(AFP) – Iran a ehecuta mas di 500 persona te awo e aña aki, despues di un ola nobo di colgamento den dianan recien, a pesar cu presidente Mericano, Donald Trump a urgi e republica Islamico pa stop cu ehecucionnan, un grupo di derecho a bisa diahuebs.
Iran a ehecuta al menos 511 persona te awo na 2026, segun NGO basa na Noruega, Iran Human Rights, incluyendo al menos 29 persona en conexion cu protesta anti-gobierno na januari.
Al menos 16 hende muhe ta entre esnan ehecuta y al menos 13 “prisonero politico” afilia cu gruponan di oposicion prohibi, e organisacion a bisa.
Activistanan ta acusa Iran di usa castigo capital como manera pa intimida e poblacion despues di e protestanan y e guera contra Merca y Israel cu a inicia dia 28 di februari.
“Tur ehecucion, sin importa e cargo, tin un proposito domestico cla – pa crea miedo y preveni protesta nobo,” director di IHR, Mahmood Amiry-Moghaddam a bisa AFP.
“Nos ta hopi preocupa cu e tendencia aki por empeora den proximo lunanan,” a agrega.
Desde cu ehecucion den tempo di guera a reanuda dia 19 di maart, tambe a ehecuta dos persona en conexion cu e protesta “Muhe. Bida. Libertad” di 2022.
Diamars, Trump a skirbi riba Truth Social cu “e Republica Islamico di Iran fracasa no ta pagando segmentonan grandi di nan ehercito, mientras na mes momento ta matando manifestante, hasta ora nan no ta manifestando, na nivelnan nunca mira antes.”
“Ta un crisis humanitario di proporcion epico, y mester par’e AWO,” el a agrega.
Amiry-Moghaddam a bisa cu durante e guera, comunidad internacional a enfoca riba reapertura di Estrecho di Hormuz y e conflicto, dunando “autoridadnan mas espacio pa ehecuta manifestante, prisonero politico y otronan sentencia na morto.”
El a elogia e comentarionan di Trump, bisando cu “mas atencion ta eleva e costo politico pa e republica Islamico.”
IHR ta bisa cu centenares mas di manifestante a keda sentencia na morto of ta enfrentando cargo cu por resulta den castigo di morto, incluyendo mas di 70 na Isfahan, e ciudad principal den centro di Iran, cu a mira protesta intenso na januari.
Segun Amnesty International, Iran a ehecuta al menos 2.159 persona na 2025. Pero autoridadnan awo ta parce di ta intensificando ehecucion di manifestante y otronan considera prisonero politico durante e conflicto.
Mas di 30 nacion, incluyendo Francia, Reino Uni y Canada, e luna aki a condena e uso di castigo capital di Iran, bisando cu e republica Islamico ta ehecutando manifestante pa “silencia disidencia,”
Medionan estatal Irani e siman aki a anuncia ehecucion di Majid Adineh, aresta en conexion cu e protesta na januari 2026 na Karaj pafo di Teheran, mientras varios otro a keda ehecuta den e dianan siguiente despues di condena incluyendo asesinato y robo arma.
