Un accidente di watersport involucrando un famia na Aruba un biaha mas a pone atencion internacional riba seguridad den awanan di Aruba, cuatro aña despues cu un mucha muhe Mericano di 13 aña a perde su bida durante un actividad di tubing.

Afortunadamente, e biaha aki e resultado tabata diferente.

Segun CBS News Miami, lifeguard di Hollywood Beach, Marcelo Lorenzo tabata di vakantie cu su famia na Aruba na momento cu, dia 11 di augustus, el a observa un float transportando su tata, primo y tanta dal den un catamaran.Lorenzo, kende tabata cerca, inmediatamente a bula den awa y a cuminsa rescata su famia.

CBS a reporta cu Lorenzo a haya su tata atrapa bao di e catamaran. El a logra hal’e hiba un trapi y den seguridad. Su tanta a sufri un herida na su brasa, y Lorenzo a improvisa un slig usando un life vest. Su primo tabata fo’i tino, loke a rekeri pa Lorenzo manten’e riba awa.

Despues, Lorenzo a bisa CBS News cu su respuesta tabata casi automatico, usando e training cu el a ricibi como lifeguard profesional.

Su famia a keda na Aruba recuperando di e accidente na momento di e reportahe di CBS, y tabata spera di ta ok. Mientras tanto, Ciudad di Hollywood, Florida, tabatin plan pa honra Lorenzo pa su accionnan durante su reunion di Comision di Ciudad dia 26 di augustus.

E storia aki ta, principalmente, tocante un accidente potencialmente devastador cu a termina cu e victimanan na bida – y di un lifeguard cu training kende pa suerte tabata precisamente den e lugar corecto na precisamente e momento corecto.

Pero pa Aruba, e circunstancianan tambe a trece back memorianan dificil.

Un tragedia cu Aruba a experencia caba

Na maart 2022, turista Mericano di 13 aña di edad, Cassidy Murray a fayece durante un paseo di tubing mientras e tabata di vakantie na Aruba cu su famia.

Su tata, Dave Murray despues a describi e accidente publicamente.

Segun e relato reporta anteriormente pa Bon Dia Aruba, tata y yui a bay tubing cu compania di watersport, Fun 4 Every 1. Como 5 minuut den e paseo, Cassidy a cay den awa. Su tata ta bisa cu e boto a bira rond pa recupera Cassidy, pero e operador a perde control, y e boto a dal Cassidy mientras e tabata purba di landa back yega e tube. El a muri di su heridanan.

Ministerio Publico di Aruba na final no a haya suficiente evidencia di un delito criminal, y no a persigui e operadornan involucra den e caso. Famia di Cassidy despues a lanta e Cassidy Murray Foundation, destina pa yuda hoben y famia anda cu perdida tragico.

E tragedia tambe a produci cuestionamento na Aruba tocante regulacion di watersport.

Na februari 2023, politico di PPA e tempo ey, Natalie Geemandi publicamente a cuestiona ki standard di seguridad a keda introduci despues di morto di Cassidy. Entre e preguntanan tabata si mester a rekeri boto recreacional pa tin un di dos persona – un “spotter” – banda di e capitan, si e personal mester tin training di prome auxilio, y ki regla tabata existi pa preveni situacionnan peligroso involucrando boto cu ta tow tube na velocidadnan halto cerca di otro boto.

E preguntanan ey ta particularmente relevante awo pasobra subsecuentemente, Aruba a introduci varios cambio pa atende precisamente e tipo di preocupacionnan aki.

Aruba a reforsa maneho di watersport

Na 2024, Minister di Naturalesa e tempo ey, Ursell Arends a anuncia un maneho temporal di watersport despues di añas di preocupacion tocante actividad den loke gobierno a describi como “hot zones” pa watersport.

Segun gobierno di e tempo ey, keho y incidente a alcansa un punto unda no por keda garantisa seguridad den e condicion existente. Gobierno a referi specificamente na incidentenan devastador cu a pone Aruba den un posicion delicado internacionalmente, y a cita morto di e turista jong como un di e eventonan cu a lanta pregunta tocante e standardnan bao cual operadornan di watersport tabata funcionando.

E proceso en realidad a cuminsa tiki despues di morto di Cassidy. Na april 2022, gobierno a stop temporalmente tur aplicacion pa permiso nobo pa watersport mientras autoridadnan tabata examina seguridad, impacto ambiental, capacidad di carga y seguridad den e sector. Eventualmente, Conseho di Minister a aproba un maneho temporal na mei 2024, cu a drenta na vigor dia 1 di juni di e mesun aña.

A desaroya e maneho cu input di varios autoridad y organisacion, incluyendo Directie Scheepvaart, DIP, DOW, Wardacosta, Polis Maritimo, Aruba Tourism Authority y AHATA.

Importante ta cu seguridad tabata forma un di su pilarnan principal, hunto cu reemplaso y expansion di operacionnan di watersport.

