Un reforma significante di ley maritimo pronto lo drenta na vigor den henter Reino Hulandes y Aruba no ta un excepcion.

Manera nos por corda, un amienda nobo na e rijkswet Schepenwet, cual ta e ley fundamental cu ta goberna seguridad di barco den Caribe Hulandes y Hulanda, a bira ley dia 4 di februari 2026 y mayoria di su provision lo drenta na vigor na Aruba dia 1 di juli.

Pa doñonan di barco, operadornan comercial, negoshinan di carga y te hasta pasaheronan diario, ta importante pa compronde e cambionan aki, mirando cu su implementacion ya ta cerca.

Schepenwet ta un ley di henter Reino, un rijkswet, cu ta crea e cuadro legal pa seguridad maritimo na tur pais di Reino Hulandes incluyendo Aruba, Corsou, Sint Maarten y Hulanda mes. E ta cubri tur cos for di certificadonan cu e barconan mester carga prome cu nabega, te na con mester haci inspeccion, y kico ta sucede ora cu un barco ta considera insigur.

Pa motibo cu Aruba ta rondona di lama y ta depende fuertemente riba trafico maritimo sea pa turismo, cargo, transporte di isla pa isla y pesca, Schepenwet ta afecta un rango amplio di hende riba nos isla di manera directo. E ley aki ta aplica na barconan comercial, di pasahero, cargo y cierto barconan mas chikito cu ta opera den awanan Arubano of bao su bandera.

E amienda recientemente haci, publica como Staatsblad 2026 no.39 ta describi den su propio introduccion cu e tin e meta di alinea e Schepenwet cu e practica actual, alinea esaki cu otro regulacionnan maritimo, promove seguridad y mehora aplicacion. E cambionan aki ta amplio, tocante riba responsabilidadnan di doñonan di barco, rekisitonan di certificado, podernan di inspeccion, investigacion di accidente y tambe castigo criminal.

Mirando e gran importancia cu e ley aki ta carga, ban tira un bista atrobe riba e cambionan mas importante cu e rijkswet ta trece dilanti cu lo tin impacto directo pa Aruba.

1. Doñonan di barco awo tin obligacionnan legal directo

E cambio cu mas importancia structural den e Schepenwet nobo ta e introduccion di un artikel nobo, cual ta Artikel 9a, unda ta pone obligacion explicito riba e doño di e barco pa prome biaha.

Bao e reglanan anterior, mayoria responsabilidad ta cay riba e capitan.

Den e ley nobo, awo ta un rekisito pa e doñonan di e barco sigura cu tin suficiente recurso y sosten pa permiti e capitan eherce tur obligacion legal abordo di e barco.

Esaki ta un cambio legal importante. Un capitan cu ta opera por ehempel un ferry di pasahero of barco di carga, ta limita den loke e por haci si e doño no provee un barco adecua pa nabegacion, ekipo di seguridad adecua of suficiente miembro den e tripulacion. Pa medio di pone e obligacionnan directamente den man di e doño di e barco, e ley ta crea un linea mas cla di responsabilidad.

Violacion na e obligacionnan aki ta carga castigo den forma di boet administrativo for di e inspectorado encarga cu inspeccion di e barconan, cu violacionnan internacional cargando castigo di boet te e di 4 categoria bao ley criminal di Aruba.

2. Un derecho nobo pa investiga accidentenan maritimo

Otro artikel cu ta keda importante cual ta introduci loke ta notablemente un prome pa e ley aki; un base legal explicito pa investigacion di accident. Manera nombra den e ley, Hoofd van de Scheepvaartinspectie awo lo tin e autoridad pa inicia investigacionnan tocante accidentenan significante cu ta involucra barco, cu e meta di establece loke a siña y determina si tin reglanan nobo necesario pa preveni mas accidente.

Crucialmente, e investigacion aki ta pinta como uno separa di cualkier investigacion criminal cu por tuma luga tambe. E proposito di esaki ta mehora seguridad, no persecucion. Esaki ta imita esfuersonan tuma den aviacion por ehempel, unda cuerponan di investigacion independiente ta analisa accident pa mehora e sistemanan, no pa stipula ken tin culpa.

Segun media local, e parti aki ta specificamente dirigi na permiti autoridadnan studia kico a bay fout despues di un accidente riba lama, un poder cu te awo no tabata ancra di manera formal den ley.

3. Reglanan mas estricto pa certificado incluyendo barconan chikito comercial

E ley nobo ta fortalece e reglanan pa cu certificadonan di seguridad di barco. E cambio nobo ta laga cla di manera explicito cu oficialnan di aduana no por otorga autorisacion pa un barco sali si e no por produci un certificado di seguridad valido na momento di haci e prome peticion.

