(AFP)—Fanaticonan di Bonnie Tyler a para banda di caminda den un suburbio na zuid di Gales diasabra pa rindi nan ultimo homenahe, mientras caha di morto di e cantante a ser transporta pa su cas prome cu su entiero.
Tyler, principalmente conoci pa su potente y emotivo cancion di amor Total Eclipse of the Heart, a fayece den hospital na Portugal luna pasa. E tabatin 75 aña. E lo ser dera dialuna despues di su entiero den ciudad di Swansea, cu lo ta un celebracion di su bida cu asistencia di famia y amigonan.
Miles di persona a reuni riba cayanan di Mumbles pa mira e procesion cu a transporta su caha di morto pa su cas, un periodista di AFP a constata. E multitud a cuminsa bati man y canta Total Eclipse of the Heart mientras e procesion tabata pasa door di e pueblo costero na banda zuidwest di Swansea.
Algun persona a tira flor riba e auto di funerario cu tabata transportando su caha di morto, cu tabata cubri cu bandera di Gales y acompaña pa un potret di e cantante.
Carys Edwards, un hoben di 18 aña, tabata entre esnan cu a sali hunto cu su mama. El a describi e leyenda Gales como “un inspiracion pa tur hende”.
“Su musica a toca hopi hende, specialmente ami,” el a bisa. “Mi ta basta sorprendi di cuanto hende a bin awe, pero na mesun momento no, pasobra e tabata un icono asina grandi.
“Ora nos a tende cu el a fayece, e tabata un dolor grandi pa nos tur. Nos a yora.”
Mama di Edwards, Melanie Smith, di 53 aña, a agrega: “Mas importante cu tur, e tabata un mucha muher di Swansea, y nunca el a lubida esey.”
‘Rindi nos respet’
Tyler, kende su nomber real tabata Gaynor Hopkins, a nace y crece den un pueblo tradicional di mineria di carbon na noordwest di Swansea. Den añanan reciente e tabata parti su tempo entre zuid di Gales y Portugal. Cu su stem caracteristico, su cabey blond desordena y eyeliner preto, Tyler tabata inmediatamente reconocibel como reina di baladanan potente di añanan 1980.
El a logra fama internacional den e decada ey cu lansamento di su mega-exito Total Eclipse, cu a yega na prome lugar riba listanan musical tanto na Merca como Gran Bretaña. Despues di su morto dia 8 di juli, su famia a informa cu el a fayece como resultado di un enfermedad no specifica pa cual e tabata ricibiendo tratamento. Su morto a provoca homenahenan di streanan di musica y cine, y tambe di otro figuranan rond mundo.
Su morto a bin apenas algun luna despues cu el a ricibi tratamento den cuido intensivo y a ser poni den coma induci despues di un operacion intestinal di emergencia.
Michael Bone, di 58 aña, y su pareha Alan Hawkins, di 54 aña, a biaha for di centro di Inglatera pa Mumbles “pa rindi nos respet”. “Pa mi personalmente, ta pasobra durante mi añanan di adolescencia su musica tabata hopi popular. Pa mi, su periodo mas iconico tabata den añanan 1980,” Bone a bisa.
