Sector bancario di Aruba a sigui crece durante e di dos kwartaal di 2026. Tanto prestamo como deposito na banconan comercial a aumenta. Na final di juni, prestamonan na empresa y individuo na Aruba a yega casi Afl. 4,916 miyon, mientras deposito total na banconan a subi pa casi Afl. 7,960 miyon.

Particularmente sector di hotel y restaurant a registra un aumento fuerte den credito. Na mesun momento, e cifranan ta mustra cu banconan ta mantene suficiente capital y placa disponibel pa cumpli cu nan obligacionnan.

E cifranan ta sali for di Quarterly Tables Financial Sector 2026-I & II di Centrale Bank van Aruba (CBA), publica dia 28 di augustus 2026. E documento ta presenta e desaroyonan den sector financiero durante e prome dos kwartaal di aña, incluyendo prestamo, deposito, cantidad di placa den economia y posicion financiero di banconan comercial.

Un di e desaroyonan cu mas ta sobresali ta e aumento di prestamo. Na final di maart 2026, banconan comercial tabatin un total di Afl. 4,698.5 miyon na prestamo pendiente na Aruba. Tres luna despues, na final di juni, e cifra a subi pa Afl. 4,915.9 miyon. Esaki ta un aumento di aproximadamente Afl. 217 miyon den e di dos kwartaal so.

Compara cu final di 2025, e diferencia ta ainda mas grandi. Na e momento ey, prestamonan total tabata Afl. 4,616.4 miyon. Esaki kiermen cu durante prome seis luna di 2026, credito bancario a aumenta cu casi Afl. 300 miyon.

E prestamonan ta casi igualmente dividi entre empresa y individuo. Na final di juni, empresanan tabatin Afl. 2,450.9 miyon na credito pendiente, mientras individuonan tabatin Afl. 2,465.0 miyon. Esaki ta pone cada grupo na aproximadamente mitar di tur credito cu banconan comercial tin pendiente na Aruba.

Gran parti di e credito na individuo ta relaciona cu hipoteca. Di tur Afl. 4,915.9 miyon na prestamo pendiente na final di juni, Afl. 2,806 miyon tabata den forma di hipoteca. Otro Afl. 1,923 miyon tabata prestamo cu un termino determina, mientras Afl. 187 miyon tabata credito via cuenta coriente.

Entre empresanan, actividad relaciona cu propiedad, huur y servicio empresarial ta representa e sector cu mas credito bancario pendiente. Na final di juni, e categoria aki tabatin Afl. 1,185.7 miyon na prestamo pendiente, compara cu Afl. 1,103.4 miyon na final di 2025. E sector aki so ta representa casi un cuarto parti di tur credito bancario na Aruba.

Pero e cambio mas grandi durante e di dos kwartaal ta den hotel y restaurant. Na final di maart, e sector tabatin Afl. 419.1 miyon na prestamo pendiente. Pa final di juni, e cifra a aumenta pa Afl. 519.3 miyon. Esaki ta un aumento di mas di Afl. 100 miyon den tres luna. Na final di 2025, e cifra ainda tabata Afl. 401.8 miyon.

Otro sector cu tin un cantidad importante di credito ta comercio mayorista y minorista, cu Afl. 263.8 miyon na final di juni. Industria y produccion tabatin Afl. 81.6 miyon, construccion Afl. 71.7 miyon y transporte, almacenamento y comunicacion Afl. 90.4 miyon.

Mientras prestamo ta aumenta, cantidad di placa cu cliente tin deposita na banco ta creciendo mas lihe ainda. Deposito total na banconan comercial tabata Afl. 6,842.3 miyon na final di 2025. Na final di maart 2026, esaki a subi pa Afl. 7,369.4 miyon y na final di juni pa Afl. 7,959.5 miyon.

Esaki ta nifica cu durante prome mitar di 2026, deposito na banconan comercial a aumenta cu mas di Afl. 1.1 biyon. Den e mesun periodo, activo total di banconan comercial a crece di Afl. 8,426.8 miyon pa Afl. 9,497.8 miyon.

E hecho cu deposito a crece mas lihe cu prestamo ta refleha tambe den e cantidad di placa cu banconan tin disponibel. Un indicador cu CBA ta uza pa midi esaki ta e relacion entre prestamo y deposito. Mientras mas halto e porcentahe ta, mas grandi e parti di deposito cu ta comprometi den forma di prestamo.

Na final di 2025, e relacion tabata 67.1%. Na final di maart 2026, el a baha pa 63.5% y na juni pa 61.5%. CBA ta permiti un maximo di 80%, sector bancario ta keda bao di e limite.

Otro indicador ta midi cuanto di e activonan di banco ta suficientemente likido, esta cuanto por ser converti facilmente den placa pa cumpli cu obligacionnan. E porcentahe aki a aumenta di 30.2% na final di 2025 pa 34.9% na final di juni. E minimo exigi pa CBA ta 19%.

E posicion di capital di banconan tambe ta keda riba di e minimo exigi. Na final di juni, capital regulatorio tabata ekivalente na 27.8% di activo ahusta segun riesgo. E minimo exigi ta 18%. E porcentahe tabata 29.4% na final di prome kwartaal y 28.9% na final di 2025.

Di otro banda, e cifranan ta mustra un aumento chikito den prestamonan cu no ta ser paga segun condicion acorda. E tipo di prestamo aki, conoci manera prestamo no productivo, tabata representa 1.4% di tur prestamo na final di 2025. E porcentahe a aumenta pa 1.6% na final di maart y 1.8% na final di juni.

Otro cambio importante ta e aumento den cantidad total di placa den economia. E indicador conoci manera “broad money” ta inclui, entre otro, placa efectivo y diferente tipo di deposito. E total a aumenta di Afl. 6,758.6 miyon na final di 2025 pa Afl. 7,722.7 miyon na final di juni 2026, un diferencia di casi Afl. 1 biyon den seis luna.

Posicion externo di e sistema monetario tambe a bira mas fuerte. Activo neto den exterior a aumenta di Afl. 3,737.3 miyon na final di 2025 pa Afl. 4,611.0 miyon na final di juni 2026. E indicador aki ta mustra e diferencia entre e recursonan financiero cu sistema monetario di Aruba tin den exterior y loke e sistema debe den exterior.

Den general, e cifranan di CBA ta mustra cu durante prome mitar di 2026 mas placa a ser deposita na banconan y mas credito a ser duna na empresa y individuo. E aumento den prestamo ta particularmente visibel den hotel y restaurant y den actividad relaciona cu propiedad y negoshi.

Na mes momento, deposito a crece mas lihe cu prestamo. Esaki a contribui na un nivel halto di likides, mientras banconan ta mantene capital riba di e minimo exigi pa CBA. E cifranan ta mustra tambe un aumento chikito den proporcion di prestamo cu no ta ser paga segun condicion acorda, di 1.4% na final di 2025 pa 1.8% na final di juni 2026.