Minister di Finanzas, Asunto Economico y Sector Primario, mr. Geoffrey Wever (Futuro), den cooperacion cu Minister di Asuntonan Social, drs. Melvin Wyatt-Ras y Minister President mr. Mike Eman (AVP), a inicia oficialmente cu e trabaonan pa determina un definicion nacional di pobresa (“armoedegrens”) na Aruba y pa desaroya un sistema pa midi poder di compra (“koopkrachtmeting”).

E proyecto aki ta ehecuta bao liderazgo di Minister Wever, como minister encarga cu Oficina Central di Estadistica di Aruba (CBS).

E iniciativa aki ta marca un momento historico pa Aruba mustrando vision comparti y vision continua den beneficio di e habitantenan di Aruba, segun un comunicado di gobierno.
Den e prome periodo cu Minister Geoffrey Wever tabata minister, e tabatin atencion pa e necesidad di un definicion nacional di kico ta pobresa na Aruba y a cuminsa encamina e proceso pa cu esaki. For di Staten e topico di linea di pobresa a wordo treci dilanti den e contexto di cu no mester confundi bestaansminimum como linea di pobresa.

Na 2024, riba peticion di Minister Geoffrey Wever, Commissie Bevolking en Ontwikkeling, forma e momento ey door di Centraal Bureau Statistiek (CBS) y Departamento di Asuntonan Social (DAS), como miembronan permanente di e comision, a duna conseho riba e topico aki na minister Wever, como minister encarga cu CBS, y na Minister Rocco Tjong, como minister encarga cu asuntonan social y a dicidi di sigui e proceso pa por yega na un definicion nacional di pobresa na Aruba.

Den cuadro di esaki, minister Wever a acerca Hulanda, por medio di Landspakket tema Economia, pa sondea e posibilidad pa pone e proyecto aki como parti di e Landspakket pa asina fortifica e desaroyo y monitoreo periodicamente di maneho social-economico di Aruba. Hulanda tabata dispuesto pa coopera den esaki.

Riba peticion di minister Wever, Conseho di Minister a bay di acuerdo pa añadi e proyecto aki na Landspakket tema Economia.

Den 2025 e trabaonan pa traha e plan pa e proyecto (plan van aanpak) ‘De bepaling van de armoedegrens en koopkrachtmeting voor Aruba’ a tuma lugar door di profesionalnan di Aruba y Hulanda y na final di 2025 minister Wever a presenta e ‘plan van aanpak’ ‘De bepaling van de armoedegrens en koopkrachtmeting voor Aruba’ na Conseho di Minister di Gabinete AVP-FUTURO, y Conseho di Minister di Gabinete AVP-FUTURO a bay di acuerdo cu e proyecto aki. Despues di esaki, minister Wever a haci entrega oficial di e ‘plan van aanpak’ ‘De bepaling van de armoedegrens en koopkrachtmeting voor Aruba’ na Hulanda. Awor, cu e kick-off meeting aki, e proyecto ta start y e trabao ta inicia. Hulanda a pone USD 340.000,- disponibel pa e proyecto aki y un experto tecnico di Centraal Bureau voor de Statistiek Hulanda lo asisti den e proyecto aki.

E proyecto ta di sumo importancia pa desaroyo y monitoreo di maneho socioeconomico. Durante e proyecto lo contesta e pregunta principal: Kico ta pobresa na Aruba? Pa contesta esaki mester defini e concepto pobresa y mester desaroya un metodo pa midi e prevalencia di pobresa pa Aruba periodicamente teniendo na cuenta cu, entre otro, e poder di compra y e desaroyo di poder di compra pa individuonan y hogarnan. Cu e proyecto aki lo por traha maneho mas enfoca riba e gruponan mas vulnerabel den nos comunidad door di brinda informacion obhetivo y concreto cu actualmente no ta disponible.

Durante e proceso lo traha cu varios stakeholdernan local pa asina incorpora e contexto local y relevante den e definicion nacional di pobresa. E forma di traha aki tin como meta pa crea sosten amplio y pa tene cuenta cu informacion al caso di nos sociedad pa e definicion final. Como parti di e cooperacion tecnico pa e proyecto, un experto di CBS Hulanda recientemente a yega Aruba y lo ta presente pa un periodo di un aña pa asisti cu implementacion di e proyecto.

E proyecto ta consisti di tres componente principal:

Determina e definicion di pobresa na Aruba;

Desaroya un metodologia pa midi pobresa y poder di compra;

Hancra e calculacion di pobresa na un manera structural na Oficina Central di Estadistica di Aruba.

Ta premira cu e proyecto lo wordo finalisa na 2027. Despues di esaki, Aruba pa prome biaha lo dispone di un sistema structural pa midi pobresa y monitorea e desaroyo di poder di compra.

“Prioridad di maneho economico di Gabinete AVP-FUTURO ta pa garantisa desaroyo economico cu participacion di tur hende. Ora nos sa na un manera oficial, structural y confiabel ken ta mas vulnerabel y con e desaroyo di poder di compra ta, como gobierno nos por implementa maneho cu ta mas directo y efectivo basa riba hechonan y data real,” segun minister Wever. “Esaki ta duna gobierno un miho bista y hermentnan mas efectivo pa combati pobresa na Aruba. Desde 2024 nos a implementa e “koopkrachtmodel” cu Economisch Bureau Amsterdam (EBA) a desaroya cual ta ser usa pa yuda traha y ehecuta maneho cu ta tene cuenta cu of mitiga e efecto di maneho riba e poder di compra. Cu e definicion di pobresa na Aruba y un sistema pa midi e pobresa y poder di compra na Aruba di manera structural, Gobierno di Aruba ta dispone di mas herment cual ta aporta na bon gobernacion (‘good governance’).”