(AFP)— Mexico a mustra su clase na e iconico Estadio Azteca diamars, venciendo Ecuador 2-0 pa kibra un maldicion di 40 aña den rondanan eliminatorio di Mundial.
E partido di ronda di 32 a keda retrasa pa un ora debi na mal tempo, y ora porfin el a cuminsa, e co-organisador a sali fuerte, lansando ola tras ola di atakenan.
Den un atmosfera electrico, Julian Quinones a duna Mexico un bentaha mereci na mitar di e prome tempo cu un tiro poderoso y despues el a prepara e gol pa Raul Jimenez.
Ecuador desesperadamente mester a recupera control di e partido despues di mitar tempo, pero nan a hay’e dificil pa aumenta nan nivel di wega, mientras Mexico a sigui controla gran parti di e encuentro.
Mexico no a gana un partido di ronda eliminatorio di Mundial desde 1986, ora e pais a organisa e torneo pa ultimo biaha.
Entrenador principal Javier Aguirre, ken ta dirigi e seleccion den un Mundial pa di tres biaha durante tres diferente periodo, a bisa cu e tabatin mester di un Scotch pa celebra despues di pone fin na decadas di decepcion.
“Mi ta un di esnan cu nunca a logra hunga e di cinco partido,” el a bisa. “Esaki a pasa cu mi na Corea di Sur y tambe na Sur Africa (ora mi tabata entrenador anteriormente).”
“Bo tin un bon fase di grupo y despues bo ta keda tranca y no por sigui avansa… pero awe tabatin un conexion enorme cu pueblo.”
Mientras celebracionnan a estaya den henter e pais, e homber di 67 aña a bisa cu e seleccion Mexicano ta “un berdadero famia”.
“Mi por bisa boso cu e equipo aki merece loke ta pasando,” el a bisa. “E conexion grandi cu e fanaticonan y hunga den Mundial.
“Awe nos ta entre e mihor 16 equipo di e torneo y nos tin hopi tempo cu e mesun equipo y ainda nos ta kere den otro. Nos ta hopi contento. Nos ta hopi concentra y nos ta un berdadero famia.”
