Dialuna anochi Donkey Sanctuary Aruba a comparti a noticia lamentabel cu e burico “Bubu” a fayece. Bubu tabata un burico reconocibel—pa via di un masa di cuero cu e tabatin riba su lomba—pa varios persona den diferente bario, incluyendo Sabana Basora, Rooi Prikichi y Santa Cruz.

A informa cu diasabra e santuario di burico a ricibi un yamada cu un burico a keda envolvi den accidente cu auto. Ora a yega na e sitio di accidente, a mira cu el a keda den condicion critico y a hib’e urgentemente na e santuario unda un veterinario a bin pa examin’e. Bon Dia Aruba a tuma contacto cu e santuario pa mas informacion tocante e incidente aki, unda e santuario di burico a afirma cu na momento cu auto a dal Bubu el a bula cay riba suela. Su heridanan probablemente tabata inclui sangramento interno, segun e organisacion a bisa. Aunke e tabatin den condicion critico, tratamento cu e tabata hayando a cuminsa mustra prometedor. Despues di varios ora, e burico stima den comunidad a logra para y cuminsa cana rond. Tambe el a cuminsa come tambe, pues su rescatistanan a keda cu speransa cu e lo haci un recuperacion completo.

Diadomingo tampoco no a reporta ningun caida den su salud, pues a sigui trat’e y a keda atento cu ne. Sin embargo, pa dialuna su condicion a deteriora bastante. E santuario a conta den su publicacion riba Facebook cu e criatura tabata den hopi dolor y a pesar cu e veterinario a traha duro pa salb’e di su heridanan, e medicamento no tabatin efecto mas riba Bubu. Pa e motibo aki, e santuario a tuma e decision doloroso pa pon’e drumi y pone fin na su sufrimento.

Despues cu a anuncia e incidente y e fayecimento di Bubu, varios den comentario a duna palabranan di condolencia y a recorda momentonan cu nan a topa Bubu den bario y tambe a comparti varios potret cu nan tin cu e burico. Otro tambe a conta di momentonan precioso unda nan por a duna e criatura cuminda of carici’e. Un comentario a relata con Bubu tabata un bishitante frecuente na su cas: “Bubu (of Bencho manera nos tabata yam’e) a bishita nos pa hopi aña (15) pa su snacks y awa fresco. Sigur nos lo sinti su falta.”

Donkey Sanctuary Aruba tambe a recorda di nan historia cu e burico famoso di Aruba. Manera nan a conta den nan publicacion, nan conoce Bubu ya pa 20 aña caba ora el a scapa cu un otro burico yama Sabana Basora (awor yama Chewy) for di un cura. Nan a conta cu e tempo ey a yama Bubu “Alto Vista.”

Finalmente “Alto Vista” a yega na Tamarijn cerca di Rooi Prikichi unda el a yama e bisindario cas—y unda a cuminsa yam’e Bubu. Aki ta unda e comunidad a siña stima e burico parandero, e organisacion a bisa.

Unda cu e bay, e tabata haya amor y atencion for di su bisiñanan, ken tabata duna e y su amigonan (otro buriconan cu tabata cana cu ne) awa, cuminda y snacknan. Segun e santuario ta conta, Bubu tabata gusta mango y casho y semper tabata sa unda pa haya nan. Ademas di parandia cu otro buriconan, e tambe tabata tin dos amigo cacho y hasta un gay, segun e organisacion ta relata.

Pa un tempo Bubu tabata keda na e santuario situa Bringamosa, Santa Cruz, el a keda libera pero semper tabata parti di nan famia, e organisacion a afirma.

Potretnan ta di Donkey Sanctuary Aruba.