(ESPN)— FIFA a confirma cu e gol di empate di Croacia contra Portugal a ser anula corectamente como offside danki na tecnologia incorpora den e bala oficial di Mundial.
E cabezaso di Gonçalo Ramos a pone Portugal na un bentaha di 2-1 den e di cuatro minuut di tempo adicional, pero tabata parce cu Croacia a logra un empate dramatico nuebe minuut despues ora Josko Gvardiol a manda e bala den gol.
Ivan Perisic a manda un bala den area, cu a rebota riba Renato Veiga y a yega na Mario Pasalic. Su toke a laga e bala cla pa Gvardiol, kende a push’e den gol.
Inicialmente e gol a ser aproba riba veld, y imagennan di television tabata mustra cu Igor Matanovic di Croacia no a toca e bala ora el a purba desvi’e cu su cabes. Si tabata asina, Pasalic lo tabata onside prome cu el a prepara e gol pa Gvardiol.
Sinembargo, arbitro Espen Eskas a revisa e accion na monitor di VAR, y tecnologia incorpora den e bala Adidas Trionda di FIFA — similar na e sistema ‘Snicko’ usa den cricket — a mustra cu Matanovic si a toca e bala, aunke tabata un toke minimo. Esey a nifica cu Pasalic en berdad tabata offside.
Ora e bala tabata banda di Matanovic, repeticionnan a mustra un grafico cu un peak chikito, indicando cu el a toca e bala. E decision a pone fin na speransa di Croacia den Mundial y a manda Portugal pa e ultimo 16.
E grafico mustra pa FIFA durante repeticionnan ta similar na tecnologia usa den cricket pa determina si un bateador a toca e bala of no, pero e Connected Ball Technology ta funciona danki na un chip incorpora den e balanan oficial usa durante Mundial.
FIFA a splica e decision den un publicacion riba X:
“Segun e dato suministra pa Connected Ball Technology incorpora den e bala Adidas Trionda, e bala oficial di @FIFAWorldCup, a comproba cu hungador #20 di Croacia, Igor Matanovic, a toca e bala cu a resulta den e gol contra Portugal, permitiendo arbitro pa determina corectamente cu e tabata offside y anula e gol.”
“Sensornan IMU incorpora den e bala Trionda ta capaz di detecta cualkier toke minimo, cu ta ser mustra na televidentenan den transmision como un ‘heartbeat graphic’, dunando oficialnan un nivel di dato sin precedente pa tuma decisionnan rapido y preciso.”