Un di e cambionan mas significante tabata un rekisito cu, cuminsando dia 1 di januari 2025, botonan comercial di watersport mester ta ekipa cu propeller guard. Pa actividadnan acuatico involucrando transporte di pasahero riba boto, e maneho tambe ta rekeri un di dis empleado di e compania di watersport abordo pa proposito di seguridad. E di dos persona aki ta fungi como observador, co-piloto of spotter, responsable pa monitoria e participantenan y mantene comunicacion entre nan y operador di e boto cu señal di man.

Den otro palabra, un di e medidanan di seguridad cuestiona publicamente despues di e tragedia na 2022 eventualmente a bira parti di maneho di gobierno.

Aplicacion ta mesun importante cu maneho

Apenas algun siman despues di anuncia e reglanan temporal na 2024, sinembargo, Ministerio di Naturalesa a reporta cu ta ricibi keho y evidencia cu algun compania di watersport tabata violando regla.

Entre e problemanan reporta tabata botonan drentando areanan designa pa landamento, creando riesgo pa hende cu ta landa of snorkel. E ministerio a adverti operadornan cu violacionnan lo resulta den castigo serio, incluyendo revocacion di nan permiso pa watersport.

E distincion aki – entre introduci regla y sigura cumplimento di nan – ta importante ora di considera e accidente mas recien.

Na e etapa aki, e relato comparti publicamente den medionan Mericano no ta duna suficiente informacion pa termina exactamente con e incidente di 11 di augustus a sucede, ki operador tabata involucra, si a viola algun regla of si por a preveni e accidente. Pues na e momento aki no tin base pa atribui responsabilidad na un operador specifico basa puramente riba e informacion disponible actualmente.

Sinembargo, otro accidente serio cu tubing involucrando turista ta lanta pregunta legitimo tocante con e marco di seguridad na Aruba ta traha den practica.

Beach policy cambiando atrobe

E accidente tambe ta yega mientras Aruba ta den proceso di un modernisacion mas amplio di a manera con ta maneha beach.

Anteriormente e aña aki, gobierno a anuncia un revision comprensivo di e Richtlijn Ruimtelijke Inrichting Stranden, RRIS, e marco di politica usa pa regula e uso teritorial di beach publico di Aruba.

E marco existente ta bay mas cu un decada atras, y ta cubri, entre otro, e division di areanan di beach y e presencia di actividad comercial y di watersport. Gobierno a bisa cu e modernisacion lo atende aglomeracion, uso intensivo di beach, y e necesidad pa regulacion mas cla y mas estricto.

E discusion mas amplio ta importante pasobra costa di Aruba a cambia considerablemente banda di e crecemento continuo di turismo. Areanan popular cada bes mas ta acomoda hende cu ta landa y snorkel, boto, jet ski, operacion di tubing, grupo di tour y otro usuarionan recreacional den un espacio relativamente limita.

Watersport ta un componente importante di producto turistico di Aruba y ta duna entrada y trabao. E pregunta nunca tabata necesariamente tocante si actividadnan asina mester existi, sino con nan por coexisti di manera safe cu otro, y cu tur hende usando awanan di Aruba.

Gobierno mes a reconoce e balans aki ora di introduci e maneho temporal di watersport na 2024: regulacion tabata destina no pa elimina e sector, sino pa mehora seguridad y sostenibilidad mientras ta permiti operadornan legitimo pa sigui opera.

E biaha aki, tabatin lifeguard

Un aspecto impactante di e accidente dia 11 di augustus ta con hopi e resultado a depende riba presencia di un persona en particular.

Marcelo Lorenzo no tabata trahando como personal di emergencia di Aruba, e tabata di vakantie cu su famia. Asina mes, su training profesional a nifica cu ora e accidente a tuma lugar, tabatin un persona cerca kende tabata sa con pa responde na un persona fo’i tino bao awa, duna asistencia na un persona herida sin haci e herida pio, y pone otro victima safe. Esey tabata extraordinariamente afortuna.

Cuatro aña pasa, Aruba a siña di e manera mas doloroso posible con lihe un paseo recreacional di tubing por bira un tragedia. Cassidy Murray tabatin apenas 13 aña di edad ora el a muri. Su morto a bira parti di e discusion publico cu eventualmente a contribui na cambio den maneho di watersport na Aruba.

E incidente mas recien no ta proba cu e cambionan a faya. Accidente por pasa hasta ora tin regulcion y ta cumpli cu medida di seguridad. Pero si ta duna un motibo pa examina si e reglanan introduci desde 2022 ta trahando manera a spera, si ta aplicando nan consistentemente, y si e lesnan siña di incidentenan anterior ta keda den memoria mientras sector di watersport ta sigui opera y crece.

E biaha aki, un lifeguard cu training tabat’ey den apenas algun seconde. Pero sistema di Aruba no por depende riba e suerte ey.