(AFP) – Presidente Mericano, Donald Trump a bisa cu Iran a solicita un reunion cu ta bay tuma lugar na Qatar awe diamars, a pesar cu Teheran anteriormente a nenga cu tabatin combersacionnan tecnico planea tocante e acuerdo pa caba e guera na Medio Oriente.
E anuncio a yega despues cu Iran a tene su prome negociacion cu Oman pa maneha e Estrecho di Hormuz desde cu a firma e acuerdo entre Merca y Iran, y mientras Washington y Teheran a bay di acuerdo pa stop tur atake, cu a pone presion riba e acuerdo.
“Iran a solicita un reunion. E ta bay tuma lugar mañan na Doha!” Trump a post riba su plataforma Truth Social dialuna, sin specifica e participantenan.
Vocero di Cas Blanco, Karoline Leavitt despues a bisa Fox News cu enviado Mericano, Steve Witkoff y consehero y yerno di Trump, Jared Kushner “ta bay bula bay Doha pa reunionnan di nivel halto e siman aki.”
Un diplomatico cu conocemento di e negociacion a confirma pa AFP cu oficialnan di Merca y Iran tabata programa pa reuni na e capital Qatari pa discuti e acuerdo firma e luna aki.
“Teamnan tecnico trahando riba implementacion di e MoU ta programa pa reuni na Doha den proximo dianan,” e diplomatico a bisa den condicion anonimo.
El a agrega cu “canalnan di comunicacion crea pa desescala cualkier incidente ta na lugar” despues di e atakenan.
Vice-minister di Exterior Irani, Kazem Gharibabadi, sinembargo, a rechasa reportahenan cu combersacionnan tecnico tabata “planea pa e siman aki,” television estatal a reporta.
Sinembargo, un oficial Mericano tambe a bisa AFP cu e negociacion lo continua a pesar di e atakenan recien. “Ambos banda ta bay stop combate pa awo y barconan por move libremente” na y rond di Estrecho di Hormuz, e oficial a bisa den un email.
Negociacion di Hormuz
E ehercicio di control di Iran riba e estrecho a genera enfrentamentonan ripiti, esun mas recien yegando diadomingo trempan ora Comando Central Mericano a bisa cu a ataca 10 obhetivo militar Irani tocante “agresion Irani continuo contra transporte comercial.”
Iran a bisa cu a tuma represalia cu atakenan contra basenan Mericano na Kuwait y Bahrain.
E blokeo ta keda un punto clave den e negociacion cu Merca.
Iran y Oman tin frontera cu e estrecho, door di cual un di cinco parti di petroleo y gas natural likido di mundo tabata pasa prome cu e conflicto, y Iran a bisa dialuna cu nan a tene nan prome negociacion desde cu a firma e acuerdo.
“Durante un biahe na Muscat, a tene e prome reunion di e Comite Conhunto di Hormuz,” Gharibabadi a bisa riba X. “Mientras ta revisa e asuntonan actual relaciona na e estrecho, nos a intercambia opinion tocante maneho den futuro.”
E estrecho ta inclui awa teritorial Omani y Irani, pero bao derecho internacional di custumber, e dos pais generalmente no por blokea e paso ni cobra tarifa.
Iran a adverti diadomingo cu cualkier intento di barco pa bypass su ruta preferi door di Hormuz lo “aumenta tension” den Medio Oriente.
Iran ta insisti cu barconan transitando e estrecho pasa door di un gang cerca di su propio costa.
No tin claridad con ta bay implementa e memorandum, cu e asunto di eliminacion di mina generando malcontento Irani dialuna.
Den un declaracion conhunto despues di un reunion entre presidente Frances, Emmanuel Macron y sultan Omani, Haitham bin Tariq, Paris y Muscat a bisa cu nan lo ehecuta “operacionnan conhunto di eliminacion di mina.”
Den contesta, Gharibabadi a insisti riba X cu bao e acuerdo, solamente Iran mester conduci esfuersonan pa elimina mina y “ningun otro pais.”
“E situacion ta sensitivo y compleho. Nos ta conseha fuertemente pa Francia no complik’e mas ainda cu su provocacionnan,” el a skirbi.
Trafico a baha durante weekend despues cu un barco a ser ataca mientras e tabata transita e via acuatico diasabra, cu 29 barco di commodity crusando riba diasabra y 12 riba diadomingo, segun datonan di compania di tracking maritimo, Kpler.
Ningun barco a usa un gang sur door di awa Omani segun datonan di Kpler, mientras AXSMarine a haya cu 44 barco a stop di transmiti nan posicion publicamente.
‘Soñonan hegemonico’
E texto publica di e memorandum of understanding ta bisa cu Iran ta bay defini e futuro administracion di e estrecho den dialogo cu Oman y e otro Estadonan di Golfo, pero “den linea” cu ley internacional.
Guardianan Revolucionario di Iran a bisa cu nan ta tumando medida pa controla trafico den e estrecho, y cu lo atende barconan violando e medidanan ey hopi mas firmemente cu anteriormente.
Mohammad Mokhber, consehero di lider supremo Irani, a skirbi riba X cu tanten cu Iran maneha e estrecho, e “soñonan hegemonico” di Washington “den e region no ta bay keda realisa.”
Expertonan ta bisa cu probablemente ta bay tin mas incidente den Hormuz.
Pa Iran, “un negociacion alarga compaña pa presion controla den e estrecho por traha na su bentaha,” segun HA Hellyer di Royal United Services Institute, un think tank basa na Londres.
