OECD: Aruba ta progresa den transparencia fiscal, pero mester mas evidencia di aplicacion den practica

Aruba a registra progreso den su esfuersonan pa fortalece transparencia fiscal y intercambio internacional di informacion. Sinembargo, ainda tin varios aspecto cu e isla mester demostra cu ta funciona efectivamente den practica. Esaki ta sobresali den e rapport mas reciente di Organisacion pa Cooperacion y Desaroyo Economico (OECD), publica den luna di juni. E rapport ta analisa con Aruba a atende recomendacionnan haci den evaluacionnan anterior y con e sistema ta funciona ora otro paisnan solicita informacion fiscal.

E resultado ta pinta un imagen di progreso, pero tambe di supervision continuo. Aruba a introduci varios cambio importante den su legislacion y sistema regulatorio, incluyendo un registro pa Ultimate Beneficial Owner (UBO), e eliminacion di e structura di Aruba Exempt Company, cambionan relaciona cu bearer shares y mehoracionnan den e manera con peticionnan internacional pa informacion ta ser trata.

Pero OECD ta pone enfasis riba un punto importante: implementa e ley ta solamente e prome paso. Aruba mester por demostra cu e reglanan ta funciona den practica.

Aruba su rating general di e evaluacion anterior ta “Largely Compliant”. E evaluacion di juni 2026 no ta un evaluacion nobo completo ni ta cambia e rating aki. Contrario, e ta sigui monitorea con Aruba ta atendiendo e recomendacionnan cu a ser haci anteriormente.

Segun OECD, Aruba a haci progreso importante, pero ainda tin recomendacionnan cu ta den proceso di ser atendi. Den algun area, e legislacion a ser cambia, pero OECD ainda kier mira evidencia tocante con e cambionan ta ser implementa y ehecuta.

Esaki ta haci e rapport relevante pa Aruba, pasobra e enfoke internacional ta move cada biaha mas for di solamente “tin un ley” pa “e ley ta funciona?”

Un di e areanan mas importante den e rapport ta e identificacion di Ultimate Beneficial Owners (UBO), of e personanan natural cu finalmente ta doño di of tin control riba un compania.

Aruba a introduci un UBO register cu ta ser manteni pa Camara di Comercio. E sistema a drenta na vigor dia 1 di januari 2023, y companianan existente mester a registra nan UBO. Pa companianan nobo tin tambe un obligacion pa registra e informacion den un periodo specifico.

OECD ta reconoce e introduccion di e registro manera un paso importante pa aumenta transparencia.

Pero e organisacion ta desea mas informacion tocante con e sistema ta funciona den practica. Aruba lo mester por demostra cuanto entidad ta registra, con grandi e nivel di cumplimento ta, y si e informacion den e registro ta corecto y actualisa. OECD kier mira tambe con Aruba ta supervisa y ehecuta e obligacionnan di registracion.

Esaki ta importante pasobra un registro di UBO ta solamente efectivo si e informacion den dje ta completo y confiabel. Si un compania cambia di doño of control, e informacion mester ser actualisa, y e autoridadnan mester por verifica si e informacion ta corecto.

Otro cambio importante ta e eliminacion di e Aruba Exempt Company (AVV).

Aruba a elimina e structura aki como parti di e reformanan pa alinea su sistema cu standardnan internacional. E AVV existente mester a converti pa otro forma legal prome cu januari 2024.

Aruba a haci tambe cambionan pa elimina “bearer shares” (un seguridad di capital cu ta pertenece na ken ta posee e certificado di accion di papel). E tipo di accion por haci e identificacion di doño mas dificil, pasobra e posesion di e accion por determina ken ta ser considera doño.

OECD ta considera e reformanan manera progreso, pero ta desea evidencia di e resultado concreto. Aruba lo mester por informa, entre otro, cuanto AVV a ser converti, disolvi of likida y con e proceso relaciona cu bearer shares a ser implementa. OECD kier tambe sa si tin caso caminda companianan no a cumpli cu e reglanan y si tin medida di aplicacion cu a ser tuma.

