Aruba y Hulanda lo coopera di manera mas intenso tocante e futuro di e sitio unda e refineria tabata situa na San Nicolas. E tema a bin dilanti durante un reunion na Den Haag cu presencia di prome minister Mike Eman, minister Gerlien Croes, minister Geoffrey Wever y minister plenipotenciario Mildred Schwengle, hunto cu un grupo di funcionario Hulandes di Tijdelijke Werkorganisatie (TWO) y minister di Asuntonan Economico y Clima, Heleen Herbert.
Segun gobierno, e reunion tabata enfoca riba cooperacion tecnico, apoyo strategico y posibilidadnan concreto pa desaroyo di un destino nobo pa e area di e refineria. Segun prome minister Eman, gobierno ta buscando combina e experiencia Hulandes cu conocemento local di diferente ministerio, stakeholder y instancia manera Refineria di Aruba N.V (RdA), pa asina por crea un vision realista y prometedor pa e area. “Nos a yega na compromiso cu dentro di dos siman lo presenta algun idea concreto di e direccion pa sigui y p’e expertonan aki por bishita Aruba y reuni cu nos stakeholdernan local,” e prome minister a declara
TWO ta e structura temporario di ministerio di Interior y Relacionnan di Reino cu ta ofrece apoyo na Aruba, Corsou y Sint Maarten den ehecucion di reforma acorda den e landspakketten. TWO ta traha hunto cu diferente ministerio Hulandes cu ta aporta conocemento tecnico y experticio. Hunto cu cada pais, TWO ta prepara un agenda di ehecucion pa traduci e landspakketten den proyecto, programa y reforma concreto. E agenda aki ta actualisa periodicamente y TWO hunto cu e paisnan ta presenta rapportnan tocante progreso di e ehecucion.
Minister Herbert a papia di un vision ambicioso di Aruba despues di e reunion aki. “Aruba ta considerando varios oportunidad y kier haci progreso via cooperacion,” e minister Hulandes a declara.
Tambe a papia tocante sosten di Hulanda pa e desaroyo di e sitio. Pa cu esaki, Herbert a declara cu Hulanda ta mira varios oportunidad concreto pa contribui na e transformacion economico di e area y pa sigui fortalece e cooperacion cu Aruba.
Anteriormente, prome minister Eman a declara caba e regreso di un refineria di completamente for di mesa y no ta un opcion.
E futuro di e refineria ta keda un topico politicamente sensitivo na Aruba. Desde caida di Nicolas Maduro den e accion militar Mericano, y e anuncio di presidente Donald Trump pa rebiba industria petrolero na Venezuela, atencion a cay un biaha mas riba e destino di Refineria di Aruba aunke di un banda, premier Mike Eman (AVP) a descarta un reapertura, indicando cu ta bay enfoca riba energia sostenible mientras cu di otro banda, politiconan di oposicion a mira e desaroyonan regional como un oportunidad sorpresa pa Aruba. E tempo aki segun un comunicado di prensa di fraccion MEP, e fraccion a pidi un reunion cu gobierno pa papia tocante e futuro di refineria, pa e mesun motibo cu a mira e cambionan cu tabata tumando lugar.
Tambe algun luna atras un delegacion di Eerste y Tweede Kamer Hulandes cu tabata na Aruba pa IPKO (Interparlamentair Koninkrijksoverleg) a haci un recorido extenso riba e tereno di refineria y durante e bishita, nan por a constata cu e estado di e facilidad ta un instalacion cu infrastructura di hero bieu frustia, tubonan cu a cay, structuranan cu a collapse pa falta di mantencion y areanan grandi cu ta contamina cu diferente residuo industrial manera pitch y azufro, haciendo cualkier trabao di inspeccion sumamente peligroso cu t rekeri di trabaonan di desmantelacion di varios “towers y vessels” prome.
E tempo aki minister Dowers a enfatisa cu cualkier decision pa e futuro di e refineria mester ta basa riba realismo economico, responsabilidad ambiental y obhetivonan sostenible pa Aruba. E era petrolero na Aruba ya ta pa pasado y awo mester crea oportunidadnan economico nobo y sostenibel pa futuro generacionnan.
Recientemente, durante e reunion publico pa trata e destino di e refineria, parlamento a aproba den forma unanime un mocion pa conserva e historia e refineria na Aruba. Cu esaki Parlamento a pone enfasis riba un les importante di pasado, pa no laga Lago sigui e mesun destino cu e refineria conoci como Eagle Refinery.
Cu e mocion aki a urgi Gobierno pa no solamente mira e aspecto economico of tecnico di desmantelacion di e refineria, pero tambe e dimension cultural y historico. E mocion a sugeri pa Gobierno: Conserva e parti visibel di e refineria Lago; Proteha structuranan cu tin balor patrimonial; Crea un museo, monumento of otro recordatorio permanente; Integra historia di e refineria den educacion y turismo cultural.
Sinembargo, e dialogo na Den Haag ta demostra cu e gobierno actual tin su bista riba un uso economico diferente pa e sitio, cu tanto declaracion di prome minister Eman y minister Dowers lagando cla cu e refineria lo keda den pasado y lo traha riba un uso nobo cu miho impacto ambiental y sostenibilidad pa Aruba. Den esaki, dependiendo riba e trabaonan cu lo ehecuta, Hulanda posiblemente lo hunga un rol mas grandi via experticio tecnico, cooperacion economico y sosten pa e redesaroyo di e area.