Esaki ta duna e rekisito di certificado mas peso na momento di salida.

Un regulacion separa pero relaciona tocante certificadonan di seguridad tambe a keda publica banda di e Schepenwet nobo. E regulacion aki ta atende ki tipo di certificado ta aplica na ki tipo di barco, y ta contene reglanan specifico pa barconan comercial mas chikito, y proximamente nos lo papia tocante esaki den mas detaye.

Bao e reglanan nobo, barconan comercial di cargo di menos di 5 meter tin exencion for di e rekisito di certificado di e codigo Caribense pa barconan comercial chikito.

Mientrastanto, barconan di pasahero chikito cu si ta cay bao e codigo aki tin restriccion explicito di opera mas di 20 miya nautico leu for di un waf of refugio safe, un limite di seguridad cu awo ta stipula den e reglanan na luga di laga cada ken interpreta esaki.

4. Poder mas amplio y cla pa detene barconan

Cu e amiendanan haci, e ley ta significantemente reformula e parti unda ta trata detencion di barco (Articles 16, 17, 17a, 17b, and 17c). Inspectornan di barco awo por detene e barco no solamente ora e tin falta di certificado valido, sino tambe ora cu e doño, capitan of tripulacion no kier coopera cu un inspeccion.

Na momento cu detene un barco, e capitan ta legalmente rekeri laga e barco na e localidad designa pa e inspector y e autoridad di waf, y no por move e barco sin permiso. Di mesun manera, si e barco a keda deteni den un waf stranhero bao di e acuerdo SOLAS of uno comparable, e capitan di mesun manera ta prohibi di sali for di e waf aki.

Tambe e amienda ta haci algun actualisacion manera na un rango di referencia anticua den e ley, manera consolidacion di e terminonan stuurlieden, radiotelegrafisten, y radiotelefonisten na e termino mas amplio di oficialnan, reflehando con e rolnan riba barconan mas moderno ta organisa. Tambe a haci cambio na e partinan cu ta trata castigo criminal, cual a actualisa pa e violacionnan di e obligacionnan nobo di e doño di barco y rekisitonan di cumplimento di detencion awo keda nombra explicitamente como actonan criminal. E sentencianan maximo ta core un rango di 3 luna di detencion pa e crimen menos serio te na 2 aña den prison pa esnan mas serio, cu boet di acuerdo na e escala di Aruba su sistema di categoria penal.

E rijkswet nobo ta trece cune un cantidad di cambio cu tambe lo por sinti den practica. Pa doñonan di barco y operadornan na Aruba, e cambionan aki ta significa un formalisacion di nan obligacionnan legal. Simplemente contrata un capitan cualifica y laga tur cos den su man no ta suficiente mas. Ley awo ta explicitamente rekeri pa e doñonan provee e sosten, recurso y infrastructura cu ta permiti operacionnan safe cu ta den cumplimento di reglanan. Falta di haci esaki, specialmente haci cu intencion, por resulta den castigo pisa, y den casonan serio, responsabilidad criminal.

Pa pasaheronan, e reglanan nobo tocante limitenan operacional y rekisitonan di certificado na final lo nifica standard di seguridad mehora. E restriccion riba barconan di pasahero chikito su limite di operacion ta particularmente relevante pa Aruba su sector di turismo, unda nabegacion cu barco na rifnan cercano y destinonan cu ta leu di costa por ta algo comun.

Na mesun tempo, e hecho cu awo tin mas poder di detencion y e rekisito nobo cu oficialnan di aduana mester confirma e validez di un certificado prome cu otorga permiso pa salida, por crea atraso y esaki na su turno ta motiva doñonan mantene nan barco den cumplimento pa por brinda servicio na tempo y confiable.

Pa un isla manera Aruba, unda lama no ta djis un bista bunita sino algo cu ta di gran importancia pa turismo, mercado y bida diario, e calidad di leynan di seguridad maritimo tin consecuencia real. E ley nobo no ta cambia tur cos inmediatamente y tin varios parti cu no lo aplica inmediatamente na Aruba manera e regulacion separa pa certificadonan di seguridad. Hopi di e cambionan aki su efectividad lo depende riba con activamente lo aplica esaki.

Sinembargo, e ta kita e excuus cu tin falta di herment for di mesa y ta pone responsabilidad cla riba esnan cu ta propietario of operador di barco, mientras tambe e ta crea un fundeshi legal mas moderno pa seguridad maritimo den henter Reino.