Fraccion di MEP a duna Minister Gerlien Croes 48 ora pa entrega e decision riba e bezwaar relaciona cu e caso di su biahe den un jet priva pa Corsou, y tambe un copia completo di e conseho di Bezwaaradviescommissie LAR. Den un carta fecha 26 di augustus 2026, parlamentarionan Evelyn Wever-Croes y Rocco Tjon ta sostene cu e termino legal pa e minister tuma un decision ya a vence. Croes a reacciona rechasando e critica y ta mantene cu e no tin obligacion di entrega un recibo di un gasto cu, segun e, el a paga cu su propio placa.
Den e carta, Wever-Croes y Tjon ta referi na un carta di 10 di juli 2026, den cual Bezwaaradviescommissie LAR a informa nan cu e conseho riba e bezwaar ya a ser manda pa minister Croes. Segun e parlamentarionan, desde e momento ey e periodo aplicabel pa tuma un decision a cuminsa core.
MEP ta basa su posicion riba articulo 20 di Landsverordening administratieve rechtspraak (LAR). Segun e fraccion, e termino di seis siman pa minister tuma un decision despues di e conseho a vence, mientras cu te cu 26 di augustus nan no a ricibi ni e decision ni e conseho mes.
Pa e motibo ey nan a pidi minister Croes entrega ambos documento inmediatamente y, den cualkier caso, dentro di 48 ora despues di ricibi e carta. Si esaki no sucede, Wever-Croes y Tjon ta indica cu nan lo considera uza e medionan huridico cu LAR ta pone na nan disposicion.
Minister Croes a reacciona riba su pagina oficial di Facebook y a pone enfasis riba e debate cu ya tin nuebe luna andando entre su persona y fraccion di MEP. Segun e mandatario, oposicion ta sigui concentra riba e asunto y ta pidi un recibo cu, segun su posicion, e no tin deber di entrega. Croes ta sostene cu MEP ta purba crea e impresion cu el a actua robes y ta nenga cu esaki ta e caso.
Den su reaccion, e minister ta haci un distincion entre control parlamentario riba placa publico y su gastonan personal. Croes ta argumenta cu Parlamento tin como tarea controla uzo di placa di pueblo, pero cu esaki no ta nifica cu parlamentarionan tin derecho di exigi cuenta di con e ta gasta su propio placa.
Croes a duna tambe mas informacion tocante e gasto cu, segun e, tabata relaciona cu e vuelo. El a señala cu gastonan di yegada na Corsou pa un vuelo di e tipo aki no ta pasa Afl. 1.000 y cu comparti tal gastonan ta permiti pa ley.
E mandatario a dirigi critica personal tambe na parlamentario Wever-Croes y a cuestiona pakico e mester entrega informacion tocante su gastonan personal. Alabes, e ta sigura cu e no a haci nada robes y cu e no lo permiti e presion politico rond di e caso determina su trabao como minister.
Minister Croes a indica cu durante e siman aki e lo bolbe contesta e preguntanan di fraccion di MEP, pero e no a indica den su reaccion si e decision formal riba e bezwaar ya a ser tuma ni ki si e conseho di Bezwaaradviescommissie lo ser entrega.
E carta y reaccion di minister ta agrega un capitulo nobo na e debate cu tin varios luna andando entre MEP y minister Croes tocante e biahe den jet priva y e informacion relaciona cu e vuelo.
E controversia a cuminsa despues cu e mandatario a biaha pa Corsou dia 19 di november 2025, un dia prome cu e fecha inicialmente programa pa su biahe di trabao.
Minister Croes tabatin autorisacion formal di Conseho di Minister pa un biahe programa pa 20 di november. E hecho cu minister a biaha un dia prome den un jet priva a genera preguntanan di parti di fraccion MEP, cu a solicita mas claridad tocante e pago di e vuelo, incluyendo e suma cu a ser paga y na ken e pago a ser haci.
Minister Croes a indica desde inicio cu placa publico no a ser uza pa paga su vuelo den e jet priva y cu e mes a paga su gasto. MEP, sinembargo, a insisti riba prueba documental pa verifica esaki.
Pa MEP, e pregunta no ta limita solamente na si placa publico a ser uza, e fraccion a relaciona e asunto tambe cu responsabilidad ministerial, transparencia y codigo di conducta pa mandatario. Segun MEP, pasobra Croes tabata biaha den su funcion como minister, Parlamento tin derecho di busca claridad tocante e condicionnan bao di cual e vuelo a ser facilita.
Minister Croes, di otro banda, ta mantene cu e hecho cu el a paga cu su propio placa ta pone e gasto fuera di e tipo di informacion financiero cu Parlamento mester controla.
Como parti di nan esfuerso pa haya e informacion, parlamentarionan Wever-Croes y Tjon a recurri na Landsverordening Openbaarheid van Bestuur (LOB). MEP a busca via e procedemento aki documentacion oficial relaciona cu e biahe, despues cu e contestanan via Parlamento, segun e fraccion, no a duna claridad.
E procedemento a resulta den otro desacuerdo. Minister Croes a cuestiona si e peticion a ser entrega di forma corecto, mientras cu MEP a sostene cu nan a sigui e via regular di comunicacion entre Parlamento y Gobierno. E diferencia procedural finalmente a yega dilanti di Bezwaaradviescommissie LAR.
Dia 25 di mei 2026, parlamentarionan Evelyn Wever-Croes, Rocco Tjon y Edgard Vrolijk a presenta pa un audiencia di LAR. Despues di e audiencia, MEP a indica cu e minister ainda no a presenta e documentonan cu nan tabata solicita. Segun e fraccion, defensa di minister tabata concentra principalmente riba cuestionnan procedural relaciona cu e manera cu e peticion a ser entrega.
Na e momento ey a ser indica cu Bezwaaradviescommissie lo formula un conseho den e caso. Dia 10 di juli nan a ser informa cu e conseho ya a ser manda pa minister Croes.
Contenido di e conseho no ta conoci publicamente. P’esey no por determina si Bezwaaradviescommissie a duna MEP rason riba su bezwaar, si el a sostene posicion di minister, of si e a recomenda un otro solucion. E conseho tampoco ta mescos cu e decision final; responsabilidad pa tuma un decision riba e bezwaar ta keda cerca e organo administrativo concerni.
E punto aki ta importante pa distingui e debate politico di e procedemento administrativo cu awor ta andando. Minister Croes su reaccion ta concentra principalmente riba e pregunta original: si e mester entrega prueba di un gasto cu e ta considera personal. E carta di MEP, sinembargo, ta enfoca riba e procedemento di LAR y e falta, segun e fraccion, di un decision dentro di e termino aplicabel.
Minister Croes ta mantene den su reaccion cu e no a actua di forma incorecto y cu e asunto ta ricibi demasiado atencion di oposicion. Segun e mandatario, Aruba tin hopi otro tema cu ta exigi atencion y su prioridad ta e trabao cu e tin pa haci como minister.
Di otro banda, fraccion di MEP ta insisti cu e informacion y documentonan mester ser entrega y cu awor tin tambe un termino administrativo cu, segun nan, ya a vence. E fraccion ta presenta e carta di 26 di augustus como un exigencia formal pa haya tanto e decision como e conseho di Bezwaaradviescommissie.
