Entrante awe, 12 di augustus, automobilistanan na Aruba lo paga considerablemente mas pa yena nan tanki di gasolin. Gobierno a anuncia cu prijs di gasolin unleaded-premium ta subi cu 25,1 cen pa liter, pasando di Afl. 2,658 pa Afl. 2,909, casi Afl. 3 pa liter.
E prijs nobo ta pone gasolin na un di su nivelnan mas halto di ultimo añanan. Pa compara, na augustus di 2025 gasolin tabata costa Afl. 2,289 pa liter, mientras cu na februari di e aña aki e prijs ainda tabata Afl. 2,136. Cu e aumento aki pa Afl. 2,909, prijs di gasolin a subi considerablemente den transcurso di 2026, poniendo mas presion riba gasto diario di famianan.
Diesel ta conoce un aumento ainda mas grandi. E prijs ta subi cu 29,7 cen, di Afl. 2,566 pa Afl. 2,863 pa liter. Kerosin tambe ta aumenta cu 19,4 cen pa Afl. 2,566 pa liter. E prijsnan oficial ta inclui BBO, BAZV y BAVP.
E impacto di e prijsnan nobo por bay mas leu cu solamente e costo na pomp. Cu diesel tambe aumentando, negoshinan cu ta depende di transporte, entrega y vehiculo comercial por enfrenta gastonan operacional mas halto. Esaki ta pone atencion awor riba si e aumento di combustible lo refleha tambe den prijs di producto y servicio na Aruba.
