(AFP) – Centenares di fanatico di Bad Bunny a para den rij largo y den e calor di Barcelona diabierna mientras e super strea Puertorriqueño ta cuminsa e parti Europeo di su tour cu lo tin 29 concierto.
Devotonan di Bad Bunny, algun cu paraplu pa proteccion contra solo, a para pafo di e ciudad Spaño su stadion Olimpico pa oranan prome cu e show diabierna anochi pa purba yega un posicion cerca di escenario.
“Nos tin 2 ora aki ta warda, pero realmente, con hopi nos tin wardando pa Bad Bunny aki na Catalonia, na Barcelona?” Reportero Adria Capdevila, di 22 aña, a conta AFP.
“Nos no sa si nos lo logra mir’e atrobe… mirando cu esaki por ta e ultimo biaha, bo ta biba cu energia maximo, entusiasmo maximo,” el a bisa.
Bad Bunny su tour mundial a cuminsa aña pasa cu un residencia di 31 concierto na San Juan den sosten di su album mas reciente, “Debi Tirar Mas Fotos,” cual ta combina musica tradicional Puertorriqueño cu reggeaton y trap.
E tour Europeo ta inclui dos anochi na Barcelona y dos na Lisbon prome cu el a bay Madrid pa 10 concierto na Atletico Madrid su stadion Metropolitano.
E tour despues lo sigui na Alemania, Hulanda, Britania, Suecia, Polonia y Italia prome cu e caba na Bruselas dia 22 di juli.
Ya caba el a tuma luga na Latino America, Australia y Hapon pero e no a duna concierto na Merca pa proteha su fanaticonan di posible operacion di autoridadnan di inmigracion.
Bad Bunny tabata e acto principal di Super Bowl Halftime Show den februari, pero sostenedornan di Presidente Mericano Donald Trump a critica su persona pa a duna concierto solamente den Spaño.
E cantante di 31 aña a sali for di escena di musica ‘underground’ na Puerto Rico y a bira un di e actonan mas grandi na nivel mudnail, yudando impulsa reggaeton y Latin trap den e industria global.
El a gana 3 Grammy na februari incluyendo e Grammy pa album di aña.
