Recientemente, Oficina Central di Estadistica (CBS) a publica e Indice di Prijs di Consumo (CPI) pa e periodo di mei 2025 te mei 2026.

Indice di Prijs di Consumo

Den e ultimo diesdos (12) luna, e CPI a subi cu 2.1%, unda nuebe (9) di e diesdos (12) sector a registra aumento di prijs. E aumentonan cu tabatin e mayor efecto riba e CPI a ser registra pa e sectornan di “Transporte” (8.4%), “Comunicacion” (5.9%), “Cuminda y bebida no-alcoholico” (3.4%), “Restaurant y hotel” (7.4%) y “Vivienda” (1.1%) causando un efecto di respectivamente, 1.06, 0.53, 0.40, 0.38 y 0.28 ppt.

E aumentonan den e sectornan restante a contribui cu un efecto di 0.34 ppt riba e CPI di mei 2025 te cu mei 2026. E aumentonan aki a ser contraresta parcialmente door di un caida den e indice di e sector di “Mobilario” (-9.2%), cu a contribui cu un efecto di -0.81 ppt. E caidanan den e sectornan restante a contribui cu un efecto di -0.07 ppt riba e CPI di mei 2025 te cu mei 2026.
E aumento den e sector di “Transporte” a ser causa principalmente door di un aumento 12.5% den e categoria “Gasto relaciona cu uso di vehiculo di transporte personal”, causando un efecto di 0.97 ppt.
E aumento den e sector di “Comunicacion” a ser causa door di un aumento den e categoria “Ekipo di telefon y fax” (91.1%), causando un efecto di 0.53 ppt.
E aumento den e sector di “Cuminda y bebida no-alcoholico” a ser causa principalmente door di un aumento di 3.3% den e categoria “Cuminda”, causando un efecto di 0.34 ppt.
E aumento den e sector di “Restaurant y hotel” a ser causa door di aumento den e categorianan “Cuminda pafo di cas” (4.4%) y “Servicio di alohamento” (72.9%), causando un efecto di respectivamente 0.22 y 0.16 ppt.
E aumento den e sector di “Vivienda” a ser causa principalmente door di aumentonan 3.1% y 1.5% den e categorianan “Mantencion y reparacion di vivienda” y “Huur di vivienda”, causando un efecto di respectivamente, 0.18 y 0.10 ppt.
E caida den e sector di “Mobilario” a ser causa principalmente door di un caida den e categoria “Aparato pa uso domestico” (-23.8%), causando un efecto di -0.54 ppt.

Canasta di consumo

Den e ultimo aña cu a pasa 55.4% di productonan den e canasta di consumo di e CPI a conoce un aumento di prijs causando un efecto di 3.83 ppt, mientras cu 32.6% ta mustra un caida di prijs, cu a contribui cu un efecto di -1.71 ppt y pa e restante 12.0% no tabatin cambio den prijs.

E indicenan di “Bienes” (2.1%) y “Servicionan” (2.2%) a registra aumentonan, causando un efecto di respectivamente, 1.20 y 0.92 ppt riba e CPI.

Bestaansminimum
Den e ultimo diesdos (12) luna e bestaansminimum pa un hogar consistiendo di dos (2) adulto y dos (2) mucha (edad 0-14) a registra un aumento di Afl. 131, di Afl. 5,510 na mei 2025 pa Afl. 5,641 na mei 2026.

E aumento aki a ser causa principalmente door di aumentonan den e sectornan di “Cuminda y bebida noalcoholico” (Afl. 80) y “Transporte” (Afl. 27).

Cambio di prijs di petroleo, utilidad, gasolin y diesel
E prijs promedio pa bari di petroleo a conoce un aumento di US$ 40.26 (64.9%) di US$ 62.08 na mei 2025 pa US$ 102.34 na mei 2026. E indice di Energia a subi cu 5.4% den e ultimo aña y a causa un efecto di 0.87 ppt. E indicenan di “Gasolin” (18.1%) y “Diesel” (36.7%) a registra aumentonan, causando un efecto di respectivamente, 0.76 y 0.10 ppt riba e CPI.
E indicenan di “Electricidad” y “Awa” no a registra cambio, mientras cu e restante 404 bienes y servicio hunto, a conoce un aumento di 1.5% y tabatin hunto un efecto di 1.25 ppt.

Cambio di prijs di Cuminda y servicio di catering
Den e ultimo diesdos (12) luna e indice di “Cuminda & servicio di catering” a subi cu 3.7%. E indice di “Cuminda na cas” a conoce un aumento di 3.4%, unda nuebe (9) di e diesun (11) indicenan di e gruponan di “Cuminda na cas” a subi durante e periodo aki. E indice di “Berdura” a conoce un aumento di 11.3%, e aumento mas grandi entre e gruponan di “Cuminda na cas”. Ademas, otro aumentonan significante a ser registra den e indicenan di “Sucu, jam y otro tipo di cos dushi” (8.1%), “Fruta” (6.6%), “Bebida noalcoholico” (4.1%), “Restante productonan pa alimentacion” (4.0%) y “Azeta y otro productonan traha di vet” (3.3%).
E caida mas grandi durante e periodo aki a ser registra den e indice di “Batata, yuca y batata dushi” (-9.1%). E indice di “Cuminda pafo di cas” a registra un aumento di 4.4% den e ultimo diesdos (12) luna. Den e ultimo diesdos (12) luna, “Cuminda na cas” y “Cuminda pafo di cas” como grupo, tabatin un aumento di prijs di 3.7% y hunto tabatin un influencia di 0.62 ppt riba e CPI, mientras cu e restante bienes y servicio hunto a experencia un aumento di prijs di 1.8% y tabatin un efecto di 1.50 ppt riba e CPI.