Proteccion di medio ambiente, maneho di sushi, dumpnan ilegal, desaroyo di vivienda, bienestar di animalnan y coordinacion entre ministerionan a forma e punto central di un discusion den Parlamento durante un reunion cu prome minister Mike Eman. Durante e intercambio di opinion, lider di fraccion di MEP, parlamentario Evelyn Wever-Croes, a argumenta cu hopi di e problema cu Aruba ta confrontando no ta solamente resultado di falta di solucionnan practico, sino tambe di falta di un vision comun y un gobernacion integra.

Segun Wever-Croes, e reunion a sigui despues cu den luna di maart fraccion di MEP a solicita un debate publico riba e preocupacionnan creciente den comunidad tocante e maneho y proteccion di medio ambiente y naturalesa na Aruba. El a recorda cu e peticion original tabata pa un debate publico formal den Parlamento, cu espacio pa presentacion amplio, posibilidad pa presenta mocion y votacion. En bes di esey, presidente Parlamento a yama un “openbaar bijeenkomst”.

El a indica cu e reunion a limita intervencionnan di parlamentario na un ronda di seis minuut y cu no tabatin oportunidad pa presenta mocion ni pa logra un conclusion formal di Parlamento riba e diferente asunto cu a ser presenta. Segun Wever-Croes, esaki a limita e posibilidad pa discuti e diferente preocupacionnan den profundidad.

El a splica cu durante e reunion, fraccion di MEP a distribui e diferente temanan entre su parlamentarionan, pa cada un por enfoca riba un aspecto specifico di e problematica cu, segun nan, ta afecta tanto medio ambiente como calidad di bida na Aruba.

Un di e temanan principal tabata e situacion di sushi y e falta di un solucion structural pa e problema. Wever-Croes a expresa preocupacion cu, a pesar di diferente accion di limpiesa cu ta ser organisa regularmente, e problema di sushi ta sigui ripiti. Segun e parlamentario, e enfoke actual ta principalmente reacciona ora cu un problema ya a surgi, en bes di evita cu e situacion lo ripiti den futuro.

Den e mesun contexto, el a indica cu su fraccion a trece dilanti tambe e preocupacion pa dumpnan ilegal cu ta sigui aparece na diferente parti di Aruba sin cu tin un solucion duradero pa combati e fenomeno. El a expresa cu limpiesa periodico ta importante, pero cu esey so no ta suficiente si no tin un sistema permanente di mantencion, control y aplicacion consistente di reglamentacion.

Otro punto cu Wever-Croes a indica cu fraccion di MEP a trece dilanti tabata e situacion di Serlimar. Segun e parlamentario, gobierno ta pone demasiado enfasis riba participacion di empresa priva den diferente actividadnan relaciona cu maneho di desperdicio, mientras cu Serlimar, cual ta e compania estatal cu tin e responsabilidad principal pa recogemento di sushi, no ta ricibi e atencion cu fraccion di MEP ta considera cu e merece.

Wever-Croes tambe a toca e impacto di decisionnan gubernamental riba algun sector economico. El a menciona e industria di ATV y UTV, indicando cu e sector aki tabata un contribuyente importante na recuperacion economico despues di pandemia di COVID-19. Segun e, hopi empresario y trahadornan den e sector a inverti den nan negoshi y a contribui na actividad economico den un periodo dificil pa Aruba.

Durante su intervencion, parlamentario Wever-Croes a amplia e discusion mas aleu di solamente medio ambiente. El a indica cu diferente situacion cu a bin dilanti durante e reunion ta mustra un patronchi cu ta punta na un falta di coordinacion entre ministerionan y falta di un direccion comun dentro di gobierno.

El a argumenta cu ministernan hopi biaha no ta actua como parti di un solo gabinete y cu responsabilidadnan no semper ta ser asumi di manera cla. Segun Wever-Croes, gobernacion efectivo ta exigi cooperacion continuo entre diferente ministerio, particularmente ora decisionnan ta afecta mas cu un sector.

