Cuerpo Policial Aruba conhuntamente cu Ministerio Publico ayera a informa tocante e detencion di sospechoso Li-Angelo Robert Rayshen Carmona Alcantara naci na Aruba dia 26 october 2007, alias “Kuki”. Esaki ta relaciona cu e caso di tiramento cu a tuma lugar diadomingo madruga 24 di mei 2026 den e parkeerplaats di The Village.
Mas trempan den dia, polis a pidi ayudo urgente di comunidad pa yega na e sospechoso, y a adverti cu e personanan cu tin e sospechoso scondi tambe ta haci nan mes culpable na un hecho castigable y por keda deteni.
Ta sospecha Carmona Alcantara di e homicidio di Rayden K.A. Kock.
Segun Cuerpo Policial di Aruba a informa anteriormente, pa alrededor di 1:18 di marduga riba diadomingo, Central di Polis a haya un notificacion cu un hende homber a ricibi tiro y no ta reaccionando den e parking lot di Fat Tuesday.
Inmediatamente central a despacha polis y ambulance cu urgencia pa e sitio di e incidente.
Na momento cu polis a presenta na e sitio, berdaderamente a bin topa cu un hende homber cu no tabata reacciona. Na su turno, ambulance a presenta pa duna tratamento na e victima; sinembargo, lamentablemente no tabatin nada cu por a haci mas pa e persona en cuestion.
Recherche y polis tecnico a presenta pa asina por haci nan investigacion mientras cu e dokter forensico a presenta y a constata e morto di e hende homber, ken pa e momentonan ey no tabatin informacion di ken e ta.
Inicialmente, polis a bisa cu mas informacion di e victima lo ser duna na momento cu familiarnan identifica su persona. Mas adelante, a publica un actualisacion unda a informa cu e famia a reconoce e victima y a informa cu ta trata di e hoben Rayden K.A Kock, naci na Aruba dia 3 di juli na 2008, pues e victima tabatin apenas 17 aña di edad.
