(NU.cw) – E kitesurfer Venezolano di 41 aña, Augusto Corrente, ta desapareci desde cu el a sali for di Los Roques rumbo pa Boneiro riba un kiteboard. Kustwacht a ricibi un reportahe di desaparicion riba diasabra despues cu mama di e homber a indica cu ya tabatin varios dia cu e no tabata tende nada di su yiu.
Despues di e reportahe, Kustwacht y Korps Politie Caribisch Nederland a cuminsa un accion di buskeda. Durante e buskeda, nan a haya ekiponan di kitesurf na costa zuid di Boneiro. Mama di e homber desapareci a confirma cu e materialnan cu nan a haya ta di su yiu.
Segun autoridadnan, e homber no tabata mas riba e kiteboard. Kustwacht a informa cu e cosnan cu nan a haya ta mustra cu e kitesurfer a usa medionan di emergencia. E mal tempo y lama bruto a haci e operacion di buskeda ainda mas dificil.
Autoridadnan den Caribe ta sigui busca pa e Venezolano desapareci y ta pidi publico pa comparti cualkier informacion cu por yuda den e investigacion.
Na comienso di e aña aki Corrente a yega costa di Aruba como parti di su “ABC Proyect,” unda el a relata con el a kitesurf for di Adicora, Venezuela, y yega Aruba despues di un biahe di mas di 55 kilometer riba lama habri cu a dura dos ora y mey.
