a bisa: “Un minister cu 5 cartera no por permiti su mes pa keda sin duna claridad y keda sin presenta e recibo di pago pa su biahe di trabao den avion priva.”
“Sinembargo nos ta mira un patronchi hopi peligroso di e minister, di cambia version, desvia atencion, culpa oposicion y presenta e cuestionamento legitimo como si fuera ta persecucion politico e ta,” e parlamentario t splica. “Si e biahe tabata pa trabou, ta con dificil e por ta pa e minister pa mustra e recibo y caba cu tur e discusion? Pakico Minister Gerlien ta insisti pa no contesta pregunta riba e biahe cu avion priva? Ta kico ta stroba e minister pa mustra e recibo?”

Di su banda, Wever-Croes a agrega den un post riba rednan social cu “minister di Enseñansa a papia un ora y mey awe y no kier a contesta 3 simpel pregunta tocante e jet priva: na ken el a paga, ki dia el a paga y cuanto el a paga. Whaw. Nunca antes mi a mira un Minister di nos pais cu asina tanto miedo pa papia berdad. Mas jammer ta cu algun Parlamentario di Futuro y AVP kier sconde e scandal aki bao di tapijt!”

“240 dia di silencio

No ta solamente partido MEP ta expresa preocupacion pa e problemanan aki. Parlamentario di oposicion Eduard Pieters (PPA) tambe luna pasa a critica e “silencio” largo den parlamento.

Den un comunicado di prensa na comienso di april ultimo, Pieters a cuestiona si “ta Parlamento ainda ta representa pueblo of ta hungando un wega pa silencia nan?”

Pieters a critica cu un peticion formal pa un reunion publico, entrega desde 3 di juli 2025, ta ignora pa mas

cu 8 luna of 240 dia, mientras Reglamento di Ordo ta stipula claramente cu e presidente di Parlamento mester convoca esaki dentro di 30 dia. “Esaki no ta un eror administrativo,” Pieters a declara. “Esaki ta un falta grave di respet pa nos democracia.”

Den un comunicado di prensa, Pieters a agrega cu “Reglamento di Parlamento no ta un sugerencia. Ta un cuadro legal, cu ta garantisa cu voz di minoria tambe ta haya oido. Ora ta cumpli cu e cantidad di sosten pa un reunion, presidente di Parlamento tin obligacion pa actua. Pero den e caso aki, a ignora e obligacion aki

completamente. Resultado? Un retraso di mas di 240 dia riba un derecho democratico basico.

“Si nos no ta respeta nos propio reglamento, con nos kier exigi respet di otro?” Pieters a cuestiona.

Fraccion PPA tambe a mustra riba e hecho cu no ta trata di un incidente isola, sino un patronchi mas amplio.

E iniciativanan di oposicion semper ta retrasa, debate publico ta limita y voz critico ta silencia, segun Pieters. Esaki ta crea un percepcion peligroso, unda cu Parlamento no ta funciona como un espacio liber

di debate, pero como un instrumento controla y maneha pa gobierno.

Situacion a bira mas serio ainda, ora cu fraccion di PPA a informa formalmente na Parlamento tocante un biahe di trabao pa Hulanda. Un biahe planifica responsablemente, mirando cu agenda tabata completamente bashi. Pero diripiente, presidente di Parlamento a manda yama varios reunion y a planea tur den e siman cu PPA no por ta presente. “Esaki no ta coincidencia, esaki ta un intento di exclusion of boycot,” segun Pieters.