Parlamentario Shailiny Tromp-Lee ta reitera e importancia di promove y protege nos dushi Papiamento

Den cuadro di e celebracion di nos idioma materno, Parlamentario drs. Shailiny Tromp-Lee ta haci un yamado urgente na comunidad, sector comercial, y instancianan gubernamental pa uni den e esfuerso pa balora, respeta y promove e bon uso di nos idioma nacional, Papiamento.

Ya for di aña 2003, Gobierno di Aruba a reconoce e balor di nos idioma door di haci Papiamento un idioma oficial banda di e idioma Hulandes, segun e ley LB 2003 no. 83. Sin embargo, Parlamentario Tromp-Lee ta subraya cu ainda tin hopi trabou pa haci pa percura cu e idioma aki haya e luga cu e merece den nos bida diario y den informacion oficial.

“Papiamento no ta solamente un medio di comunicacion; e ta un di e pilarnan di nos cultura y un elemento fundamental di e identidad di cada Arubiano,” Parlamentario Tromp-Lee a señala.

“For di den bariga di nos mama, nos a cuminsa scucha  e lenga cu nos ta papia cu orguyo. P’esey, ta responsabilidad di cada un di nos pa cuida nos dushi Papiamento.”

Un yamado pa accion den tur sector

Den e comunicado, e parlamentario ta expresa preocupacion cu ainda hopi departamento di Gobierno ta duna informacion of traha rapport solamente den idioma Hulandes of Ingles. Di mesun manera, el a enfatisa cu e sector comercial mester ta mas consciente den brinda informacion na publico den nos idioma materno, en bes di limita nan mercadeo na otro idiomanan. No solamente ta brinda respet na nos idioma, pero tambe loke bo kier informa ta keda mihor traspasa y comprondi.

Parlamentario Tromp-Lee a comparti: “Tin un movecion positivo tumando luga den nos sociedad y mi ta spera cu e sigui asina. Nos mester bira mas consciente di e forma con nos ta usa Papiamento, siña nos yiunan pa papia esaki bon y cu orguyo, y promove su uso den tur expresion artistico y comunicacion, sea oral of skirbi.”

E mensahe ta conclui cu un invitacion cordial na henter e comunidad pa keda promove y defende nos idioma, ya cu esaki ta e herencia cu nos a nace cune y lo muri cune. Nos ta pensa, soña, skirbi y papia den Papiamento. Ban nos tur hunto traha pa mantene bibo y fuerte.