Segun rapport Hulandes riba strategia pa seguridad internacional: Islanan den Reino ta keda vulnerable na cierto riesgo pa seguridad global

E siman aki minister di Asunto den Exterior di Hulanda, mr. Tom Berendsen, a entrega un rapport nobo delineando e strategia pa seguridad internacional pa 2026 te 2030. Cu e rapport aki ta haci un yamado pa Hulanda fortalece su posicion strategico den Europa memey di instabilidad geopolitico den e continente. Den relacion cu esaki, e rapport tambe ta subraya e rol strategico di islanan den Reino Hulandes y ta hala atencion riba algun riesgo di seguridad cu Caribe Hulandes ta enfrentando.

E rapport ta haci yamado principalmente pa un Europa mas fuerte dentro di NATO, urgiendo mas alocacion di financiamento den Defensa y menos dependencia riba Merca—cual pa hopi tempo tabata e mayor contribuyente di recurso pa Defensa dentro di e bloc—mientras manteniendo relacion Atlantico cu e pais Norte Americano.

Pa loke ta islanan CAS (Aruba, Corsou y Sint Maarten) y nan relevancia den e strategia nobo di Hulanda, e rapport ta reconoce e parti Caribe Hulandes como e “flank sur global” di Hulanda, enfatisando con riesgonan di seguridad di e islanan tambe ta den interes Hulandes. Na mesun momento, e strategia nobo di Hulanda no ta introduci un rol di seguridad nobo pa e islanan, ya cu e strategia di seguridad 2023-2029 ainda ta keda e marco den henter reino Hulandes cu lo sigui guia esfuersonan di seguridad den e parti Caribense di Reino.

No obstante, e rapport ta menciona algun riesgo di seguridad cu e islanan CAS ainda ta enfrenta. Esakinan ta inclui e instabilidad politico den Venezuela; interferencia stranhero via dependencia economico; menasa di cibercrimen riba infrastructura critico; riesgo di seguridad maritimo y red internacional di crimen organisa.

Instabilidad den Venezuela

Aunke e rapport ta enfoca mas riba seguridad di Hulanda den Europa, specialmente mirando e agresion di Rusia den e ultimo cuatro aña cu nan guera na Ucrania y tension dentro di NATO, Venezuela ta ser menciona como e unico pais como fuente directo di instabilidad cu por presenta menasa pa seguridad di islanan di Reino Hulandes.

Pa paisnan manera Aruba y Corsou en particular, e menasa ta mas cerca pa via di con cerca e paisnan aki ta di costa Venezolano. E instabilidad politico den Venezuela por causa un entrada creciente di inmigrante Venezolano riba e islanan.

No por keda sin menciona e ola di inmigracion for di Venezuela cu Aruba ya a experencia durante 2015 pa 2017, rond tempo cu ex-presidente Nicolas Maduro a cuminsa cu su cargo.

Un ola enorme di inmigracion riba un isla chikito manera Aruba por resulta den un crisis humanitario, cual a lo largo lo mester rekeri yudansa for di Hulanda.

Simultaneamente, conflicto politico den e pais Latino Americano por causa organisacionnan criminal di probecha di e exodo masivo di inmigrante, por medio di usa personanan desespera pa actividadnan di narcotrafico, trafico di arma y trafico humano.

Di e manera aki, organisacionnan por fortalece of expande nan operacion entre Venezuela y e islanan den Caribe Hulandes. Pa e motibo aki, e rapport tambe ta reconoce e riesgo pa seguridad maritimo cu islanan CAS ta enfrentando.

E riesgo aki ta preocupante pa Hulanda pasobra e por mina gobernacion riba e islanan, haci institucionnan corupto, explota rednan portuario y invita otro actornan menasante pa probecha di e vulnerabilidad di e islanan. Pa Hulanda, e tipo di menasanan aki no ta un asunto local mas, sino algo cu por menasante pa Reino completo.

Di e manera aki, islanan CAS ta sirbi como un alarma trempan pa menasa di seguridad proveniente di Sur America.

Interferencia stranhero

E rapport ta subraya e menasa for di influencia stranhero cu por afecta puertonan, telecomunicacion y inversion riba e islanan. Cu e mencion di e menasa aki, e rapport ta sugeri cu mucho inversion for di actornan/paisnan den exterior por crea espacio pa nan tin mas y mas influencia riba e islanan di Reino Hulandes.

E preocupacion cu inversionistanan gigante por tin influencia politico den un pais no ta algo nobo. Na Merca por ehempel, ta birando mas cla con e administracion di Trump ta faboreciendo e porcentahe chikito di personanan di ken nan rikesa ta hopi mas grandi cu salario di un famia di clase medio.

Aki na Aruba, e menasa di inversion di afo tambe ta birando un punto di discusion online, unda pueblo ta expresando mas y mas nan preocupacion tocante con inversion di afo ta afectando nos naturalesa y cultura. Alabes critica a bira mas fuerte contra gobiernonan, unda hopi ta constata cu sobredesaroyo ta principalmente causa pa mal maneho di gobiernonan durante e ultimo decadanan.

Aunke e rapport di Hulanda no ta menciona un actor of pais specifico cu ta presenta menasa riba e islanan di e manera aki, e rapport ta haci mencion di competencia geopolitico, coersion economico y operacion di influencia, entre otro. Infrastructura den Caribe Hulandes no ta puramente un asunto economico local mas, sino ta ser mira for di un lens di seguridad nacional.

Den relacion cu influencia stranhero, e rapport tambe ta punta na cibercrimen contra infrastructuranan importante di islanan CAS. Den aña 2025 vooral, Aruba a mira un ola di estafa online y casonan di ‘hacking’ cu a afecta varios institutonan gubernamental, incluyendo parlamento.

Den un entrevista cu Bon Dia Aruba fin di 2025, Hefe di Seguridad di Informacion Interino na Veiligheidsdienst Aruba (VDA), Sra. Marylin Spagnol-De Kort, a menciona cu intentonan di phishing y atakenan riba sistema di email ta birando un preocupacion creciente. Tambe a menciona uso di ‘deep fake’ pa crea informacion falso pa estafa personanan sin conocemento. E tipo di menasanan aki ta birando mas dificil pa detecta, segun el a splica.

Fuera di estafanan individual, Aruba tambe ta confrontando menasanan cibernetico cu ta bay hopi mas leu cu hacking tradicional. Esakinan ta inclui actividadnan manera “hacktivism,” den cual gruponan motiva politicamente ta stroba sistemanan of ta ataca institucionnan, y spionahe cibernetico, den cual informacion sensitivo ta ser dirigi pa propositonan strategico. E desaroyonan aki ta refleha un tendencia mundial, pero nan impacto riba comunidadnan chikito manera Aruba por ta specialmente profundo.

Notable den e rapport ta cu Hulanda tambe ta reconoce cu aunke e islanan ta enfrenta menasanan similar, manifestacion di e menasanan aki no ta sucede den un manera uniforme riba tur tres isla autonomo. Manera a subraya, Aruba y Corsou su cercania cu Venezuela ta pone e dos isla aki den mas peligro directo compara cu Sint Maarten. P’esey e rapport ta enfatisa cu mester tuma na cuenta e diferencianan entre e islanan CAS y actua den acuerdo cu e diferencianan aki.

E rapport ta mustra con Hulanda ta mirando Aruba, Corsou y Sint Maarten mas como un parti strategico di Reino cu ta keda suheto na menasanan specifico cu ta rekeri proteccion personalisa. Di e manera aki, e islanan autonomo den Reino Hulandes ta ser mira cu un lens mas geopolitico compara cu den pasado.