Ultimo siman, un soño di hopi tempo a bolbe titularnan na Aruba. Por tin petroleo y gas natural bao di lama rond di nos isla? Comerciante Mericano di petroleo, Bill Armstrong ta kere cu e contesta por ta si.

Su compania, Armstrong Oil and Gas, tin un concesion pa explora rond di Aruba desde 2024. Armstrong ta bisa cu un analisis di informacion anterior for di fondo di lama ta mustra señalnan prometedor di petroleo y gas. E ta emociona cu loke e ta mira. Pero prome cu Aruba cuminsa celebra, tin algo hopi importante cu tur hende mester compronde: Ainda no a descubri ningun petroleo ni gas.

Kico Armstrong a haya?

Companianan di petroleo ta usa tecnologia special pa studia e capanan di piedra profundamente bao di fondo di lama. Esaki ta permiti expertonan crea un imagen di kico por tin bao di e suelo. Armstrong y su team ta bin studiando informacion cu a colecta durante exploracion anterior rond di Aruba. Awo nan ta usando tecnologia mas nobo, incluyendo inteligencia artificial, pa evalua e informacion ey di nobo.

Armstrong ta kere cu e analisis nobo ta mustra un area grandi cu por contene petroleo y gas natural. El a describi e señalnan como un di esunnan mas interesante cu el a yega di mira den su carera largo den industria petrolero.

Esey ta zona impresionante.

Pero tin un diferencia grandi entre mira algo interesante den informacion geologico, y realmente haya petroleo.

Back den pasado

Aruba a yega di busca petroleo y gas den pasado caba.

Compania Spaño di energia, Repsol a bora varios pot rond di Aruba den pasado. Ningun a resulta den un descubrimento comercial.

Armstrong ta kere cu e resultadonan anterior aki no ta nifica necesariamente cu no tin nada. E ta argumenta cu tecnologia nobo ta permiti experto compronde e informacion anterior di un manera diferente.

E por tin rason, pero tin un solo manera pa haya sa sigur. Eventualmente, mester bora. Y esey ta caro.

Un boramento exploratorio por costa al menos 50 miyon dollar. Armstrong ta buscando partner dispuesto pa inverti y comparti e riesgo. Si nan bora y no haya nada, e placa ta perdi. Asina exploracion di petroleo ta traha. Por tin señal prometedor, pero te cu bora bao di e suelo, niun hende sa exactamente kico tin eynan.

No ta bay cuminsa bora ainda

Actualmente, no tin indicacion cu Armstrong ta bay cuminsa bora.
Compania Arubiano di Petroleo, CAP, a bisa Bon Dia Aruba cu e proyecto ainda ta den su prome fase. Pa awo, e trabao ta pa studia informacion, identifica posible ubicacion y haya inversionista. Si e stapnan aki ta exitoso, eventualmente exploracion por bay e siguiente etapa.

Y hasta si haya petroleo, produccion no lo cuminsa e siguiente dia.

Guyana ta un bon ehempel.

Companianan petrolero a busca eynan pa decadas prome cu ExxonMobil a haci un descubrimento mayor na 2015. Prome produccion di petroleo na Guyana a cuminsa apenas na 2019.

Pues hasta den un caso hopi exitoso, por dura añas entre descubrimento y produccion di petroleo. Esey ta nifica cu Aruba no mester cuminsa conta placa cu ainda no ta existi.

Tuma e posibilidad na serio

Ta cauteloso no ta nifica ignora oportunidad. Si realmente ta existi cantidadnan grandi di petroleo of gas comercialmente util rond Aruba, e por tin importancia economico mayor.

Pa decadas, Aruba ta papia tocante busca manera pa depende menos riba turismo.
Turismo ta keda extremadamente importante pa nos economia. Pero Covid a mustra con peligroso por ta ora asina hopi di e pais ta depende riba un solo industria.

Un industria exitoso di petroleo of gas potencialmente por crea otro fuente di entrada. E por crea trabao, atrae inversion y trece divisas na e pais.

Pero esaki ta hiba nos na e pregunta, si Aruba gana cantidad grandi di placa di petroleo of gas, kico nos mester haci cune?

Otro paisnan a contesta e pregunta aki den diferente manera. Algun a gasta nan entrada di petroleo rapidamente. Otronan, manera Noruega, a spaar y inverti gran parti di dje pa futuro generacionnan.

Si Aruba haci un descubrimento comercial, e decisionnan aki lo bira extremadamente importante. E momento pa cuminsa pensa kico pa haci ta prome cu e placa drenta, no despues.

Ken ta doño di kico?

Tambe tin pregunta legal cu Aruba mester compronde claramente.

Manera menciona den nos Editorial, Aruba tin awa teritorial extendiendo 12 miya nautico for di e isla. Recurso bao fondo di lama den e area aki ta pertenece na Aruba. Mas aleu tin un area mas grandi yama Zona Economico Exclusivo, EEZ.

Tin pregunta tocante autoridad y responsabilidad di Aruba den e area mas amplio aki, y si Aruba mester tuma stapnan adicional tocante maneho di EEZ.

Esaki por zona manera lenguahe legal laf awe, pero e lo bira mas importante si haya recurso natural valioso. Aruba mester sa claramente ken tin autoridad, kico companianan mester paga, kico gobierno ta ricibi, y ki regla ta aplica.

Y medio ambiente?

Petroleo y gas tambe ta trece otro preocupacion mayor. Aruba ta depende hopi riba lama. Nos beach y ambiente marino ta importante pa naturalesa, pesca, recreacion y turismo.
Un accidente involucrando boramento offshore por tin consecuencia serio.

CAP a bisa Bon Dia Aruba cu Armstrong no por simplemente yega cu mashin y cuminsa bora. Ordenansa di Petroleo di Aruba tin regla pa reduci riesgo ambiental. Exploracion mester tuma lugar protegiendo ambiente marino, y no por interferi innecesariamente cu actividadnan manera pesca y nabegacion.

Prome cu actividad cuminsa, autoridadnan mester ricibi informacion tocante kico e compania tin plan di haci, ki ekipo ta bay usa y ken ta bay ta involucra.
Gobierno tambe por nombra specialista pa supervisa e trabao. CAP ta bisa cu diferente autoridad Arubiano por ta involucra, incluyendo Departamento di Naturalesa y Medio Ambiente. Aruba Conservation Foundation tambe por keda informa unda ta necesario pasobra nan ta maneha e parke marino di Aruba.

Tambe mester respeta tratado internacional cu ta aplica pa Aruba.

Maske e reglanan aki ta importante, nan no ta elimina tur riesgo. Si eventualmente tin boramento, Aruba lo mester supervision fuerte pa sigura cu en berdad ta cumpli cu tur regla.

Momento pa prepara

Mientras tanto, Aruba por prepara, door di sigura cu su leynan ta cla. Por clarifica ken ta controla e areanan rond di e isla, por dicidi ki standard ambiental e companianan mester cumpli, y por pensa tocante con mester maneha futuro entrada di petroleo of gas, y si mester spaar un parti pa futuro generacionnan.

Y por sigura cu si haci un descubrimento, Aruba ta drenta e situacion aki sabiendo exactamente kico nos kier.

Pa awo, no tin fortuna di petroleo pa celebra. Tin posibilidad. Y lo mas sabi cu nos por haci cu posibilidad awo ta prepara en caso cu e bira realidad.