(NLTimes)—Gobierno Hulandes a declara oficialmente cu e pais ta enfrentando un escasez real di awa, Ministerio di Infrastructura y Maneho di Awa a anuncia. Comite Nacional di Coordinacion pa Distribucion di Awa (LCW) a recomenda gobierno pa subi e nivel di alerta. Autoridadnan y companianan di awa potabel ta considerando diferente medida pa distribui e awa disponibel, aunke ainda no ta cla kico e medidanan ey lo ta.
Dia 1 di juli, LCW — un colaboracion entre Rijkswaterstaat, e organismo di maneho di awa y otro autoridadnan cu ta encarga cu maneho di awa — a subi e situacion pa nivel 1, cu ta indica un escasez di awa inminente. Awor Hulanda ta na nivel 2, cu ta un escasez real di awa. Nivel 3 ta considera un crisis di awa.
Ministerio a enfatisa cu ainda tin suficiente awa potabel disponibel. E conseho ta bisa pa sigui usa awa potabel conscientemente y cu moderacion.
Ta anticipa cu e escasez di awa lo afecta transporte maritimo, industria y agricultura prome. Barconan ta hayando mas dificultad pa nabega cu nivel di awa abou y no por carga mesun cantidad di carga manera normal, pa evita cu nan ta keda pega den fondo. Fabricanan no por basha tur awa di friamento den riunan, pasobra riunan cu menos awa ta calenta mas rapido. Ademas, diferente region a prohibi agricultornan di usa awa di superficie pa iriga nan cultivonan.
Segun un vocero di Rijkswaterstaat, e subida pa nivel 2 ta afecta principalmente e consultanan entre autoridadnan. “Lo bira mas facil pa aplica cierto medida, specialmente si nan ta afecta mas cu un region,” e vocero a splica.
Nivel di awa den riunan a sigui baha.
“Den algun region, dijknan ta seco caba,” e vocero di Rijkswaterstaat a bisa. “E situacion no a mehora den e ultimo simannan y probablemente tampoco lo mehora mucho den e proximo simannan.”
Como posibel medida, ministerio a menciona e uso di damnan den riunan y e preparacion di pompnan adicional. E dam den riu Lek cerca di Hagestein por habri un tiki mas pa laga mas awa dushi core pa e parti west y pusha awa salo atras.
