E rol di Aruba Tourism Authority (ATA) den un proyecto relaciona cu maneho di desperdicio ta keda un tema di debate publico y politico. Den cuadro di e discusion aki, parlamentarionan di fraccion di MEP, Evelyn Wever-Croes y Rocco Tjon, a presenta na juli un peticion formal basa riba Landsverordening openbaarheid van bestuur (LOB), cu meta pa haya acceso na documentonan y informacion relaciona cu preparacion, seleccion y contratacion rond di e proyecto.
E peticion LOB, fecha 14 di juli 2026, a ser dirigi na Minister di Turismo, Transporte y Labor, Wendrick Cicilia. E solicitud ta enfoca particularmente riba documentacion cu por duna mas claridad tocante e manera cu ATA tabata involucra den e proceso y riba e base di decisionnan cu a ser tuma.
E asunto a haya atencion bastante atencion den e ultimo tempo y a genera debate tocante e participacion di ATA den un proyecto di maneho di desperdicio, incluyendo preguntanan tocante su competencia, e proceso di seleccion y e base legal pa celebra un eventual acuerdo cu un empresa priva. E peticion LOB ta busca documentacion cu por contribui na un bista mas completo di e proceso.
Segun e carta, durante un reunion anterior den Parlamento cu minister Cicilia, e parlamentarionan ya a solicita acceso na diferente documento relaciona cu e iniciativa, tumamento di decision, conseho, destaho y formacion di contrato. Nan ta indica cu e informacion solicita no a ser entrega na e momento ey, motibo door di cual nan a entrega un peticion bao di LOB.
Entre e documentonan solicita tin e peticion oficial di gobierno na ATA pa inicia e proyecto, incluyendo carta, e-mail, memo y otro comunicacion por escrito. Tambe nan ta pidi corespondencia entre ATA y gobierno, anotacion y decisionnan di reunion, y tur solicitud pa proposicion, incluyendo eventual Request for Proposals, cu ATA lo a manda na Serlimar y Ecotech.
Ademas, e peticion ta inclui proposicion, ofertanan y documentacion cu ATA a ricibi di Serlimar, Ecotech of otro partido relaciona cu e proyecto. Atencion particular ta bay pa documentonan huridico. E parlamentarionan ta solicita conseho legal, opinionnan huridico y evaluacionnan interno cu ta trata e autoridad di ATA pa drenta den un acuerdo cu un empresa priva pa un proyecto di maneho di desperdicio.
Tambe nan kier haya documentacion cu ta indica riba ki fundamento legal ATA por actua den un area cu, segun formulacion di e peticion, por cay pafor di su competencianan regular.
E solicitud ta inclui ademas rapport y conseho di expertonan tecnico, evaluacionnan di proposicion, guia di puntuacion, recomendacion y decisionnan relaciona cu seleccion y otorgamento di e proyecto. Cualkier otro documento cu tin relacion directo of indirecto cu tumamento di decision, seleccion, contratacion y ehecucion di e proyecto tambe ta forma parti di e peticion.
E parlamentarionan a solicita pa e informacion ser entrega preferiblemente den forma digital. Si tin documentonan cu legalmente no por ser publica, nan ta pidi pa gobierno indica e base legal pa esaki y, unda ta posible, entrega e partinan cu si por ser haci publico.