Atrobe, e tema ta e mesun: Aruba a cambia su legislacion, pero awor mester demostra cu e cambionan ta funciona.

OECD ta evalua tambe e disponibilidad di informacion di contabilidad di companianan. Aruba a introduci cambionan legal pa sigura cu buki, documento y otro informacion di companianan cu a ser likida of disolvi por keda disponible durante un periodo di dies aña.

OECD ta considera e cambio un paso positivo, pero ta bisa cu Aruba ainda mester demostra con e reglanan ta ser supervisa y ehecuta den practica.

Pa autoridadnan fiscal internacional, esaki tin importancia. Si un pais pidi informacion tocante un compania cu a stop di existi, Aruba mester por haya e documentonan relevante y entrega nan.

No tur resultado di e evaluacion ta relaciona cu puntonan cu mester mehora. OECD a subraya cu Aruba ta mustra progreso den e intercambio internacional di informacion fiscal.

Segun e rapport, durante e periodo di evaluacion, Aruba a ricibi 17 peticion pa informacion di otro paisnan y a manda 12 peticion mes pa informacion na otro hurisdiccionnan.

Aruba a duna contesta final y completo den 88% di e peticionnan cu a ser ricibi. Cinco otro miembro di e Global Forum a duna feedback tocante nan experiencia cu Aruba, y OECD ta bisa cu e feedback tabata generalmente positivo.

E velocidad di contesta tambe a mehora. Aruba a duna respuesta final den 90 dia den 82% di e casonan y den 180 dia den 88%.

OECD ta considera e recomendacion tocante e rapidez di intercambio di informacion manera provisionalmente atendi, suheto na validacion mas detaya.

Esaki ta un di e areanan caminda e evaluacion ta mustra claramente cu Aruba ta avansando.

Un area cu ta keda bao di atencion ta e uzo di poder di autoridadnan pa obliga un entidad entrega informacion cu ta ser pidi.

Aruba a fortalece su proceduranan y a introduci cambio legal, incluyendo un politica di 2025 tocante boet pa falta di entrega di informacion. Pero OECD ta bisa cu Aruba no a duna suficiente evidencia concreto tocante con e poder aki a ser uza den practica ni estadistica suficiente tocante e sancionnan aplica.

Pa e proximo evaluacion, Aruba lo mester duna mas informacion tocante e uzo di e poder aki y e sancionnan.

E punto aki ta ilustra e reto principal cu OECD ta pone dilanti di Aruba: no ta suficiente pa tin e instrumento legal; mester por demostra cu autoridadnan ta uza e instrumento efectivamente ora ta necesario.

E organisacion no ta califica Aruba manera un paraiso fiscal, ni tampoco ta señala cu Aruba ta facilita labamento di placa. E evaluacion ta enfoca exclusivamente riba cumplimento cu e standard internacional pa transparencia y intercambio di informacion fiscal riba peticion.

E rating di Aruba ta keda “Largely Compliant”, un rating cu ta bin for di e evaluacion anterior. E rapport di monitoreo di 2026 no ta reemplasa e rating aki cu un rating nobo.

Den e rapport di juni 2026, OECD ta inclui e reaccion oficial di Aruba riba su evaluacion, cual a ser adopta originalmente na november 2025.

Den su reaccion Gobierno di Aruba a reconoce e progreso cu e pais a haci den transparencia y cooperacion fiscal. Gobierno ta considera e rating di “Largely Compliant” manera un refleho apropia di e situacion actual y ta indica cu e ta compromete pa sigui traha riba e recomendacionnan pendiente.

Pa Aruba, e rapport di 2026 ta mustra progreso, pero ainda tin trabao pa haci. E isla a introduci varios reforma importante pa fortalece transparencia fiscal y intercambio di informacion. Awor e reto ta pa demostra cu e cambionan aki ta funciona efectivamente den practica. OECD lo sigui evalua cumplimento, supervision y disponibilidad di informacion, mientras Aruba lo presenta su proximo evaluacion na 2028.