Continuando cu nos analisis di e rapport anual di Nacionnan Uni titula ‘Annual Results Report Caribbean constituent countries of the Kingdom of the Netherlands Aruba, Curaçao and Sint Maarten’, e edicion di awe ta trata maneho di migrante y refugiado na Aruba den cuadra cu compromisonan estableci pa e ‘United Nations Multi-Country Sustainable Development Cooperation Framework (UNMSDCF)’.

E topico di migrante na Aruba ta uno cu a genera hopi atencion den e ultimo añanan, debi na e olanan grandi di migrante y refugiado cu nos isla a mira—specialmente despues cu ex-presidente Nicolas Maduro a asumi poder na Venezuela. Desde e tempo ey, maneho di migrante y refugiado a bira critico pa Aruba, mirando e presion cu el a trece pa diferente sector y sociedad Arubano en general.

Desde 2024, e trabao di United Nations Country Team (UNCT) na Aruba, Corsou y Sint Maarten a ser guia pa cuarto areanan di prioridad basa riba e UNMSDCF, esta ‘Shared Prosperity and Economic Resilience’; ‘Equality, Well being and Leaving No One Behind’; ‘Resilience to Climate Change and Sustainable Natural Resource Management’; y‘Peace, Safety, Justice and the Rule of Law’ y tabata enfoca entre riba inclusion di esnan mas vulnerable, por ehempel migrante y refugiadonan.

Pa locual ta trata prosperidad comparti y resiliencia economico, e rapport di UN a atende e retonan structural mas grandi pa economia di Aruba: migrantenan indocumenta di ken nan contribucion na nos economia ta ser stroba pa sistemanan burocratico.

Pa esaki, UN via e Organisacion Internacional pa Migracion (IOM) a duna sosten pa Aruba por medio di provee guia migrantenan den orientacion legal y pa obtene permiso di trabao, yuda migrantenan regularisa nan status—esta haya afirmacion oficial tocante nan status. Pa esaki, IOM a apunta trahadornan na DIMAS pa yuda implementa e reformanan aki. IOM ta sigui boga pa reforma riba politica di permiso pa trabao pa migrantenan riba e isla.

E asistencia di IOM na DIMAS a duna resultadonan concreto pa hopi migrante. Manera e rapport a demostra, 5.936 migrante a ricibi guia riba documentacion y 2.877 aplicacion a ser proceso via DIMAS. Abogacia pa miho politica tambe a resulta den un relahacion riba e rekisitonan estricto pa migrantenan haya permiso di trabao, locual por permiti 10.000 Venezolanonan indocumenta formalisa nan empleo, e rapport ta subraya.

Aruba tambe a introduci permiso di trabao obtenible mas facilmente, derecho laboral pa famianan eligible pa esaki, permiso di trabao mas barata (‘Flex’) y un programa di reclutamento etico pa preveni explotacion den lugar di trabao.

Den sector di cuido medico, Organisacion Pan Americano di Salud (PAHO) a drenta den colaboracion cu autoridadnan di salud nacional pa avansa strategia riba malesanan no comunicable (NCD). NCD ta malesanan cronico cu no por ser transmiti na otro persona, por ehempel malesa cardiovascular, cancer, diabetes etc.

Pa migrante y refugiadonan cu ta yega Aruba, acceso ta keda un asunto crucial y ta conecta cu proteccion di migrante y refugiadonan. IOM a establece un clinica gratis special pa e gruponan vulnerable aki, unda cu a provee cuido medico y servicionan preventivo na 1.153 refugiado, migrante y localnan. IOM tambe a introduci e iniciativa di vouchernan medico, cual a permiti cuido specialisa pa 27 pashent cu a test positivo pa HIV, ademas di cuido dental urgente. Por medio di facilita cuido medico di e manera aki, e clinica a reduci e chance cu malesanan cu a keda ser haya tratamento por resulta den complicacionnan costoso pa migrantenan. E iniciativa tambe a alivia presion riba servicionan di emergencia y a duna evidencia cu a stimula politica riba inclusion den cuido medico.

