(AFP)—Siguridad alimentario y nutricion di muchanan a mehora den henter e Franha di Gaza, pero e situacion ta keda fragil pasobra apenas un punto di entrada pa yudansa humanitario ta habri, Programa Mundial di Cuminda (WFP) di Nacionnan Uni a bisa diahuebs.
E organisacion cu ta basa na Roma a nota “un mehoracion den siguridad alimentario y nutricion di muchanan den henter e Franha di Gaza”, pero a adverti cu “e progreso, impulsa principalmente pa mihor acceso na yudansa humanitario di cuminda, nutricion, agricultura y salud, ta keda fragil.”
“Mientras acceso pa drenta Gaza a mehora, apenas un punto di entrada – Kerem Shalom/Abu Salem – den sur di Gaza ta habri, limitando e fluho di articulonan esencial,” WFP a bisa den un comunicado.
Segun e organismo, tin un aumento “considerable” den yudansa di cuminda y nutricion desde cu a alcansa e acuerdo pa stop combate na october di 2025.
A parti paketenan di cuminda na aproximadamente 1,5 miyon persona na mei, mientras cu casi 700.000 persona a ricibi asistencia financiero y 60% di muchanan bou di cinco aña a ricibi apoyo nutricional.
Hefe di yudansa di Nacionnan Uni, Tom Fletcher, a pidi luna pasa pa habri tur e puntonan di entrada pa Gaza y pa kita inmediatamente e restriccionnan Israeli riba entrada di articulonan manera ekipo medico y combustible.
WFP a bisa cu tin prome señalnan den Franha di Gaza cu produccion local di cuminda “por ser reestableci na luganan unda agricultornan y criadornan di bestia por haya acceso na tera di cultivo, insumonan agricola, recursonan productivo, apoyo veterinario y otro servicionan esencial manera energia pa irigacion.”
E organismo a señala evidencia den sector ganadero, “unda e cantidad di carne a aumenta cu 33% den areanan unda apoyo a sigui wordo brinda.”
Pero WFP a adverti cu “esaki solamente por yega te cierto punto sin kita e restriccionnan riba loke por drenta Franha di Gaza.”
E guera di dos aña entre forsanan Israeli y e movemento Islamico Palestino Hamas a causa daño severo na e sector agricola di Gaza.
Mas cu 70% di e teranan di cultivo na Gaza no ta accesibel, y apenas 3% actualmente ta utilisabel, segun WFP.
