Reapertura di frontera aereo entre Aruba y Venezuela a trece speransa pa hopi hende, particularmente pa comunidad Venezolano na Aruba y entre famianan cu tin lasonan na ambos pais. Sinembargo, despues di e anuncio oficial y e fecha menciona pa reapertura, ainda no tin vuelonan comercial directo disponibel y tampoco a sigui informacion concreto tocante ki ora nan lo cuminsa.
Gobierno di Aruba a indica cu reapertura di conexion aereo cu Venezuela lo tuma lugar den fase. E intencion comunica tabata pa cuminsa cu vuelonan comercial, y despues lo sigui cu vuelonan no-comercial.
E anuncio a ser ricibi positivamente, despues cu pa hopi aña trafico aereo directo entre Aruba y Venezuela tabata cera. Pa hopi hende, specialmente Venezolanonan cu ta biba na Aruba, esaki a crea expectativa cu finalmente lo bira posibel pa bolbe biaha directamente entre ambos pais.
Pero te awe, e realidad ta otro.
A pesar cu a papia di reapertura y di un proceso den fase, no tin vuelo comercial directo anuncia cu publico por reserva entre Aruba y Venezuela. Tampoco tin un itinerario publico, fecha concreto pa prome vuelo, frecuencia, ni informacion definitivo tocante cual aerolinea lo opera e conexion.
E ultimo informacion di gobierno a indica cu e proceso lo cuminsa cu aviacion comercial, pero desde e anuncio ey no a sigui informacion adicional cu ta duna claridad tocante e implementacion practico.
Pa comunidad, e diferencia entre habri frontera oficialmente y realmente tin un vuelo disponibel ta importante. Mientras cu no tin aerolinea cu ta ofrece ticket, un schedule confirma of un fecha di inicio, e reapertura ainda no ta representa un cambio practico pa e persona cu kier biaha.
Y ta aki unda e speransa inicial ta cuminsa disparce, y decepcion ta cuminsa crece.
Pa hopi Venezolano na Aruba, un vuelo directo no ta simplemente un facilidad mas pa biaha. Tin famianan cu ta separa, hende cu tin mayor, yiu of otro sernan stima na Venezuela y cu actualmente mester busca rutanan alternativo pa yega aya. Un biahe cu antes por tabata relativamente cortico, actualmente por implica escala, mas gasto y mas tempo.
P’esey e anuncio di reapertura a carga un peso emocional grandi. Hende a cuminsa pensa atrobe riba e posibilidad di bishita famia, atende asunto personal of simplemente bolbe tin un conexion mas directo cu nan pais.
Pero sin informacion adicional, e expectativa cu a ser crea ta keda colga den aire.
Ta comprendibel cu reapertura di un ruta internacional ta rekeri coordinacion. Aerolineanan mester tin permiso, autoridadnan di aviacion civil mester cumpli cu diferente procedemento y tambe tin aspectonan operacional, migratorio y di seguridad cu mester ser regla. Ademas, condicionnan na Venezuela por tin influencia directo riba e proceso.
Sinembargo, falta di informacion ta laga espacio pa incertidumbre.
Si e prome fase ta consisti di vuelonan comercial, e pregunta awor ta unda e fase ey ta para. Tin aerolineanan cu ya a solicita permiso? Tin un fecha tentativo? Tin ruta cu ta ser negocia? Of tin circunstancianan cu a causa atraso?
Te na e momento aki, publico no tin contesta concreto riba e preguntanan aki.
Tambe ta importante pa aclara cu reapertura di frontera aereo no ta elimina automaticamente rekisitonan migratorio. Un persona cu ta biaha pa Aruba ainda mester cumpli cu e condicionnan di entrada aplicabel. E reapertura simplemente ta crea e posibilidad pa reestablece conexion aereo directo ora vuelonan comercial realmente cuminsa opera.
Relacion entre Aruba y Venezuela tin lasonan historico, comercial y familiar profundo. P’esey cualkier desaroyo tocante frontera entre ambos pais naturalmente ta haya hopi atencion. Despues di añanan sin vuelo directo, anuncio di reapertura tabata un momento importante y pa hopi hende un señal cu un periodo nobo tabata na caminda.
Pero un anuncio solamente no ta suficiente pa e persona cu kier cumpra un ticket y biaha.
Awor cu e fecha 1 di augustus ya a pasa, necesidad pa comunicacion claro ta bira mas importante. Si e proceso ta sufri atraso, publico mester sa. Si negociacionnan ta andando, esey tambe por ser comunica. Y si ainda no tin fecha pa inicio di vuelonan comercial, claridad riba esaki por evita cu expectativa ta sigui crece sin un base concreto.
Gobierno a anuncia reapertura di frontera aereo y a splica cu e proceso lo tuma lugar den diferente fase, cu vuelonan comercial como prome paso. Sinembargo, mientras cu e vuelonan aki ainda no ta disponibel y no a sigui ningun informacion adicional tocante progreso di e proceso, incertidumbre ta keda. Pa hopi hende cu a ricibi e anuncio cu entusiasmo y speransa, awor e expectativa ta simplemente pa haya claridad: unda e proceso ta para, kico ainda mester pasa y ki dia e prome vuelo comercial entre Aruba y Venezuela lo bira realidad.