E tema di cacho y pushi riba caya tambe a bin dilanti durante e reunion. Wever-Croes a indica cu e problematica aki ta sigui preocupa un gran parti di comunidad. El a remarca cu su gabinete a laga un proyecto cu financiamento cla pa aborda e situacion, pero cu gobierno actual a scoge pa no sigui dilanti cu e iniciativa ey.

El a señala cu e resultado ta cu e problema ta sigui presente den diferente bario, afectando tanto seguridad vial como bienestar di animalnan. Segun Wever-Croes, e situacion ta exigi un plan sostenibel y coordinacion entre diferente autoridadnan.

Otro aspecto cu e parlamentario a considera importante tabata e disponibilidad di tereno pa construccion di casnan. Wever-Croes a subraya cu hopi hoben Arubiano cu kier construi nan propio cas ta confronta dificultad creciente pa logra esaki.

E lider di fraccion di MEP a referi na e planificacion espacial di Aruba y a señala cu un porcentahe significativo di teritorio nacional ya tin algun forma di proteccion. El a recorda cu basa riba e tres aspecto di ROPV, natuurgebied, natuurgebied en landschap y landelijk gebied, 54% di e pais ta protegi.

El a enfatisa cu e discusion no mester concentra solamente riba e pregunta si mas area mester ser proteha, sino tambe riba con e 46% di e area restante por ser uza di un manera responsable pa crea oportunidadnan di vivienda pa futuro generacion.

El a subraya cu e reto principal ta haya un balansa entre proteccion di naturalesa, desaroyo economico, turismo y necesidad di vivienda. El a enfatisa cu ningun di e obhetivo aki mester exclui e otro.

Segun Wever-Croes, gran parti di poblacion ta di acuerdo cu naturalesa mester ser proteha y cu Aruba mester keda limpi. Na mesun momento, el a indica cu desaroyo economico y creacion di oportunidadnan di trabao tambe ta esencial pa futuro di e isla.

El a argumenta cu gobernacion efectivo no ta consisti den pone comunidad scoge entre naturalesa, economia, turismo of vivienda, sino den crea un balansa entre tur e interesnan legitimo cu tin den sociedad.

Durante su intervencion, Wever-Croes a sostene cu gobierno mester evita faborece un solo grupo di interes na costo di otro. El a remarca cu decisionnan grandi mester ta basa riba un vision nacional cu tene cuenta cu e diferente necesidad di comunidad.

Segun e parlamentario, logra e balansa ey ta exigi liderazgo, vision strategico y curashi pa tuma decisionnan cu ta pensa riba termino largo. El a expresa su opinion cu precisamente e elemento ey falta den e manera cu diferente asunto ta ser maneha pa e gobierno actual.

Na final di su intervencion, e parlamentario a dirigi su comentario directamente na prome minister Mike Eman den su funcion como lider di gabinete. Segun Wever-Croes, e responsabilidad principal di prome minister ta pa percura cu decisionnan importante tocante medio ambiente, naturalesa, desaroyo y planificacion ta ser coordina entre tur ministerio relevante.

El a argumenta cu gobierno mester consulta cu comunidad prome cu tuma decisionnan cu tin impacto grandi riba sociedad y cu e decisionnan ey mester forma parti di un vision nacional amplio, no simplemente di reaccionnan na situacionnan individual.

Segun Wever-Croes, liderazgo no ta ser midi solamente riba declaracionnan publico, sino riba e capacidad pa uni diferente sector di comunidad, coordina e trabao di gobierno y duna Aruba un direccion cla pa futuro.

El a conclui cu e diferente preocupacionnan cu a trata durante e reunion, incluyendo medio ambiente, sushi, dumpnan ilegal, bienestar di animalnan, vivienda y desaroyo economico, finalmente ta punta na un solo reto cu, segun MEP, ta e necesidad di mas liderazgo y un gobernacion mas integra. Segun e lider di MEP, tanto pueblo, naturalesa como e pais mes merece un maneho cu ta basa riba coordinacion, vision a largo plaso y decisionnan cu ta busca un balansa entre desaroyo y proteccion.