Recientemente, Oficina Central di Estadistica a publica Indice di Prijs di Consumo pa luna di Juni 2026. E CPI pa luna di juni 2026 (111.98) a registra un aumento di 0.1% compara cu e indice di luna di mei 2026 (111.90).

E cambio di e CPI pa e ultimo diesdos (12) luna (juni 2025 te cu juni 2026) ta 2.4%, un aumento di 1.8 punto di porcentahe (ppt) compara cu e periodo corespondiente di aña pasa (0.6%).

E promedio anual (ultimo 24 luna) di e tasa di inflacion pa e periodonan di juni 2024 te cu juni 2025 y juni 2025 te cu juni 2026 ta 0.5%. Esaki ta representa un caida di 0.4 ppt compara cu e cambio promedio di 0.9% registra durante e periodo anterior di 24 luna (juni 2023 te cu juni 2024 y juni 2024 te cu juni 2025).

Durante luna di juni 2026, seis (6) di e diesdos (12) sector a registra aumento di prijs. E sectornan cu tabatin e mayor impacto riba e CPI tabata “Mobilario” (5.0%), “Transporte” (1.0%) y “Restante bienes y servicio” (1.1%), contribuyendo respectivamente cu 0.39, 0.14 y 0.13 ppt. E aumentonan den e sectornan restante a contribui hunto cu 0.11 ppt na e CPI di juni 2026.

E aumentonan aki a wordo parcialmente contraresta, principalmente door di un caida den e indice di e sector “Comunicacion” (-3.8%), cu a contribui cu -0.36 ppt na e CPI. E caidanan den e sectornan restante a contribui hunto cu -0.33 ppt na e CPI di juni 2026.

E aumento den e sector di “Mobilario” a wordo causa principalmente door di aumentonan di 8.1% y 16.9% den e categorianan “Aparato pa uso domestico” y “Herment y ekipo pa cas y hardin”, causando un efecto di respectivamente, 0.14 y 0.13 ppt. E aumento den e sector di “Transporte” a wordo causa door di un aumento den e categoria “Gasto relaciona cu uso di vehiculo di transporte personal” (2.2%), causando un efecto di 0.19 ppt. E aumento den e sector di “Restante bienes y servicio” a wordo causa principalmente door di un aumento di 2.7% den e categoria “Cuido personal”, causando un efecto di 0.11 ppt.

E caida den e sector di “Comunicacion” a wordo causa door di un caida di 32.8% den e categoria “Ekipo di telefon y fax”, causando un efecto di -0.36 ppt.