(AFP)—Presidente Mericano Donald Trump a vota via post den e primaria Republicano di Florida cu a tuma luga diamars, a pesar cu el a condena repetidamente e practica como corupto y ta presiona pa limita su uzo prome cu eleccion intermedio di november.
Registronan electoral di Palm Beach County cita pa medionan Mericano ta mustra cu Trump a solicita un stembiljet fin di juli y a debolbe esaki siman pasa pa e eleccion den e estado cu el a adopta como su residencia.
Durante añas Trump a sostene, sin evidencia, cu voto via post ta altamente vulnerabel pa fraude, relacionando esaki repetidamente cu su afirmacion falso cu e eleccion presidencial di 2020 a ser horta for di dje.
“Stembiljetnan via post ta inherentemente corupto,” el a bisa durante un discurso tocante seguridad electoral na juli.
Cas Blanco a bisa cu no tin contradiccion, pasobra Trump tabata pafo di Florida, y a señala na excepcionnan inclui den legislacion cu e presidente ta promove pa limita e practica.
“Manera Presidente Trump a bisa, SAVE America Act tin excepcionnan di sentido comun pa Mericanonan uza stembiljet via post pa motibo di enfermedad, incapacidad, servicio militar of biahe, pero voto universal via post no mester ser permiti pasobra e ta altamente susceptibel pa fraude,” vocero di Cas Blanco Olivia Wales a bisa AFP.
“Manera tur hende sa, e presidente ta residente di Palm Beach y ta participando den eleccion di Florida, pero obviamente e ta biba principalmente na Cas Blanco na Washington DC. Esaki no ta noticia,” el a bisa.
Funcionarionan di Cas Blanco ta bisa cu Trump no tabata den estado di Florida pa varios luna.
Ley di Florida ta permiti cualkier votado registra y eligibel solicita un stembiljet via post, aunke e estado controla pa Republicanonan a haci reglanan tocante identificacion y maneho di stembiljet mas estricto den añanan reciente.
Mientras tanto, Trump ta presionando Congreso pa aproba SAVE America Act, cu lo impone rekisitonan mas estricto pa identificacion y ciudadania y limita drasticamente voto via post. Su gobierno tambe ta pidi Corte Supremo pa reactiva partinan di un decreto ehecutivo tocante proceduranan electoral cu cortenan inferior a blokia.
No ta prome biaha cu Trump ta uza un sistema cu e regularmente ta critica.
El a vota via post na Palm Beach County na 2020 y atrobe durante un eleccion special na Florida mas tempran den aña. Despues di e ultimo voto, Trump a defende su decision di vota asina mientras e tabata pafo di e estado, pero a reafirma su oposicion general contra e practica.
“No, mi ta kere cu voto via post ta un cos teribel,” el a bisa. “Mi ta kere cu si bo vota, bo mester bay personalmente.”
Primaria di Florida ta inclui e competencia Republicano pa sucede Gobernador Ron DeSantis, kende no por postula pa un otro periodo debi na e limite di mandato. Trump ta apoya congresista Byron Donalds.