Pa cuido di salud mental y sosten psicosocial, IOM su introduci un programa cu a provee servicio personalisa na 216 refugiado, migrante y nan famianan. Den e programa aki a provee asistencia pa trauma, stress y a atende e retonan di adaptacion cu hopi migrante ta enfrenta por medio di consulta den grupo of individual, esfuersonan comunitario pa duna sosten y tayernan.

E rapport a menciona un aspecto clave di e programa aki, cual tabata su integracion den cuido medico y maneho social. Di e manera aki a sigura un maneho holistico pa atende e necesidadnan di individuonan y reduci stigma cu hopi biaha ta stroba nan di busca yudansa. Maneho di proteccion a duna sosten personalisa na 655 migrante riba e isla, ofreciendo asistencia den orientacion legal, vivienda, cuido medico y educacion.

Esfuerso di asistencia humanitario tambe a resulta den material directo pa migrante y refugiadonan, segun e rapport ta mustra. Via e iniciativa ‘Nourish and Thrive’, IOM a distribui 148 voucher pa cuminsa na famianan vulnerable na Aruba. E programa Short Term Rental Support a provee asistencia cu vivienda pa 60 individuo te cu tres luna, evitando cu famianan lo mester biba den condicionnan dificil, ademas di reduci nan exposicion na violencia y explotacion. E programa di intervencion implementa pa HIAS a duna 32 hogar sosten financiero cu a permiti beneficiadonan priorisa necesidadnan esencial mientras preserva nan dignidad durante un momento dificil.

Proteccion pa muchanan migrante tabata central den e iniciativa WAW Mobiel di CEDE Aruba, unda e provee servicio di proteccion den barionan unda tin hopi famia migrante. E programa aki a logra alcansa 442 mucha y a duna nan sosten recreacional cu a fortalece identificacion trempan di necesidadnan di proteccion y reduci isolacion social.

E rapport di UN tambe a toca e sistema di asilo y proteccion di refugiado riba e isla, unda e enfoca tabata construi un sistema husto, eficiente y basa riba derecho humano.

E ‘Quality Assurance Initiative’ (QAI) di UNHCR a evalua e sistema yama ‘Refugee Status Determination’ (RSD) y e duna recomendacionnan clave na autoridadnan ora ta tuma decision tocante e status di un refugiado. UNHCR a provee un tayer cu oficialnan di DIMAS, Inmigracion y Guarda Nos Costa cu miho hermentnan pa tuma decision. Servicionan di asistencia legal tambe a reduci riesgo di detencion, deportacion y retorno. Kisas mas significante tabata e implementacion di procedemento strategico pa garantisa cu deportacionnan inhusto no tuma luga. Na januari, Hof a dicidi cu buscado di asilo na Aruba cu entrega apelacion no por ser deporta. E resultado hudicial aki a enfatisa e obligacion bao Convencion Europeo pa Derecho Humano.

Otro iniciativanan pa migrante y refugiadonan a toca educacion y asimilacion den comunidad di Aruba, unda mucha y adultonan migrante por a haya lesnan di Ingles y Papiamento pa yuda nan asimila den comunidad y e sistema educacional na Aruba. Cu ayudo di CEDE Aruba y Fundacion VeneAruba Solidaria, IOM tambe a bin cu iniciativa pa migrantenan por participa y comunica cu comunidad, via entre otro beach cleaning, actividadnan comunitario y artistico.

Pa loke ta maneho di migrante y refugiado na Aruba, e rapport a resalta Aruba su progreso den cumpli cu Metanan di Desaroyo Sostenible (SDG). Na mesun momento, e rapport ta keda enfatisa e necesidad pa inclui migrante y refugiado den mercado laboral, servicio publico y comunidad, ademas di sigura nan proteccion y derechonan.